2 Samuwɛli 5 - ALLALA KUMƐ

Dawuda Ma-Koe Mansɛ la Isirɛla anubɛ Yuda Nyamanɛnu Kun Na

¹ Wo kɔma, Isirɛla mɔgɔ damasi nara Dawuda warɛ Hiburɔn soe burɔ. Anu ya a fɔ a ye ko, “Yele kelen de ma dama la.

² Kebi Mansa Sɔli ye a kɛndɛ la wati min, ile le sɔnɛ ma yarɔ kɛlɛ rɔ, ado Mari ara ban lanyiri kirila i ye nun ko ile le ye sɔla male yarɔ ka ma mala mansɛ la.”

³ Woletɔ Isirɛla kun-tiginu bara a lakiri yisi-kimɛ rɔ gben ka to kan kelen tɔ. Anu ya dantɛgɛ-tuli kɛ Dawuda kunyɛ rɔ ka a ma anuna mansɛ la.

⁴ A sɔrɔn-san bi-sawa nyɔgɛ ma, a mara mansɛ la. Wo kɔma, san bi-nani, a ye mansayɛ la.

⁵ San wɔrɔnfila karɛ wɔrɔ, Dawuda ye mansayɛ la Yuda nyamanɛ rɔ. A siginɛ Hiburɔn soe burɔ. Wo kɔma, a tara sigi Yerusalɛm soe burɔ. San bi-sawa ani san sawa, a ye mansayɛ la Isirɛla anubɛ Yuda kun na.

⁶ Mansa Dawuda anubɛ ala keminɛnu bui-wati kenɛ Yerusalɛm soe ma, Yɛbusi minnu siginɛ nyɔ, wonu miri ko Dawudanu ti anu nɔ. Woletɔ anu ya a fɔ a ye ko, “I ti ke i kunyɛ ladonna mala soe burɔ yan mumɛ! Hali fiyɔn anubɛ namarɛnu denu bi tugula i la.”

^7-9 Tele wo nyɛrɛ rɔ, Mansa Dawuda ya a fɔ ala keminɛnu ye ko, “Mɔgɛ do ye yan tɔ, Yɛbusi kɛnu gbo min ye iko nde, hali ka anu faga? Woletɔ wo ni bɔ yirɔ-kilɛ la ka ta fiyɔn anubɛ namarɛ kɛnu faga.” (Ni i ya a lamɔɛn ko, “Fiyɔn anubɛ namarɛnu ti don Mari Bato-Bɔn la,” kumɛ wo dabirara yan de!) Yɛbusi kɛnuta soe, tarɛ mininɛ min ma, anu ya wo bi anu bolo tumɛ min, Mansa Dawuda sigira nyɔ ka nyɔ kele “Dawudaya.” Nyɔ-tɔgɛ le fanan Sayɔn. Mansa Dawuda ya soe wo lakoloya ka a dabira lɛnbɛn-lɛnbɛnya rakɛ tinɛ tele-bɔɛ wara la ha ka ke tarɛ burɔ so fɔlɔtɛ ma.

¹⁰ Mansa Dawuda tora fanka sɔrɔnna ala mansayɛ rɔ bawo Mari Alla Sɛnbɛ-Bɛɛ-Tigi ye a fɛ.

¹¹ Mansa Hairam min siginɛ Taya soe burɔ, wo ya kilayɛnu nata anubɛ ala bon-sumalɛ donu anubɛ ala bon-tuwalɛ donu alako wonu ni ta Mansa Dawudala bolɔn sɔ. Wonu tamatoe, anu tara anuta nyamanita kɔlɔma-nɛ donu na anu bolo.

¹² Mansa Dawuda ya a lɔn wo le ma ko Mari ara ale le ma Isirɛla mɔgɛnuna mansɛ la, ado a lara a la fanan ko Alla si ala nyamanɛ wo lata yarɔ ka a tɛgɛ Isirɛla mɔgɛnuna ko ma.

¹³ Mansa Dawuda bɔɛ Hiburɔn soe burɔ ka ta a sigi Yerusalɛm soe burɔ, a ya musu-siyaman furu. Wo kɔma, a ya fɛ-sigi-musi donu bi. Wonu fanan ya dan donu sɔrɔn a ye tun.

¹⁴ Musi wonu ya dan minnu sɔrɔn a ye Yerusalɛm, wonu tɔgɛ le kɛnu na, Samowa wo, Sobabu wo, Netan wo, Silamɛni wo,

¹⁵ Ibihari wo, Ilasowa wo, Nɛfɛki wo, Yafaya wo,

¹⁶ Ilasama wo, Ilayada wo, anubɛ Ilafɛlɛti.

Filisitinu Nɔ-Koe

¹⁷ Filisitinu ya a lamɔɛn min kɛ ko Dawuda ara ma mansɛ la Isirɛla nyamanɛ rɔ, anu ya anuna kɛlɛ-dannu nata a bira tinɛ. Mansa Dawuda fanan ya wo lamɔɛn min kɛ, a tara kan-tina-latankanɛ do rɔ.

¹⁸ Filisiti kɛlɛ-dan wonu tara Rɛfayim lɛɛ bira-a-la ka anu daga makɛ nyɔ.

¹⁹ Mansa Dawuda ya Mari manyinika, a ko, “Ni n tara Filisitinu kɛlɛ tinɛ, n si anu nɔ, wa?” Mari ko, “Ɔn, n si a ma, i ni anu nɔ.”

²⁰ Mansa Dawuda tara Filisitinu nɔ kan tinɛ do rɔ anu nara to min kelela ko, “Mari Tugura Anu Kun Na.” Mansa Dawuda ya a fɔ ko, “Mari ara tugu n yogenu kun na iko yi wa fa, wo ye tugula a rɔ nya min.” Woletɔ anu ya kan tinɛ wo tɔgɔ sa “Mari Tugura Anu Kun Na.”

²¹ Filisitinu ya anu buri Mansa Dawuda kɔrɔ tumɛ min, anu ya anuna bɛsɛnu to nyɔ. Mansa Dawudala keminɛnu ya wonu bi ka ta anu tinya.

²² Wo kɔma, Filisiti kɛlɛ-dannu sɛgira Rɛfayim lɛɛ wo bira-a-la tun ka anu daga makɛ nyɔ rɔ tun.

²³ Mansa Dawuda ya Mari manyinika tun anu kɛlɛ-koe rɔ. Mari ko, “I kana anu kɛlɛ dabira yan bara la de! Bɔ anu kɔma kilɛ la pɔpɔ kɔlɔma siyamɛnu bi kan min. I ni anu kɛlɛ dabira nyɔ.

²⁴ Ni i ya kinta-kan lamɔɛn pɔpɔ kɔlɔma-yanbɛ wonu na san ma, i si a lɔn wo rɔ ko nde, Mari ara ta wo yarɔ anu kɛlɛ tinɛ. Wobɛ ila kɛlɛ-dannu si anu kɛlɛ ka anu nɔ.”

²⁵ Mansa Dawuda ya a ma iko Mari ya a fɔ a ye nya min. A bɔra Filisitinu gbenna Kibiyon soe burɔ ha ka ta ke Kisari soe ma. A ye anu kɔma.