Kɛwɔlɛnu 24 - ALLALA KUMƐ

Pɔli Maburi-Koe Yahudiyanu Bolo

¹ Tele loli tenbinɛ, Saraka-Masɔla-Kun-Tigi-Wɛ Ananayasi anubɛ ala kun-tigi donu anubɛ anuna kuma-fɔlɛ Tatulasi, wonu nara Sɛsariya soe burɔ. Anu sɔra sigisɔn-mansɛ yakɔrɔ ka anu burɔ-koe fɔ Pɔli kan ma.

² Anu ya Pɔli kele. Anuna kuma-fɔlɛ Tatulasi ya Pɔli maburi ka le. A ko, “Nba, Mansa Filikisi, alamɛ hɛrɛ dira i ma! I ye kun-tigiyɛ kɛla hɛnkili la min kɛ, wo ara ma yisi-kima-ba la ma ye, ado ko-nyima-siyaman ta ara bɛn mala nyamanɛ sabati-koe la.

³ Wo diyara ma ye a nya ma. Ma ye baraka birala i ye worɔ tuma-wo-tuma.

⁴ Kɔnɔ hali wo, n kana mɛ i tɔrɔla. Woletɔ n bi i madiyala, i yandi, i ni i wɔlɔ matɔlɔ mala dantɛgɛlɛ la. N sa mɛla.

⁵ Ma ya kei kɛ lɔn mɔgɔ-tɔrɔla-wɛ la. A ye murutiyɛ kɛla Yahudiyanu tɛma duninya fan bɛɛ. Nasarɛti kɛ ya dina min nafɔlɔ, ale le ye wo kun-tigiyɛ la.

⁶ A ye Alla-Bato-Bɔn latinyɛ kun na tumɛ min, ma ya a bira. [Ma rabɛnnɛ nun ka a kiti tɛgɛ iko mala tɔn ye nya min,

⁷ kɔnɔ Kɛlɛ-Den-Kun-Tigi-Ba Lisiyasi nara a bi ma bolo fɔrɔsɛ la.

⁸ Wo kɔma, ale Lisiyasi ya a fɔ ko a maburilɛnu ni na i wara.] Ni i ya kei kɛ manyinika, ma ye a maburila koe min bɛɛ la, ile nyɛrɛ si ke ka wonu lɔn ale bolo.”

⁹ A ban wo fɔla, Yahudiyanu fanan donta maburilɛ rɔ. Anu ko tonyɛ le kɛ bɛɛ la.

Pɔli Fɛka-Koe Mansa Filikisi Yakɔrɔ

¹⁰ Wo kɔma, sigisɔn-mansɛ ya a bole telen Pɔli la ko a ni kuma. Nba Pɔli ko, “N ya a lɔn ko i wara mala mɔgɛnuna kiti tɛgɛ san siyaman kɔrɔ. Woletɔ n sewanɛ ka n nyɛrɛ fɛka i yakɔrɔ.

¹¹ Ni i ya anu denu fɛsɛfɛsɛ, a ma tenbi tele tan-ni-fila la fɔlɔn, n tara Yerusalɛm batoli-kɛ-tinɛ.

¹² Yahudiyanu ma n taran mɔgɔ-wo-mɔgɔ sɔsɔla Alla-Bato-Bɔn la. N ma sɔnkɔ lawuli mɔgɔ-wo-mɔgɔ tɛma anuna dina-bɔnnu na, hali soe burɔ kan-bo-kan.

¹³ Anu bi n maburila koe minnu na kaka, anu ti ke wonu yirala i ye tonyɛ la hali!

¹⁴ N sɔnnɛ kɛ la i ye ko n bi ma benbanuna Alla batola kilɛ min fɛ, anu denu bi a fɔla wo le ma ko foninyɛ le. Kɔnɔ mabɛ ma benbanu bi Alla kelen de batola. Koe min bɛɛ sɛbɛnɛ Musata tɔn rɔ anubɛ nɛbinuna kitabunu tɔ, n lanɛ wonu fanan na.

¹⁵ Yigi min bi n ma Allala koe rɔ, yigi kelan wo ye kɛnu fanan ye ko furi bɛɛ la si wuli, a mɔgɔ-nyima wo, a yogoma wo, a filɛ bɛɛ.

¹⁶ Woletɔ n bi n bɛrɛmɛ kɛla tuma-wo-tuma ko n sɔndɔmɛ yilikibɛlɛ ni to Alla anubɛ mɔgɛnu yala.

¹⁷ “San donu kɔrɔ n sa Yerusalɛm soe burɔ min kɛ, n tara wodi la nna mɔgɔ bolo-kolɔnnu ye nyɔ anubɛ ka sarakɛnu bɔ.

¹⁸ N bi wo kun na tumɛ min, anu ya n taran Alla-Bato-Bɔn la, ado n ban-san le sɛninya-koe wo kanbalila wulɔn. Nyama sa n fɛ, sɔnkɔ-sɔnkɔ sa n fɛ.

¹⁹ Yahudiya do minnu bɔra Esiya nyamanɛ rɔ, wonu bi nyɔ nun. Ni ko-wo-ko ye wonu kɔntɔ n kan ma, a bɛnnɛ wonu nyɛrɛ ni na n maburi i ye,

²⁰ ado n sɔra Yahudiyanuta kun-tiginu yakɔrɔ tumɛ min, ni n yilikira ko-yogomɛ dola ko la, kei kɛnu ni wo fɔ i ye.

²¹ Fɔ kɛ kelan, n sɔnɛ anu yakɔrɔ tumɛ min, n ya n kan labɔ ko kelenna ko la. N ko, ‘N bi kiti min ma yan, wo le ko furi-lawuli-yigi ye n ma!’ ”

²² Mansa Filikisi ya Yisata kilɛ wo lɔn bɛrɛkɛ, woletɔ a ya kumɛ wo masɛgi kɔma fɔlɔn. A ya a fɔ anu ye ko, “Kɛlɛ-Den-Kun-Tigi-Ba Lisiyasi wa na tumɛ min, n si kumɛ wo latɛgɛ wo rɔ.”

²³ Pɔli maranɛ kɛlɛ-den-kun-tigi min bolo, a ya a fɔ a ye ko ka Pɔli mara. A ko anu kana a mara a dan na anubɛ anu kana a diyana-mɔgɛnu mabeli a makoenu nyinyala.

Pɔli Sɔ-Koe Filikisi anubɛ Ala Musi Yakɔrɔ

²⁴ Tele-dande kɔma, Sigisɔn-Mansa Filikisi anubɛ ala musi Durusila nara a makele tinɛ. Yahudiya le ala musi wo la. Pɔli ya a rakaran anu ye a dɛnkɛninyara Yisa ma nya min, Allata-Mɔgɔ-Yabɔnɛ, kɔni. Anu ya anu tole masɔ wo bɛɛ la.

²⁵ Kɔnɔ Pɔli wulita kumala ko-nyima-kɛ-koe anubɛ nyɛrɛ-bira-koe anubɛ kiti-tɛgɛ-tele-koe ma min kɛ, Mansa Filikisi kilanta. A ko, “Wo ara a bɔ. Ta fɔlɔn. N ba fɛrɛ sɔrɔn tumɛ min, n si i kele.”

²⁶ A ye mansɛ miriya rɔ nun ko Pɔli si wodi do yira a la. Wo le ya a to, a tora Pɔli kelela tuma-wo-tuma ka kuma a la.

²⁷ San fila kɔma, Porisiyasi Fɛsitasi sigira sigisɔn-mansayɛ la Mansa Filikisi gbɛ rɔ. Kɔnɔ Mansa Filikisi ye a fɛ nun ka Yahudiyanu diyana-koe kɛ, woletɔ a ya Pɔli to yele la.