Kɛwɔlɛnu 17 - ALLALA KUMƐ

Pɔli Ta-Koe Tɛsalonaika Soe Burɔ

¹ Pɔli anubɛ a ta-nyɔgɛnu tenbira Amfipolisi anubɛ Apaloniya soenu tɔ ka na ke Tɛsalonaika soe burɔ, Yahudiya-dina-bɔn do ye kan min.

² Pɔli ya Sulen-Tele sawa kɛ nyɔ. A tara dina-bɔn la iko a duruta a mala nya min. A ya mɔgɛnu makawandi ka bɔ Allata kitabu rɔ

³ ka a yira anu na ko fɔ Allata-Mɔgɔ-Yabɔnɛ ni tɔrɔ ka bɔ furinu tɛma. Pɔli ko, “N bi Yisa minna koe fɔla wo ye, Allata-Mɔgɔ-Yabɔnɛ le.”

⁴ Yahudiya donu lara kumɛ wo la, woletɔ anu kofura Pɔli anubɛ Sailasi ma. Kiriki minnu bi Alla batola, wo siyaman dɛnkɛninyara anubɛ musu-tɔgɔlamɛ siyaman.

⁵ Kɔnɔ keliyɛ wulita Yahudiya donu na. Anu ya mɔgɔ-yokalente donu bi kilɛ la alako anu si nyama ladɛn. Anu ya a ma, soe bɛɛ sɔnkɔra ka bui Yesonla bɔn ma Pɔli anubɛ Sailasi ye kan min. Anu bi a fɛ ka anu nabɔ nyama ma.

⁶ Kɔnɔ anu ma ke anu yenna min kɛ, anu ya Yeson anubɛ Mari Yisata mɔgɛ donu sagan ka ta anu na so-burɔ mɔgɔ-banu bara. Anu ya wɔyɔ layɛlɛ ko, “Kɛnu bi mɔgɛnu tɔrɔla dinkirɛ bɛɛ! Kaka, anu bara na maleta so tɔrɔ tinɛ,

⁷ ado Yeson kɛ ara anu yiya ala bɔn la. Anu bi Romu nyamani-kun-tigila tɔn bɛɛ tinyana ko mansa-gbɛrɛ ye nyɔ tun min tɔgɛ Yisa.”

⁸ Nyama anubɛ mɔgɔ-banu ya wo lamɔɛn tumɛ min, wo ya a ma, anu nyɛɛra anu ma.

⁹ Yanni anu ni anu boloka, nyɔ-mɔgɔ-banu ya anu kunka-wodi makele Yeson anubɛ doi wonu bolo.

Pɔli Ta-Koe Bɛriya Soe Burɔ

¹⁰ Suyi kera nya min wo, Marita mɔgɛnu ya Pɔli anubɛ Sailasi lata Bɛriya soe burɔ. Anu kera Bɛriya tumɛ min, anu tara Yahudiya-dina-bɔn la.

¹¹ Nyɔ-mɔgɛnu yisi lakanɛ ka tenbi Tɛsalonaika kɛnu na. Anu ya anu tole masɔ Allala kumɛ la a kin na! Tele-wo-tele, anu bi Allata kitabu fɛsɛfɛsɛla ka a lɔn ni Pɔlita karan le tonyɛ la serr!

¹² Anu siyaman dɛnkɛninyara. Kiriki-musu-tɔgɔlamɛ siyaman anubɛ Kiriki-kei siyaman fanan dɛnkɛninyara.

¹³ Kɔnɔ Yahudiya minnu bi Tɛsalonaika, wonu ya a lamɔɛn tumɛ min ko Pɔli ye Allala kumɛ kawandili bɔla Bɛriya soe burɔ, anu tara nyɔ ka nyama latugu anu kan ma.

¹⁴ Tiriyante wo rɔ, Marita mɔgɛnu ya Pɔli lata kɔgɔ-yi dafɛ kɔnɔ Sailasi anubɛ Timoti tora Bɛriya.

¹⁵ Minnu tara Pɔli la, wonu bilara a fɛ fɔɔ Atɛn soe burɔ. Pɔli ya a sara anu na ko Sailasi anubɛ Timoti ni na a taran nyɔ yona. Anu sɛgira Bɛriya.

Pɔli Ta-Koe Atɛn Soe Burɔ

¹⁶ Nba, Pɔli ye Sailasi anubɛ Timoti makɔnɔna Atɛn soe burɔ tumɛ min, a ya soe wo lafanɛ taran bɛsɛnu na. Wo ya Pɔli lamɔni bɛrɛkɛ!

¹⁷ Yahudiyanu anubɛ sibolo-gbɛrɛ minnu bi Alla batola anu nyɔgɔn fɛ nyɔ, Pɔli kumara anu ye anuna dina-bɔn la. Tele-wo-tele, min bɛɛ nara barɛ rɔ, a kumara wonu fanan ye.

¹⁸ Ɛpikuriyannu anubɛ Sitowikanuna karan-mɔgɛ donu ya a sɔsɔ. Donu ko, “Karanbɛlɛ nyɛrɛ-mayiralɛ kɛ ye a rayala ka nfen fɔ?” Donu ko fanan, “A manɛ iko a ye kumala mɔgɔ-gbɛrɛnuna allanuna ko la.” Anu ya kɛ fɔ bawo Pɔli ye kawandili bɔla Yisala ko la nun anubɛ mɔgɔ-lawuli-koe ka bɔ furinu tɛma.

¹⁹ Woletɔ anu ya Pɔli bi ka ta a la kuma fɔ tinɛ do rɔ anu bi min kelela ko Ariyapagasi. Anu ko, “I ye karan-kurɛ kɛ minna ko fɔla, ma ye a fɛ ka wo wara-koe lamɔɛn.

²⁰ Ma ye koe donu namɔɛnna, ko-kurɛ le wonu na male yala. A di ma ye ka wonu kɔrɛ lɔn.” (

²¹ Ado nfan, Atɛn mɔgɛ bɛɛ anubɛ sundan minnu siginɛ nyɔ, a di wonu ye ka to ko-kurɛnu fɛsɛfɛsɛla anubɛ ka wonu wara-koe lamɔɛn.)

²² Pɔli sɔra kun-tiginu yarɔ kuma fɔ tinɛ. A ko, “Wole Atɛn kɛnu! N bara a yen nya bɛɛ ma ko dina-mɔgɛ le wole la kati!

²³ N bi wola soe ratagamana tumɛ min ka wola batoli-kɛ-tinɛnu mafɛlɛn, n ya saraka-bɔ-tinɛ do fanan yen, a sɛbɛnɛ min ma ko, ‘Alla-min-lɔnni-ma, wotɛ le kɛ la.’ Wo ye sarakɛnu bɔla alla wo ye kɔnɔ wo ma a lɔn a kilɛ fɛ. N bi wo le wara-koe fɔla wo ye kɛ la.

²⁴ Alla min ya duninya dan anubɛ fan min bɛɛ ye a rɔ, wo le ye san-kole anubɛ dugu-kole kun-tigi la. A sigini ma mɔgɛnuna bato-bon-sɔnɛnu na,

²⁵ ado a mako sa mɔgɛnuna dɛnbɛnɛ la bawo ale nyɛrɛ le ye niyi anubɛ fen-toe bɛɛ dila mɔgɛnu ma.

²⁶ A ya mɔgɔ-su bɛɛ dan ka bɔ mɔgɔ kelen tɔ ka anu nasigi dugu-kole bɛɛ kuma. Ale nyɛrɛ ya anuta watinu anubɛ anuna sigi tinɛnu dan latɛgɛ kebi fɔlɔ.

²⁷ A ya wo ma alako ma ni to a nyinina. Tumado ni ma ya ma yɛ lakalan, ma si a yen. Hali wo, Alla ma fɛ-yan ma fenfen na,

²⁸ ado ale le ye sɛnbɛ dila ma ma alako ma ni to ma niyi la, koe bɛɛ ma tinɛ. A ye iko wola yelebanu bi a fɔla nya min ko, ‘Ala dannu le male fanan na.’

²⁹ Nba, ni ala dannu le male la, ma kana ma miri ko Allayɛ manɛ iko sɛnɛ anubɛ wodi-gbɛ, ni wo ma, kuri min lɛsɛnɛ mɔgɛnuna halliyɛ anubɛ hɛnkili la.

³⁰ Fɔlɔ-nun, Alla ya a kolan bɔ mɔgɛnuna Alla-lɔnbɛlitayɛ la bawo anu bi min mala nun, anu ma wo lɔn. Kɔnɔ kaka, a ara a fɔ ko fɔ mɔgɛ bɛɛ ni yɛlɛma ka bɔ anuna ko-yogoma-kɛ-kilɛnu fɛ,

³¹ ado a ara wo tele latɛgɛ a si duninya bɛɛ kiti tɛgɛ lunyɛ min telenbagayɛ la. A ara ale Yisa yabɔ ko ale le ni mɔgɛ bɛɛ kiti a ye. A ara wo yira ma bɛɛ la ata lawuli fɛ ka bɔ furinu tɛma!”

³² Pɔli ya furi-lawuli-koe fɔ min kɛ, anu donu ya a mayɛlɛn. Kɔnɔ dogbɛrɛnu ko, “Ma ye a fɛ, i ni kɛ fɔ ma ye wati-gbɛrɛ.”

³³ Nba, Pɔli bɔra anuna kuma fɔ tinɛ rɔ,

³⁴ ado mɔgɛ donu kofura a ma ka dɛnkɛninya Yisa ma. Atɛn soe kun-tigi-ba min tɔgɛ Diyonisi, wo ye anu tɛma anubɛ musi min tɔgɛ Damarisi anubɛ mɔgɔ-gbɛrɛkɛnu fanan.