2 Samuwɛli 4 - ALLALA KUMƐ

Mansa Isibosɛti Faga-Koe

^1-4 Mansa Sɔlila den Yonatan ya dan do to a kɔma nun, wo tɔgɛ le Mɛfibasɛti. Dan kɛ san loli nyɔgɛ ma, anu ya Yonatan anubɛ a fa Sɔli faga wo le ma. Musi min bi Yonatanna dan makolola, a ya a lamɔɛn wo bolo ko Yonatan anubɛ Mansa Sɔli kunyɛ ara to kɛlɛ rɔ Yɛsɛreli lɛɛ rɔ, wo ya a buri dan wo la a bolo. Kɔnɔ bawo a ye a latiriyala tala, dan wo buira a bolo kilɛ la. Dan wo mara namarɛ la. Sɔlila den Mansa Isibosɛti ya a lamɔɛn min kɛ ko Abina ara faga Hiburɔn soe burɔ, a kilanta dɔgɔma-ma-de! Isirɛla mɔgɛ bɛɛsi kawara wola ko la. Kɛlɛ kun-tigi fila ye Mansa Isibosɛti bolo nun wo wati rɔ. Wonubɛ anuna kɛlɛ-dannu kɛnɛna tala buila mɔgɛnu ma ka anu bolo-fannu bi anu bolo. Kun-tigi wonu tɔgɛ le Beyana anubɛ Rekabu. Anu fa tɔgɛ le Rimɔn. Anu siginɛ Bɛroti soe le burɔ min bi Bɛnyamɛ bɔnsɔn nyamanɛ rɔ. Bɛnyamɛ kɛ kɛnu ya Bɛroti soe kɛ bi min kɛ, mɔgɛ minnu siginɛ Bɛroti soe burɔ nun, wonu ya anu buri ka ta anu sigi Kita soe burɔ. Ha bi, anu siginɛ nyɔ le.

⁵ Rekabu anubɛ Beyana ya a lamɔɛn tumɛ min ko Abina ara faga, anu ya anu nasɔ ka ta Mansa Isibosɛti taran ala bɔn la. Anu kera a warɛ tele-latelen-wati, anu ya a taran, a sanɛ. A ye a niyi madɛnna.

^6-7 Anu ya anu nyɛrɛ ma iko anu bi tala fui-fan do le bi tinɛ bɔn la kɔnɔ anu tara doidoi! Anu ya ale Mansa Sɔlila den taran a sa tinɛ. Anu ya a sɔgɔ a buyi rɔ ka a kunyɛ tɛgɛ a la. Anu tara a kunyɛ wo la anu bolo pon! Anu kira tagamana kudu kilɛ la Yorodan-ba-lɛɛ rɔ.

⁸ Wo wulun sɔgɔma, anu kera Hiburɔn soe burɔ. Anu ya a kunyɛ yira Dawuda la. Anu ko, “I yoge Mansa Sɔli min bi i faga-koe rɔ nun, wola den Mansa Isibosɛti kunyɛ le kɛ la. Mari ara sɔn i tayili-sara-koe ma Sɔli anubɛ a bɔnsɔnnu na bi.”

⁹ Dawuda ya a fɔ anu ye ko, “Mari-nimɛ min bi n nakisila masibɛ ma, n bara n keli wo rɔ.

¹⁰ Keminɛ min nara Mansa Sɔli sa-koe tii n na Sikilagi soe burɔ, wo ya a lɔn ko a nara kuma-nyimɛ le fɔ tinɛ n ye wo la. N ko anu ni a bira ka a faga. Wo nara kuma-nyimɛ min na, wo ya sarɛ sɔrɔn wo le tɔ.

¹¹ Wole min bara kɛ faga, a ma ko tinya, kumana sa wole ma. A ye kinɔgɛ le tɔ a halala bɔn la, wo tara a kunyɛ tɛgɛ a la. Wo ye wo gbɛ min tɔ wo la, n si a tayili sara wo la ka wo ban dugu-kole kɛ kuma.”

¹² Dawuda ya a fɔ ala kɛlɛ-dan donu ye ko anu ni Rekabu anubɛ Beyana faga. Anu ya anu faga ka anu kiannu anubɛ anu bolenu tɛgɛ a la ka anu dun kɔlɔma la Hiburɔn soe kɔma dala-kundi do dafɛ. Anu ya Mansa Isibosɛti kunyɛ wo bi ka a togon Abina kaburu-soe rɔ nyɔ.