2 Samuwɛli 23 - ALLALA KUMƐ

Mansa Dawudala Wɔlɔyiya-Kuma-Labannu

¹ Yɛsila den Mansa Dawuda, Alla ya a ma mɔgɔ-ba-magbilima-wɛ la. Ale Yakobata Alla ya ale Dawuda yabɔ ka a ma mansɛ la. Mansa Dawuda le si sigi-diyamɛnu sa Isirɛla mɔgɛnu ye. Mansa Dawudala wɔlɔyiya-kuma-laban le kɛ la.

² “Marita Ni-Sɛnima kumara n ye. Ala sarakanɛ wo ye n da rɔ.

³ Mata farɛ le Alla la min bi Isirɛla mɔgɛnu natankala. Wo le ya a fɔ ko mansɛ min bi mansayɛ kɛla telenbagayɛ la ka Alla sako kɛ,

⁴ wo mani de iko sun-tele min bi sɔla kunbi la, ado tele anubɛ bandɛ le binyɛ lanɔrɔnna.

⁵ “Alla ara ata duwɛ layigi n kegeyɛnu kuma ka le. A ya habadan-lanyiri kiri n ye. A ya a kiri gben, alako a ma kana na yɛlɛma. N bi nyinina lanyiri wo le dɔrɔn ma. Ni a ya wo latɔnbagaya n ye, wo si nɔlɛ di n ma, ado Alla si wo ma serr!

⁶ Kɔnɔ Alla-lɔnbɛlɛnu mani de iko wɔnɛ, mɔgɔ mako sa min na. Mɔgɛnu ti anu bole tugu anu na.

⁷ Fɔ nɛgɛ, ni wo ma, tanbɛ, anu si anu madɛn wonu denu na ka anu mintan gburr!”

Mansa Dawudata Kɛlɛ-Kurugbɛnu

⁸ Kɛlɛ-kurugba sawɛ minnu madonnɛ Mansa Dawuda la, wonu tɔgɛ le kɛnu na. A fɔlɔtɛ le Yosɛbu-Basɛbɛti la, Takimo kɛ, kɔni. Ale le kɛlɛ-den-kunyɛ la mɔgɔ sawɛ kɛnu tɔ. Lun kelen ale ya mɔgɔ kɛmɛ segin kɛlɛ ka anu damasi faga ala tanbɛ la.

⁹ Wo tatugunnɛ le Dodola den Ɛliyasa la. Aho kebila-mɔgɛ do le Ɛliyasa kɛ la. Lunyɛ do, Filisitinu ya anu nadɛn anu kan ma min kɛ, anubɛ Mansa Dawuda sɔra Isirɛla mɔgɛnu yarɔ ka ta wonu kɛlɛ. Isirɛla mɔgɛnu ya anu masɛgi anu kɔma.

¹⁰ Ale sɔra a gbɛ rɔ gben! A ya Filisitinu matɛgɛ furr, ha a bole kankanta ala faan ma. Mari ya a ma, anu ya nɔ-ko sɔrɔn wulɔn tele rɔ. Kɛlɛ kanɛ a la, Isirɛla mɔgɛnu tara ale Ɛliyasa taran alako anu ni furi wonu bolo-fannu bi.

¹¹ A sawa nyɔgɛ le Agila den Sama la, Hara kɛ, kɔni. Lunyɛ do, Filisitinu ya anu kundɛn anu kan ma tun Gbaga-Gbaga-Koloya soe dafɛ anuna sɔsɛnu kinɛ kan min. Isirɛla mɔgɛ toenu ya anu buri anu kɔrɔ.

¹² Kɔnɔ Sama ya a sɔ gben, ka dugi wo kumafunfan. A ya Filisiti mɔgɔ-siyaman faga. Mari ya a ma, anu ya nɔ-ko sɔrɔn wo rɔ.

¹³ Dɔn-fen-tɛgɛ-wati gbɛrɛnnɛ, kɛlɛ-kurugba sawɛ kɛnu tara Adulam faran la Mansa Dawuda dogonnɛ kan min. Wati kelan wo rɔ fanan, Filisitinu nara anu daga makɛ Rɛfayim lɛɛ rɔ.

¹⁴ Wati wo rɔ, Mansa Dawuda ye kan-tina-latankanɛ wo rɔ. Filisiti donu bara ta Bɛtalehɛm soe bira-a-la.

¹⁵ Mansa Dawuda warɛ-sɔgɛ ya a bira, a ko, “Kɔlɔn min sinnɛ Bɛtalehɛm soe tarɛ-don-dɛ dafɛ, ni mɔgɛ do nara wo yi do la n ye kaka, wo si diya n ye kosɛbɛ!”

¹⁶ Kɛlɛ-kurugba sawɛ kɛ minnu tara Mansa Dawuda taran nyɔ, wonu ya anu taya ha anu tenbira Filisitinu tɛma. Anu tara yi bi kɔlɔn wo rɔ Bɛtalehɛm tarɛ dafɛ. Anu sɛgira yi wo la anu bolo mansɛ wara. Kɔnɔ Mansa Dawuda ma sɔn yi wo minna fɔ ka yi kimɛ wo labɔn Mari ye.

¹⁷ A ko, “Mari, n ti yi kɛ min. Ni n ya yi kɛ min, a mani de worɔ iko mɔgɔ sawɛ kɛ minnu bara anu niyi fili ka ta yi kɛ bi, n bara wonu yele le min.” A ma sɔn yi wo min-koe ma. Kɛlɛ-kurugba sawɛ kɛnu ya ko-makawanɛ kɛnu denu ma.

^18-19 Yohabu dɔgɔ Abisayi minnu na tɔgɛ Sɛruya, wo le ye kɛlɛ-kurugba bi-sawɛ kɛnu kun na. Abisayi wo le ya mɔgɔ kɛmɛ sawa faga ala tanbɛ la. Wo le ya a ma, ale tɔgɔ bɔra mɔgɔ bi-sawa kɛnu tɛma ka ma anuna kun-tigi la. Kɔnɔ ale ma tɔgɛ sɔrɔn iko mɔgɔ sawɛ kɛnu.

²⁰ Yɛhoyadala den Bɛnaya, Kabisili kɛ, kɔni, kɛlɛ-kɛla-wɛ do le ale fanan na. Ale fanan ya kerinteya ko-siyaman kɛ. Mohabu kɛnuna kɛlɛ-kɛla-nyana mɔgɔ fila ye nyɔ, ale ya wonu faga. Lun kelen kima-wati rɔ, ado dugi manamanɛ, a donta denkɛ la ka yara kelen faga nyɔ.

²¹ Lunyɛ do fanan tun, a tara kɛ Iyipiti-kei-belebele-wɛ do ma ala gbeleka-kundi la. Tanbɛ ye Iyipiti kɛ wo bolo la. Bɛnaya ya wola tanbɛ bɔ a bolo ka wo faga wo la.

²² Bɛnaya ya kerinteya-koe kɛ le ma kɛlɛ-kurugba bi-sawɛ kɛnu tɛma.

²³ A ya gbiliyɛ sɔrɔn mɔgɔ bi-sawɛ kɛnu tɛma kɔnɔ ale ma ke mɔgɔ sawɛ wonu tɔ. Mansa Dawuda ya ale ma a makandanna kun-tigi la.

²⁴ Mɔgɔ bi-sawa nyɔgɛ wonu tɔgɛ le kɛnu na, Yohabu dɔgɔ, Asahɛli, Dodola den Ɛlihenan ka bɔ Bɛtalehɛm soe burɔ,

²⁵ Sama anubɛ Ɛlika ka bɔ Harod tenke wara la,

²⁶ Hɛlɛsi ka bɔ Pelɛti soe burɔ, Ikisila den Aira ka bɔ Tekoya soe burɔ,

²⁷ Abiyɛsa ka bɔ Anatɔti soe burɔ, Mɛbuna ka bɔ Husa soe burɔ,

²⁸ Salamona ka bɔ Aho soe burɔ, Maharayi ka bɔ Nɛtofa soe burɔ,

²⁹ Bayanala den Hɛlɛbu ka bɔ Nɛtofa soe burɔ, Rebayila den Itayi ka bɔ Kibiya soe burɔ Bɛnyamɛ bɔnsɔn nyamanɛ rɔ,

³⁰ Bɛnaya ka bɔ Pairetɔn soe burɔ, Hidayi ka bɔ Keyasi soe wo lɛɛnu bara la,

³¹ Abi-Abɔn ka bɔ Araba soe burɔ, Asamafɛti ka bɔ Bahurim soe burɔ,

³² Ɛliyaba ka bɔ Salibona soe burɔ, Yasanla dannu, Yonatan,

³³ Sama ka bɔ Hara soe burɔ, Sarala den Ahiyamu ka bɔ Hara soe burɔ,

³⁴ Ahasabayila den Ilifɛlɛti ka bɔ Meyaka soe burɔ, Ahitafɛlila den Ɛliyamu ka bɔ Kailo soe burɔ,

³⁵ Hɛsirɔ ka bɔ Kamɛli soe burɔ, Parayi ka bɔ Arabu soe burɔ,

³⁶ Netanla den Ikali ka bɔ Soba soe burɔ, Bani ka bɔ Kadi bɔnsɔn nyamanɛ rɔ,

³⁷ Sɛlɛki ka bɔ Amonuna nyamanɛ rɔ, Naharayi, Yohabula kɛlɛ-miran-madununɛ ka bɔ Birɔti soe burɔ,

³⁸ Aira anubɛ Karɛbu ka bɔ Yatiri soe burɔ,

³⁹ Yuraya ka bɔ Hitanuna nyamanɛ rɔ. Anu bɛɛ lakofunɛ, kɛlɛ-kurugba mɔgɔ bi-sawa ani wɔrɔnfila.