Kɛwɔlɛnu 20 - ALLALA KUMƐ

Pɔli Ta-Koe Masidoniya anubɛ Akeya Sigisɔnnu Tɔ

¹ Sɔnkɔ-sɔnkɛ banta tumɛ min, Pɔli ya dɛnkɛninya-mɔgɛnu kele anu nyɔgɔn fɛ ka anu sɛnbɛ don. A ya a masara anu na ka Masidoniya nyamanita-kilɛ bira.

² A tenbira nyamanɛ min bɛɛ rɔ, a ya Marita mɔgɛnu makawandi siyaman. Wo kɔma, a tara Akeya sigisɔn rɔ

³ ka karɛ sawa bɔ nyɔ. Pɔli ye a rabɛnna ka ta Siriya nyamanɛ rɔ kulɔn rɔ tumɛ min, a ya Yahudiyanuna dunbu-koe lɔn a kan ma. Woletɔ a ya a latɛgɛ ko a ni sɛgi Masidoniya kilɛ fɛ.

⁴ Pairihusila den-kei Sopata min bɔra Bɛriya soe burɔ, wo bilara a fɛ. Aritaka anubɛ Sɛkunda minnu bɔra Tɛsalonaika soe anubɛ Keyasi min bɔra Dabi soe anubɛ Timoti, wonu fanan tara. Tikika anubɛ Tarofimasi fanan bilara a fɛ ka bɔ Esiya nyamanɛ rɔ.

⁵ Wonu tara ma yarɔ ka ma makɔni Taroyasi soe burɔ.

⁶ Biredi-Yɛlɛbɛlɛ-Dɔn-Ladɛn banta tumɛ min, ma donta kulɔn rɔ ka bɔ Filipai soe burɔ. Tele loli kɔma, ma ya anu taran Taroyasi. Ma ya lɔgɔkun kelen bɔ nyɔ.

Pɔlila Kɔndɔli-Laban Taroyasi Soe Burɔ

⁷ Sinbiri wurɛ la, ma ya ladɛn kɛ ka Marita kima dɔn ma nyɔgɔn fɛ. Pɔli kumara mɔgɛnu na. Nba, a tora kumala ha suyi tɛma bawo wo banda kɛ, a ye bɔla anu fɛ ka ta.

⁸ Ma ladɛnnɛ san-bɔn la kan min nun, lɛnpu siyaman bi nyɔ.

⁹ Keminɛ min tɔgɛ Yutikasi, wo siginɛ wundan la nun. Pɔli ye kumala tumɛ min, kinɔgɛ ya ale keminɛ wo yɛ bira kati! Tɔ-a-la, kinɔgɛ tenbira a ma peru! A bɔra san-bon sawa nyɔgɛ la ka bui dugi ma fugbu! Anu bi tala a bila tumɛ min, anu ya a taran, a ara faga!

¹⁰ Pɔli yigira ka a madu a kuma ka a bole mini a ma. A ko, “Wo kana haminya. A fagani ma!”

¹¹ Wo kɔma, a sɛgira san-bɔn la tun Marita kima dɔn tinɛ. Pɔli mɛra kumala anu na ha banda-ka-dɛ ma. Wo kɔma, a tara.

¹² Anu nyagalennɛ ya kemini-kɛndɛ bi ka ta a la a warɛ.

Ka Bɔ Taroyasi Soe ka Ta Mailita Soe Burɔ

¹³ Ma donta kulɔn rɔ ka ta Pɔli yarɔ Asosi soe burɔ. A ya a fɔ ma ye nun ko a ye tala nyɔ a kian la ka na kofu ma ma kulɔn rɔ.

¹⁴ A ya ma taran Asosi soe burɔ tumɛ min, a kofura ma ma. Ma tara Mitilini soe burɔ.

¹⁵ Wo banda kɛ, ma kera Kayosi yi-tɛma-dugi ma. Wo banda kɛ, ma kera Semosi yi-tɛma-dugi ma. Wo banda kɛ fanan, ma kera Mailita soe.

¹⁶ Pɔli ara a latɛgɛ ko a ni tenbi Ɛfɛsa soe la alako a kana wati matanba Esiya nyamanɛ rɔ. A ye a lakaliyala nun ko a ni Pɛntikɔsi tele kɛ Yerusalɛm soe burɔ.

Pɔlita Masara-Koe Ɛfɛsa Mɔgɔ-Banu Na

¹⁷ Pɔli ye Mailita soe burɔ tumɛ min, a ya kilayɛ lata Ɛfɛsa soe dɛnkɛninya-mɔgɔ-banu ma ko anu ni na ke a ma.

¹⁸ Mɔgɔ-ba wonu ke Mailita tumɛ min, a ya a fɔ anu ye ko, “Kebi n nɛ fɔlɔtɛ Esiya nyamanɛ rɔ, n bara to wo fɛ nya min, wo ya wo bɛɛ lɔn.

¹⁹ Yahudiya donu ya dunbɛ rasa n ma ka a lagbɛlɛya n kuma ha n ya-yi bɔra kɔnɔ n ya nna wɔlɛ bɛɛ kɛ Mari ye famayigi rɔ.

²⁰ Koe min bɛɛ si ma wo dɛnbɛn-koe la, n ma wo beli wo fenfen na iko wo ya a lɔn nya min. N ya kawandili bɔ ka wo karan gbɛ rɔ anubɛ wola bɔnnu na.

²¹ A Yahudiya wo, a sibolo-gbɛrɛ wo, n ya a fɔ anu filɛ bɛɛ ye ko anu ni anu kan-kɔ sɔ anu hakɛ la ka anu yɛ lamunun Alla la ka dɛnkɛninya Mari Yisa ma.

²² Nba kaka, n bi tala Yerusalɛm Allata Ni-Sɛnimɛla kuma-birɛ fɛ. Koe minnu si ma n na nyɔ, n ma wonu lɔn.

²³ N ba ta soe bɛɛ rɔ, Allata Ni-Sɛnimɛ ye n nalɔnna ko yelela-don anubɛ tɔrɔyɛ ye n makɔnɔna Yerusalɛm.

²⁴ Kɔnɔ n ma n nyɛrɛ niyi lɔn fenfen na wo rɔ fɔ n ni nna kilayɛ lakanbali. Mari Yisa ya wɔlɛ min di n ma, fɔ n ni wo ban. Allata hina-wɛ, n ni to wo kibara-nyimɛ fɔla.

²⁵ “N bara tagama wo bɛɛ tɛma ka Allala-mansaya-kawandili bɔ kɔnɔ kaka, n ya a lɔn ko wo fenfen ti n yen kɛ kɔma tun.

²⁶ Woletɔ n bi a fɔla wo ye ko ni wo fenfen halakira bi kɔma, wo dunɛ ti to nde kuma

²⁷ bawo n ma Alla sako fenfen to a fɔbɛlɛ la wo ye.

²⁸ Wo ni ma saga-fɛ-biralɛnu na ka Allata mɔgɛnu fɛ-bira. Wo ni wo yili to wo nyɛrɛ ko anubɛ wo kurɔn ko Allata Ni-Sɛnimɛ ara min bɛɛ don wo bolo, ado a ya wonu ma atɛ la ala danta sayɛ fɛ.

²⁹ N ya a lɔn ko n ba ta tumɛ min, mɔgɛ donu si kɛ wo ma iko suluku-feremɛnu si kɛ saga-kurɔn ma nya min.

³⁰ Mɔgɛ donu si bɔ wo nyɛrɛta kurɔn kɛ rɔ ka foninyɛ fɔ alako dɛnkɛninya-mɔgɛnu ni bila anu fɛ.

³¹ Woletɔ wo ni wo yɛ lakalan. Wo yili ni to kɛ ko. San sawa, n tɔrɔta wola ko la ka wo kelen-kelennamɛ-bɛɛ karan su-ni-tele.

³² “Nba kaka, n bara wo dantɛgɛ Alla ma. Wo yili ni to ala hina-kumɛ ko min si ke wo sɛnbɛ donna ka ata duwɛ di wo ma, ado a ara duwɛ wo lamara ala mɔgɛ bɛɛ ye.

³³ N ma n niyi sa mɔgɔ-wo-mɔgɔla wodi-gbɛ anubɛ ala sɛnɛ kuma, hali ala kurɛ.

³⁴ Wo nyɛrɛ ya a lɔn ko n bole kɛnu bara wɔlɛ kɛ n ye. N ya n nyɛrɛ makoe bɛɛ nyinya anubɛ n fɛ-mɔgɛnutɛ.

³⁵ Wo si to sɛnbɛbɔnɛnu dɛnbɛna nya min, n bara wo dama yira wo la nta wɔlɔ-gbɛlɛmɛ fɛ. Mari Yisa nyɛrɛ ya kumɛ minnu fɔ, wo ni wo yili to wonu ko. A ko, ‘Min bi fan nila, wota sewɛ kolo ka tenbi a ye a dila min ma.’ ”

³⁶ Pɔli banta kumala tumɛ min, a ya a nyɛnkin anu dama fɛ ka Alla matara.

³⁷ Anu dama dira ka Pɔli ramɔnsɔn ka a sunbu.

³⁸ A ya a fɔ min kɛ ko anu ti a yakɔrɛ yen tun, wo ya anu yisi tinya bɛrɛkɛ! Woletɔ anu tara a fɛ ha kulun-dɛ la.