2 Tɛsalonaika 1 - ALLALA KUMƐ

¹ Nde, Pɔli anubɛ Sailasi anubɛ Timoti le ye kɛdi kɛ sɛbɛla wole, Tɛsalonaika chɔchi-mɔgɛnu ma, ado ma Fa Alla anubɛ ma Mari Yisa, Allata-Mɔgɔ-Yabɔnɛtɛ le wole la.

² Alamɛ ma Fa Alla anubɛ ma Mari Yisa, Allata-Mɔgɔ-Yabɔnɛ hinara wo la ka yisi-kimɛ di wo ma.

Mɔgɛnu Kiti-Koe Mari Na-Tumɛ

³ Ma na-kelen-nyɔgɛnu, ma ye baraka birala Alla ye wolela ko la tumɛ bɛɛ! Wo bɛnta bawo wola dɛnkɛninyɛ ye tola koloyala bɛrɛkɛ! Wola keninteyɛ min bi wo nyɔgɛnu tɛma, wo fanan bi koloyala le kati!

⁴ Wo le ya a to, ma ye wo matɔgɔla Allala chɔchi doinu na ka a tɛgɛ wola munyɛ ma. Wola nyagbɛ wo bɛɛ rɔ, wola dɛnkɛninyɛ ma dasa hali kelen.

⁵ Nyagbɛ wo ye a yirala ko Allala kiti telenta. Nyagbɛ wo le ye a mala, wo ni wo rabɛn ata mansayɛla ko la. Tonyɛ le, wo ye tɔrɔla mansayɛ wola ko la,

⁶ ado minnu bi wole tɔrɔla, yoe ye Alla bolo ka wonu fanan tɔrɔ.

⁷ Wole minnu tɔrɔnɛ, a si sulen di wole anubɛ male fanan ma. Mari Yisa wa na tumɛ min, anubɛ ata melika-sɛnbɛmɛnu, ale Alla si wo tɔrɔlɛnu tɔrɔ

⁸ ta-mɛlan la. A si Alla-lɔnbɛlɛnu tɔrɔ anubɛ minnu ma sɔn ma Mari Yisa, Allata-Mɔgɔ-Yabɔnɛta kibara-nyimɛ bira-koe ma.

⁹ Anu si habadan-tɔrɔyɛ sɔrɔn. Anu ti gbɛrɛn Mari anubɛ ala gbiliya-makawanɛ ma.

¹⁰ Yisa wa na tele min tɔ, kɛ bɛɛ si ma. A si gbiliyɛ sɔrɔn ala mɔgɛnu bolo. Dɛnkɛninya-mɔgɛ-bɛɛ si kawa Yisa ma, ado wole fanan si taran wonu tɛma bawo ma ya kumɛ min fɔ wo ye, wo lara wo bɛɛ la.

¹¹ Wo le ya a to, ma ye Alla matarala wo ye tumɛ bɛɛ. Ma ye a tarala ko a ara wo kele nimaya-su min ma, wo kɛ-nya ni bɛn wo ma. Ko-nyimɛ min bɛɛ kɛ-sɔgɛ ye wo la, alamɛ ata sɛnbɛ ya wo dɛnbɛ wo rɔ ka wola kɛwɔlɛnu dafa.

¹² Ma Mari Yisa tɔgɛ si gbiliyɛ sɔrɔn wo bolo worɔ. Wole fanan si a sɔrɔn mata Alla anubɛ Mari Yisa, Allata-Mɔgɔ-Yabɔnɛta hinɛ baraka rɔ.