Kɛwɔlɛnu 19 - ALLALA KUMƐ

Pɔli Ta-Koe Ɛfɛsa Soe Burɔ

¹ Apɔlɔsi ye Kɔrɛnti soe burɔ tumɛ min, Pɔli bɔra kantɔ-nyamanɛnu tɔ ka na ke Ɛfɛsa soe burɔ. A ke nyɔ, a ya Marita mɔgɛ donu taran nyɔ.

² A ya anu manyinika ko, “Wo dɛnkɛninyara Yisa ma tumɛ min, wo ya Allala Ni-Sɛnimɛ sɔrɔn nun, ba?” Anu ya a yabi ko, “Male ma a lamɔɛn bɛ nun defan ko Allata Ni-Sɛnimɛ ye nyɔ.”

³ Pɔli ya anu manyinika ko, “Nba, wo ya batasili-sufa nyamintan sɔrɔn worɔ?” Anu ya a yabi ko, “Yɔni ya mɔgɛnu karan batasili min na, ma ya wo le sɔrɔn.”

⁴ Pɔli ko, “Yɔni ya mɔgɛnu batasi alako anu ni anu kan-kɔ sɔ anuna hakɛ la ka anu ya-lamunun Alla la. A ya a fɔ Yahudiyanu ye ko anu ni la mɔgɔ-gbɛrɛ la min bi nala ale kɔma, ado Yɔni ye Yisa le ma nun.”

⁵ Anu ya kɛ lamɔɛn tumɛ min, anu batasira Mari Yisa tɔgɛ rɔ.

⁶ Pɔli ya a bole sa anu kuma tumɛ min, anu fanan ya Allata Ni-Sɛnimɛ sɔrɔn. Anu kumara kan-gbɛrɛnu tɔ ka wɔlɔyiya-kumɛ fɔ iko fɔlɔ-mɔgɛnu.

⁷ Anu dama lakofunɛ, kei tan-ni-fila.

⁸ Karɛ sawa kɔrɔ, Pɔli tara don Yahudiya-dina-bɔn la ka kuma mɔgɛnu ye yisi-latɛgɛ rɔ Allala mansayɛla ko la. Anu fanan ni la wo la.

⁹ Kɔnɔ anu donu yisi gbɛlɛyanɛ. Anu ma sɔn dɛnkɛninya-koe ma. Anu ya Marita kilɛ lafɛya nyama bɛɛ yala. Woletɔ Pɔli bɔra anu fɛ ka ta Marita mɔgɛnu na a bolo Tairanala karan-bɔn la. Tele-wo-tele, a ye anu makawandila nyɔ nun.

¹⁰ A tora anu fɛ san fila kɔrɔ. Woletɔ mɔgɛ min bɛɛ siginɛ Esiya nyamanɛ rɔ, a Yahudiya wo, a sibolo-gbɛrɛ wo, bɛɛ ya Marita kumɛ lamɔɛn.

Sifala Dannu

¹¹ Alla ya kabana-ko-kɛ-sɛnbɛ di Pɔli ma.

¹² Hali ala pɔkitanɛnu anubɛ ala wɔli-kɛ-durukinu, anu ba ta wonu na kirayatoenu ma, anu si kɛndɛya. Nyina-yogenu si bɔ anu fɛ.

¹³ Nba, Yahudiya do minnu bi tagamana dinkirɛnu tɔ ka nyinɛnu gben mɔgɛnu fɛ, wonu wulita Mari Yisa tɔgɔ rakelela nyina-gben-koe la mɔgɛnu fɛ. Anu ya a fɔ nyina-yogomɛnu ye ko, “Pɔli ye Yisa minna koe kawandili bɔla, n bi wo bɔla wo tɔgɛ rɔ.”

¹⁴ Yahudiyanuna saraka-masɔla-wɛ do min tɔgɛ Sifa, wola den-kemini wɔrɔnfila le ya wo ma.

¹⁵ Kɔnɔ nyina-yogomɛ ya a fɔ wonu ye ko, “N ya Yisa lɔn! N ya Pɔli wara-koe lamɔɛn kɔnɔ yon bi wole la?”

¹⁶ Nyina-yogomɛ ye kei min fɛ, wo buira anu ma sɛnbɛ la. A ya anu dama tanban. Anu burimatoe bɔra ala bɔn la, anu nakolɔn.

¹⁷ Yahudiyanu anubɛ sibolo-gbɛrɛ minnu siginɛ Ɛfɛsa soe burɔ, wonu ya kɛ lamɔɛn tumɛ min, anu dama kilanta bɛrɛkɛ! Anu ya Mari Yisa tɔgɛ gbiliya bɛrɛkɛ!

¹⁸ Dɛnkɛninya-mɔgɔ siyaman wulita anu sɔn-yogomɛ rakaranna ka wo labɔ gbɛ rɔ.

¹⁹ Minnu bara duriyɛ kɛ, wonu ya anuna duruya-bukunu nadɛn ka anu mintan mɔgɛ bɛɛ yala. Anu ya buku wonu sɔnkɛ yatɛ tumɛ min, wo bɛɛ bɛnta wodi-gbɛ-gbu waga bi-loli (50,000) le ma.

²⁰ Marita kumɛ tora nyɛnsɛnna ka koloya sɛnbɛ-ba la wo nya.

Sɔnkɔ-sɔnkɛ Kɛ-Koe Ɛfɛsa Soe Burɔ

²¹ Koe kɛ bɛɛ tenbinɛ, Pɔli ya a latɛgɛ a yisi rɔ ko a tenbi tala Yerusalɛm, a ni ta Masidoniya anubɛ Akeya sigisɔnnu tɔ. A ko, “N ba bɔ nyɔ rɔ tumɛ min, fɔ n ni ke Romu soe fanan.”

²² A ya a dɛnbɛna filɛ lata Masidoniya nyamanɛ rɔ, Timoti anubɛ Irasiti, kɔni. Ale nyɛrɛ tora Esiya nyamanɛ rɔ wati-ni kɔrɔ.

²³ Wo wati rɔ, tɔrɔya-ba wulita Ɛfɛsa soe burɔ ka a tɛgɛ Marita kilɛla ko la.

²⁴ Siyaki do ye nyɔ, a tɔgɔ Dimitiya. Bɛsi-musi min tɔgɛ Atɛmisi, a ye wola kɔ tinɛla muninyɛnu nadanna wodi-gbɛ la. Ala wɔlɛ wo mara tɔnɔ-ba la a wɔli-kɛ-nyɔgɛnu ye.

²⁵ Woletɔ minnu bi wɔli kelan wo kun na, anu ya wonu nadɛn kan-tina-kelen ka a fɔ anu ye ko, “N bɔnu, wo ya a lɔn ko ma ye nɔnfuli sɔrɔnna wɔlɛ kɛ rɔ.

²⁶ Pɔli kɛ ye min mala kɛ la, a ye mɔgɛnu tɔrɔla Ɛfɛsa soe burɔ yan nya min, wo ya wo yen. A tora doni, a ni ke Esiya nyamanɛ bɛɛ rɔ. A ye a fɔla ko male ye bɛsɛ minnu nadanna, Alla ma wonu na mumɛ!

²⁷ Mɔgɛnu si wuli mala wɔlɛ kɛ rasɛla, ado wo dɔrɔn ma. Bɛsi-musumɛ-makawanɛ Atɛmisila kɔ tinɛ si ma fuyi la mɔgɛnu yala. Esiya nyamanita-mɔgɛ bɛɛ ye bɛsi-musumɛ wo kɔla anubɛ duninya-mɔgɛ bɛɛ! Mɔgɛnu bi nala nyinala a ko!”

²⁸ Bɛsi-ladannɛnu ya kumɛ kɛnu namɔɛn tumɛ min, anu diminyara ka sɔnkɔ layɛlɛ ko, “Ɛfɛsa kɛnuna Atɛmisi kolo!”

²⁹ Sɔnkɔ-sɔnkɛ wo kɛra soe fan bɛɛ rɔ. Nyama ya Pɔli ta-nyɔgɛnu Keyasi anubɛ Aritaka bira minnu bɔra Masidoniya nyamanɛ rɔ. Anu burumatoe tara wonu na ladɛn tinɛ.

³⁰ A sɔgɛ ya Pɔli nyɛrɛ bira ka ta nyama yakɔrɔ kɔnɔ Marita mɔgɛnu ma sɔn wo ma.

³¹ Pɔli diyara nyamanita-mɔgɔ-ba donu ye. Wonu fanan ya sarakanɛ lata a ma ka a madiya ko ale nyɛrɛ kana a kunyɛ ladon ladɛn tinɛ.

³² Ladɛn bɛɛ mara sɔnkɔ-sɔnkɛ la. Donu bi gbele-gbelenna koe dola ko la, ni wo ma, ko-gbɛrɛla ko la bawo anu nadɛnta nyɔ minna ko la, anu siyaman ma wo lɔn.

³³ Tɔ-a-la, mɔgɛ donu ko Alɛsanda le koe wo kunyɛ la bawo Yahudiyanu ya a sɔ anu yarɔ. Alɛsanda ya a bole sa a dɛ la ko mɔgɛnu ni anu sabari. A ya a raya ka a nyɛrɛ fɛka mɔgɛnu yala.

³⁴ Kɔnɔ anu ya a lɔn tumɛ min ko Yahudiya le, anu dama gbele-gbelenta anu nyɔgɔn fɛ hawa fila kɔrɔ ko, “Ɛfɛsa kɛnuna Atɛmisi kolo!”

³⁵ Tɔ-a-la, mɔgɔ-ba do ya nyama lakala. A ko, “N ta-nyɔgɛ Ɛfɛsa kɛnu! Bɛɛ ya a lɔn ko Ɛfɛsa kɛnuna soe le Atɛmisi-bala kɔ-tina-kandannɛ la. Bɛɛ ya a lɔn ko kuri min buira ka bɔ san ma, ma ye wo le kɔla.

³⁶ Mɔgɔ-wo-mɔgɔ ti ke koe kɛnu masɔsɔla. Woletɔ wo ni wo sabari. Wo kana ko-wo-ko kɛ tengbereyɛ la.

³⁷ Wo ara na mɔgɛ minnu na yan, wonu ma kankanyɛ kɛ bɛsi-kɔ-tinɛnu tɔ. Wonu ma kuma-yogomɛ fɔ mala bɛsi-musumɛ le ma.

³⁸ Ni ko do ye Dimitiya anubɛ a wɔli-kɛ-nyɔgɛnu burɔ mɔgɛ do kan ma, kiti-tɛgɛlɛnu anubɛ mɔgɔ-banu bi ma bolo. Anu si anu nyɔgɔn samasi nyɔ.

³⁹ Kɔnɔ ni kuma-gbɛrɛkɛ ye wo bolo, fɔ wo ni wo latɛgɛ dugurannu tɛma.

⁴⁰ Mɔgɛnu kana a fɔ ko ma ara sɔnkɔ-sɔnkɛ lawuli bi. Ma ti ke fenfen fɔla anu ye sɔnkɔ-sɔnkɛ kɛla ko la, ado ma ti ke ladɛn-kɛ-kɔrɛ yirala anu na.”

⁴¹ A banta kɛ fɔla tumɛ min, a ya nyama lasɛgi.