2 Samuwɛli 22 - ALLALA KUMƐ

Kulan Fɔ-Koe Dawuda Bolo

¹ Mari ya Mansa Dawuda kisi Mansa Sɔli anubɛ a yoge doinu ma tumɛ min, ale Dawuda ya bɛti bɔ Mari ye.

² A ko, “Mari le nna tankalɛ la. Nna tarɛ le ale la, n si kisi ale le tɔ. Ale le si n tanka ko-yogomɛ ma.

³ Nta farɛ le Alla la n si n dogon min kɔma. A si n nakanan iko nɛgɛ-walan. Nna kɛlɛ-kɛlɛ le ale la min si n kisi.

⁴ N ba Mari rakele tumɛ min, a si n kisi n yogenu ma. N si Mari tanto!

⁵ “Sayɛ tora n nafoola. Lakira tora n nakilanna.

⁶ Saya-masibɛ tora n nafoola. Kanbɛ ya gbɛrɛ lasigi n ye.

⁷ N bi yakɔrɔ-mamɔɛ wo la n bolo tumɛ min, n ya nta Mari Alla rakele alako a ni n dɛnbɛ. A ya n kan wo lamɔɛn ata Bato-Bon-sɛnimɛ la. A ya a wɔlɔ matɔlɔ n di-kɛ-kan la.

⁸ “Marita fondo-bɔɛ ya a ma, dugu-kole ramagara ka yɛrɛyɛrɛn. A ya kɔnkɛnu kuru makɛ tinɛ layɛrɛyɛrɛn.

⁹ Bawo a fonde bɔnɛ, a mara iko ta-sisi le ye bɔla a sunyɛ rɔ. A mara fanan iko ta-mɛlan le ye bɔla a karɛ rɔ. Wo damasi mara bawo a fonde bɔnɛ.

¹⁰ A ya san-kole rafara. A yigira ka sɔ banda-finyɛ kuma.

¹¹ A sigira melika sufa do la. Wo tora a buri-wɛ kɛla a la fɔnyɔ rɔ duninya kuma.

¹² A ya pinpi lamɔrɔmɔrɔ a nyɛrɛ ma. A lafoonɛ banda-fin-digidigi-wɛ la.

¹³ San-sɛrɛn-balubalu-wɛ ye bɔla wo rɔ. Wo si banda-kole anubɛ ta-yolenu pusen tala. Wonu bi buila banda-fin-digidigi-wɛ rɔ.

¹⁴ “Mari Min Bi Fan Bɛɛ Kuma, a kan ye bɔla san-kole rɔ iko san gbalamɛ.

¹⁵ Mari ya san-sɛran lakɛ a yogenu ma iko kalabɛn ka anu tanyɛnsɛn.

¹⁶ Mari nyɛɛra a yogenu ma tumɛ min ka anu makuma, ma ya kɔgɔ-yi duma kole anubɛ dugi kuru-kɛ-tinɛ yen ma yɛ la.

¹⁷ “Mari ya a kɔɛn lata ka n songban nna yakɔrɔ-mamɔɛ rɔ.

¹⁸ A ya n natanka n yogenu ma minnu tagbɛlɛ n ko, ado n gbo anu ye kati!

¹⁹ Kɔndɔfili ye n ma wati min, n yogenu buira n ma kɔnɔ nta Mari ya n nakanan wulɔn.

²⁰ A ya n bɔ gbalo rɔ ka n nakanan bawo n bara-koe di a ye.

²¹ “Mari ya n sara nta telenbagayɛla ko la. A ara ata duwɛ layigi n kuma bawo fɛɛ sa n na.

²² N ya Marita tɔn bɛɛ bira, ado n ma n kan-kɔ sɔ nta Alla la.

²³ N ma Marita sereya fenfen bɔ a gbɛ rɔ, ado n ma ala tɔn tinya bɛ.

²⁴ A ya a lɔn ko fɛɛ sa n na, ado n bara n nyɛrɛ mara hakɛ-kɛ-koe ma.

²⁵ Nna telenbagayɛ le ya a ma, Mari ye n sarala, ado a ya a lɔn fanan ko fɛɛ-wo-fɛɛ sa n na.

²⁶ “Ni min ya a telen Mari ye, Mari si a telen wo tigi ye. Fɛɛ sa mɔgɛ min na, ale si ko-nyimɛ le dɔrɔn kɛ wo ye.

²⁷ Mɔgɛ min sɛninyanɛ, Mari si kun-nadiyɛ le kɛ wo tigi ye. Mɔgɛ min karagbɛlɛ, ale si a lagbɛlɛya wo tigi kuma.

²⁸ Mɔgɛ min famayiginɛ, ale le wo lakisila. Kɔnɔ ni mɔgɛ min wasira, a si wo wara-koe mayigi.

²⁹ “E, Mari, nta waan le ile la. Ile le si n to gbɛ rɔ ka pinpi gben n fɛ.

³⁰ I si n yogenu nɔ-sɛnbɛ di n ma. Ile Alla le ye a mala, n ni yɛlɛ n yogenuna tarɛ ma ka ta anu kɛlɛ.

³¹ “Mata Allala ko-ladan-nyanu telenta. Fɛɛ-wo-fɛɛ sa ala kumɛnu na. Ale manɛ nɛgɛ-walan la wonu ye min bi kisi tinɛ nyinina ale bolo.

³² Mari kelen pe le Alla la. Yon si ma kumafunfan Alla kɔma?

³³ Alla le si fanka di n ma. Ale le si kilɛ diya n na.

³⁴ Ale le si a ma, n kian ra ni tɛgɛ dugi ma iko mina. Hali n bi kɔnkɛnu tɛma, a ya n sɔ-bole rabɛn.

³⁵ Ale le ya n bole kolo kɛlɛ-kɛ-tinɛ. Hali kalabɛn min nadannɛ silɛɛ la, n si ke a rasaganna ka a lakɛ.

³⁶ “E, Mari, i wara n nakanan. I wara n dɛnbɛ woletɔ n bara ma tɔgɔlamɛ la.

³⁷ E, Mari, i wara kilɛ rabɛn n ye, n si tagama kan min woletɔ n ma bui.

³⁸ N tora n yogenu sagaranna ka anu nɔ. N ma sɛgi muk, fɔ n ya anu nato min kɛ dogbe!

³⁹ N ya anu gbesi dugi la. Anu ma ke anu nasɔla tun. Anu tora sani n kɔrɔ.

⁴⁰ E, Mari, ile le ya ila sɛnbɛ ma n makiri-fan la ha n yogenu buira n kɔrɔ ka anu nyɛrɛ latenbi n ma.

⁴¹ I ya a ma, n yogenu ya anu buri n kɔrɔ. Wo le ya a ma, n ya anu kasara.

⁴² Anu bi anu dɛnbɛnɛ nyinina kɔnɔ anu ma anu dɛnbɛna sɔrɔn. Hali anu ya ile Mari rakele, i ti i wɔlɔ matɔlɔ anu na.

⁴³ N ya anu bunden iko fɔnyɔ ye tala gbangban min na. N ya anu tadon iko bore min bi kilɛ la.

⁴⁴ “Nta mɔgɛ minnu murutiyara n ma, i ya n nakisi wonu masibɛ ma. I ya a ma, n tora mansayɛ la nyamanɛnu kun na. Hali n ma sibole minnu lɔn nun, wonu bara anu nyɛrɛ latenbi n ma kaka.

⁴⁵ Sibolo-gbɛrɛ minnu ba n tɔgɛ lamɔɛn, wonu si anu madu n kɔrɔ ka anu bole sa anu dɛ la kilan bolo.

⁴⁶ Yigi-tɛgɛ ya a ma, anu yɛrɛyɛrɛnmatoe bɔra anu dogon-kɛ-tinɛnu tɔ kumakɔɛ bolo.

⁴⁷ “Ale Mari ye nyɔ. Nta farɛ le ale la min si n kandan. Ale Alla min makawara, min ya n nakisi, a bɛnta n ni ale matɔgɔ!

⁴⁸ Ale le ye a mala, n bi n yogenu nɔla ka sibolo-gbɛrɛnu don nna sɛnbɛ kɔrɔ.

⁴⁹ Ale le ye n bɔla n yogenu bole la ka n nafɛrɛ. “E, Mari, i ye a mala, n bi nɔ-ko sɔrɔnna n yogenu ma. I ye n nakananna karagbɛlɛnu masibɛ ma.

⁵⁰ N si sigi sa ka i matɔgɔ duninya yala. N bi tantoli-bɛti bɔla i ye.

⁵¹ Ale Alla le ye a mala, nde ata mansa-yabɔnɛ ni nɔ-ko sɔrɔn. A ye ata keninteyɛ yirala nde, Dawuda anubɛ n kegeyɛ la burubukai!”