2 Tɛsalonaika 3 - ALLALA KUMƐ

Alla Matara-Koe Ma Ye

¹ Ala ban, ma na-kelen-nyɔgɛnu, wo ni Alla matara ma ye. Marita kumɛ ni to nyɛnsɛnna tiriya! Wo si a ma, mɔgɛnu ni ata kumɛ gbiliya iko a mara wo tɛma nya min.

² Wo ni tarali kɛ ko Alla ni ma tanka kalabantenu anubɛ ko-yogoma-kɛlɛnu ma bawo bɛɛ ma dɛnkɛninya Mari ma wɛ.

³ Wo si ke lala Mari la ko a si wo sɛnbɛ don ka wo tanka Setanɛ ma.

⁴ Ma lanɛ wole bɛrɛn na Mari rɔ. Ma ya a lɔn ko ma ya min fɔ wo ye, wo ye wo kɛla, ado wo si to wo kɛla dɛɛ!

⁵ Alamɛ Mari ya Allala keninteyɛ yira wo la ka a ma, wo ni wo munyu iko Kirasiti nyɛrɛ.

Bɛɛnubɛ Ata Wɔli

⁶ Ma na-kelen-nyɔgɛnu, ma ye a fɔla wo ye ma Mari Yisa tɔgɛ rɔ ko minnu bara anu ban wɔli-kɛ-koe ma, wo ni fara wonu na feu! Wonu sa mala kumɛ birala, ado male ma anu nabila wo la.

⁷ Male ya min kɛ wo yala, a bɛnnɛ wo ni wo madegen wo ma. Wole nyɛrɛ ya wo lɔn serr! Ma ye wo fɛ tumɛ min kɔrɔma la, ma ma tinya-mansayɛ kɛ mumɛ!

⁸ Ma ma dɔn-fen sɔrɔn mɔgɔ-wo-mɔgɔ bolo ma ma min sarɛ di. Ma tora wɔlila su-ni-tele alako ma kana ma dunɛ sa wo fenfen kuma.

⁹ Ma ma a fɔ ko a ma bɛn ko ma ni dɛnbɛnɛ sɔrɔn wo bolo. Ma wɔlita alako dɔrɔn male nyɛrɛ ni ma misalɛ la wo ye, ado wo ni wo nyɔgɔn kɛ.

¹⁰ Ma ye wo fɛ tumɛ min, ma ko, “Ni min ma wɔlɛ kɛ, wo kana fen dɔn,” ado ma ya tɔn wo lagbɛlɛya wo ye.

¹¹ Ma ye kɛ fɔla wo ye bawo ma ara a lamɔɛn ko mɔgɛ donu bi wo tɛma minnu bi tinya-mansayɛ la, ado wɔli-wo-wɔli sa anu bolo fɔ nafigiyɛ.

¹² Ma ye a fɔla wonu ye Mari Yisa tɔgɛ rɔ ko anu ni kɛ-nya-telennɛ kɛ. Anu ni anuta wɔlɛ kɛ alako anu ni anu nyɛrɛ beli-fan sɔrɔn nya min.

¹³ Kɔnɔ ma na-kelen-nyɔgɛnu, wo kana bandan ko-nyima-kɛ la.

¹⁴ Ma ya kumɛ min sɛbɛ kɛdi kɛ rɔ, mɔgɛ do si taran nyɔ min ti wo bira. Wo ni wo yili to anu ko. Ko-wo-ko kana taran wo tɛma, woletɔ anu si miliya.

¹⁵ N ma a fɔ wo ye ko wo ni anu bira iko wo yogenu kɔnɔ wo ni anu makawandi iko wo na-kelen-nyɔgɛnu.

Kuma Laban

¹⁶ Mari nyɛrɛ min bi yisi-kimɛ dila ma ma, alamɛ wo ya yisi-kimɛ di wo ma tumɛ bɛɛ, nya bɛɛ ma. Mari ni to wo dama fɛ.

¹⁷ Nde, Pɔli le ya kɔndɔli kɛnu sɛbɛ n nyɛrɛ bole la. N si n tɔgɛ sa kɛdi bɛɛ ma ka le, ado wo ma n bolo gbɛ yen?

¹⁸ Ma Mari Yisa, Allata-Mɔgɔ-Yabɔnɛta hinɛ ni to wo dama fɛ.