2 Samuwɛli 7 - ALLALA KUMƐ

Marita Sarama-Kan Kiri-Koe Mansa Dawuda Ye

¹ Mari ban Mansa Dawuda latankala a yoge bɛɛ ma, mansɛ niyi-labilanɛ tora siginɛ ala bon-kurɛ la.

² Mansa Dawuda ya a fɔ Nɛbi Netan ye ko, “Nde siginɛ bon-hakikɛ min nadannɛ sida kɔlɔma la kɔnɔ Marita tɔn-kenkirɛ wo siginɛ fani-bɔn la.”

³ Netan ya a fɔ a ye ko, “Ni ko-wo-ko ma-sɔgɛ ye i la, wo ma bawo Mari ye i fɛ.”

⁴ Kɔnɔ wulɔn suyi nyɛrɛ rɔ, Mari ya a fɔ Nɛbi Netan ye ko,

⁵ “Ta a fɔ nna wɔli-kɛla Dawuda ye ko ale ti nna bɔn sɔ.

⁶ Kebi n ya Isirɛla mɔgɛnu nabɔ Iyipiti tumɛ min, ha ka a sigi kaka la, ha bi, bato-bon ma sɔ wɛ nde ye n si sigi kan min. Nde duruta sigila fani-bɔn le kɔrɔ belenna.

⁷ N bara tagama min bɛɛsi kɛ Isirɛla mɔgɛnu fɛ, n bara min bɛɛsi ma kun-tigi la ha bi, n ma a fɔ wɛ wo do-wo-do ye ko a ni bato-bon-nyimɛ sɔ n ye kɔlɔma-hakikɛ la.

⁸ “Woletɔ a fɔ Dawuda ye ko nde, Mari Sɛnbɛ-Bɛɛ-Tigi kan le kɛ la. N ko n ya ale bi sagɛnu denu fɛ ka a ma mansɛ la nta mɔgɛnu kun na Isirɛla nyamanɛ, kɔni.

⁹ A tara kan-bo-kan, n bi a fɛ, ado a tara kan-tinɛ min bɛɛsi rɔ, n ya a yogenu nɔ a yarɔ. N si a ma, ala mansayɛ mankan ma ni yɛlɛ duninya rɔ iko tɔgɔlama-wɛ minnu bi duninya rɔ.

^10-11 Nde le ya kan-tinɛ nyini nta Isirɛla mɔgɛnu ye anu si anu sigi kan min, ado n bara ban anu sigi-bole rabɛnna nyɔ, anu yogenu ti ko ma anu na kan min iko a dabirɛ. Kebi anu nara nyamanɛ kɛ rɔ, karagbɛlɛnu bi anu kɛlɛla kɔnɔ wo ti ma tun bawo n bara lanyiri kiri ko n si ale Dawuda latanka a yogenu masibɛ ma ka mamanɛnu di a ma.

¹² Ale Dawuda wa faga tumɛ min, anu ba ban a togonna, n si a ma, ala dan do ni to a gbɛ rɔ min si ala nyamanɛ to fanka rɔ.

¹³ Wo le ye n bato-bɔn sɔla. N si a ma, mansayɛ ti bɔ ala bɔn la mumɛ!

¹⁴ Nde si ma a fa la. Ale si ma nta dan la. A wa ko-yogomɛ ma, nde si a kolo iko fa si ala dan kolo nya min.

¹⁵ Kɔnɔ n ti bɔ a fɛ iko n bɔra Sɔli fɛ nya min. Nde le ya mansayɛ bɔ Sɔli bolo ka a di ale Dawuda ma.

¹⁶ Tɔn ti sigi mamani-koe la, ado mansayɛ ti bɔ a kegeyɛnu bolo muk! Mansayɛ kɛ dan sa!”

¹⁷ Alla ya min bɛɛ fɔ Nɛbi Netan ye, a tara wo bɛɛ rakaran Mansa Dawuda ye.

Baraka Bira-Koe Dawuda Bolo

¹⁸ Mansa Dawuda tara Marita-Fani-Bɔn la. A ya a mayigi dugi ma nyɔ Mari yala ka a madiya ko, “E, n Tigi Mari, i wara ko-nyimɛ min bɛɛ kɛ nde ye, a ma bɛn, malebɛ nna denbayɛ ni wo sɔrɔn.

¹⁹ Kɔnɔ hali wo, i ye sarama-kan kiri-koe rɔ mabɛ nna denbayɛ ye anubɛ minnu ma sɔrɔn bɛ. E, n Tigi Mari, alamɛ hadama-dan ni ko-nyimɛ kɛ iko ile.

²⁰ Mari, nde si nfen fɔ i ye gbɛ? I ya nde, ila wɔli-kɛlɛ lɔn kɔnɔ hali wo, i wara n gbiliya.

²¹ Ile le wara ban kɛ latɛgɛla. I ko fɔ i wa a ma. I wara ko-makawanɛ kɛ damasi ladan de alako ka n karan.

²² E, n Tigi Mari, i makawara. I nyɔgɔn sa! Ka a dabira fɔlɔ ma ha ka a sigi kaka la, ma ya i kelen pe le lɔn Alla la.

²³ Isirɛla mɔgɛnu fanan nyɔgɔn sa! I wara ma kunyɛ labɔ yɔɔnyɛ rɔ ka male ma ile halalɛ la. E, Mari, i ya kabana-koe minnu kɛ ma benbanu ye, wo ya a ma le, ile tɔgɔ tara pɔn, ka ke duninya tɔnkɔn nani bɛɛ rɔ. Ila mɔgɛnu taranta tala yarɔ nya min, i tara anu yogenu gbenna anu yarɔ wo nya na le anubɛ wonuna bɛsɛnu. Ita mɔgɛ le male la, i ya minnu kunyɛ bɔ gbaran rɔ Iyipiti kɛnu bolo, kɔni.

²⁴ I wara male Isirɛla mɔgɛnu ma i halalɛ la tɛban! Ile Mari le mata Alla la.

²⁵ “Nba, Mari Alla, a sɔgɛ ye n na, i ni ila sarama-kan latɔnbagaya mabɛ n kegeyɛnu ye tolon, iko i wara a fɔ nya min nun.

²⁶ Wo si a ma, i mankan ni to koloyala habadan! Duninya-mɔgɛ bɛɛ si a fɔ ko ile Mari Sɛnbɛ-Bɛɛ-Tigi ye Allayɛ la Isirɛla mɔgɛnu kun na, ado i ti mansayɛ bɔ nta bɔn la mumɛ!”

²⁷ “Isirɛla mɔgɛnuta Mari Alla Sɛnbɛ-Bɛɛ-Tigi, ni i ya a yen nde, ila wɔli-kɛlɛ ye i madiyala kɛ nya na kaka, n yili latɛgɛni de bawo ile le wara a sa gbɛ ma n ye ko mansayɛ ti bɔ nna bɔn la.

²⁸ Woletɔ n Tigi Mari, ile le Alla la. I wara sarama-kan-nyimɛ kiri n ye, ado i ti ila sarama-kan fenfen tinya.

²⁹ N bi i madiyala, i ni duwɛ kɛ n kegeyɛnu ye. Wo si a ma, anu ni to ila duwɛ kɔrɔ tuma-wo-tuma. Ile, n Tigi Mari ara sarama-kan kɛ kiri, ado n kegeyɛnu ti foo ila sarama-kan kɛ la mumɛ!”