2 Timoti 4 - ALLALA KUMƐ

¹ Yisa Kirasiti wa na ala mansayɛ la tumɛ min, a si mɔgɛ bɛɛ kiti, minnu kɛndɛ wo, minnu faganɛ wo. Ale Yisa anubɛ Alla ye n sere la

² ko ile Timoti ni Allala kumɛ lake ka i kiri a fɔɛ ma. Ni mɔgɛnu ya a bira, ni anu ma a bira, ile ni to a fɔla anu ye tun! I ni mɔgɛnu makuma ka anu makawandi. Kɔnɔ i ni anu karan dinyɛ rɔ

³ bawo wati ye nala, mɔgɛnu ti anu tole masɔ tonyɛ la tun. Anu si bila anu nyɛrɛ-natanu fɛ. Anu si to karan-mɔgɛnu nadɛnna anu nyɛrɛ ye, minnu si anu toleta diyana-koenu fɔ anu ye.

⁴ Anu si anu tole bɔ tonya-kumɛ la ka anu tole masɔ tili gbansannu na.

⁵ Kɔnɔ i ni i nyɛrɛ mara koe bɛɛ rɔ ka i munyu nyagbɛ kɔrɔ. I ni kawandi-bɔ-wɔlɛ kɛ ka i se-koe-bɛɛ kɛ Allala wɔlɛ kɛ rɔ.

⁶ Kɔnɔ nde, nta tumɛ ara ke. N bara ma iko sarakɛ. N bɔ-tumɛ ara ke duninya rɔ.

⁷ N bara n buri-nyimɛ kɛ, ado n bi buri-kɛ min na, n bara ke a dan ma. N bara lanayɛ bɛɛ kɛ.

⁸ Nba kaka, nta duwɛ ye n makɔnɔna. Anu si mansa-telenbagɛta fulɛ di n ma. Duninya-kiti-tɛgɛ-latelennɛ si wo di n ma tele wo ma, Mari, kɔni. A ti a di nde dɔrɔn ma fɔ min bɛɛ ye ale Mari kenina ka a na-koe makɔni.

Timoti Kelanta Makawandili Kumɛ la Pɔli Bolo

⁹ I ni i raya ka na ke n ma yona,

¹⁰ ado Dimasi ara bɔ n fɛ duninya kɛ diyɛla ko la. A ara ta Tɛsalonaika soe burɔ. Karɛsɛn fanan tara Kalesiya nyamanɛ rɔ. Taita tara Dametiya sigisɔn rɔ.

¹¹ Luka kelen pe le ye n fɛ yan. I tenbi nala, i ni na Maraka la i bolo bawo a si ke n dɛnbɛna wɔlɛ la.

¹² N bara Tikika lata Ɛfɛsa soe burɔ.

¹³ I tenbi nala, n ya nna duruki min to Kapasi bolo Taroyasi soe burɔ, na wo la i bolo. I ni na nna bukunu fanan na, katarala sɛbɛli kɛnɛ gbole min ma.

¹⁴ Alɛsanda, siyaki, kɔni, a ya ko-yogoma-ba kɛ n na. Mari si a sara iko ala kɛwɔlɛ ye nya min.

¹⁵ I ni a ma i fɛrɛma alela ko la bawo a ya mala kumɛ masɔsɔ kati!

¹⁶ N ya n fɛka fɔlɔtɛ kɛ tumɛ min, mɔgɔ-wo-mɔgɔ ma sɔ n fɛ. Bɛɛ bɔra n fɛ filili! Alamɛ Alla fonde kana bɔ anu kan ma!

¹⁷ Hali wo, Mari tora n fɛ ka n sɛnbɛ don. Woletɔ n tora Allala kumɛ bɛɛ lakela sibolo-gbɛrɛ bɛɛ ma yan tɔ. N kisira yarɛ dɛ ma.

¹⁸ Nba, Mari ti sɔn ko-yogoma wo ko-yogoma ni ma n na. A si n nadon Arinyɛni tɔ, ale ye mansayɛ la kan min. Gbiliyɛ ni di a ma habadan! Amina.

Kɔndɔli-Labannu Bara-Koe

¹⁹ N bi Purusila anubɛ Akuwila kɔndɔnna anubɛ Onɛsiforala denbayɛ.

²⁰ Irasiti tora Kɔrɛnti soe burɔ. N ya Tarofimasi to Mailita bawo a kirɛ le nun.

²¹ Yanni samɛ ni ke, i raya kati, i ni na. Yubulasi ye i kɔndɔnna anubɛ Pudɛn anubɛ Laina anubɛ Kalodiya anubɛ ma na-kelen-nyɔgɔ-toe bɛɛ fanan.

²² Mari ni i niyi kandan. Allala hinɛ ni to wo dama fɛ.