2 Samuwɛli 20 - ALLALA KUMƐ

Siba Murutiya-Koe Mansa Dawuda Ma

¹ Bikirila den kalabante Siba siginɛ Kiligali soe burɔ, ado Bɛnyamɛ bɔnsɔn-mɔgɛ do le ale la. Siba ya buri fɛ ka Isirɛla mɔgɛnu nadɛn. A ya a fɔ ko, “Ma ni ma bɔ Dawuda fɛ. Ma sa Yɛsila den Dawuda kɛ fɛ. Ma sɛgi wona ma warɛnu tɔ bawo male Isirɛla mɔgɛnu, mata mumɛ sa Dawuda wara-ko rɔ.”

² Isirɛla mɔgɛ bɛɛ bɔra Mansa Dawuda fɛ ka bila Siba fɛ kɔnɔ Yuda nyamanita-mɔgɛnu tora Mansa Dawuda fɛ. Woletɔ ka a bi Yorodan bɛ ma ha ka ta ke Yerusalɛm soe rɔ, Yuda bɔnsɔn-mɔgɛnu denu dɔrɔn bilara Mansa Dawuda fɛ.

³ Mansɛ ke ala bolɔn la Yerusalɛm soe burɔ, a ya ala bolɔn wo to a fɛ-sigi-musu mɔgɔ tan minnu bolo, a ya anu to birɛ rɔ anu siyi-tele-bɛɛ kɔrɔ. Wonu ma fenfen ban a bolo kɔnɔ a ma sɔn kila wonu bara tun. Wonu tora sigini anu dan na wo nya na le iko kɛɛ-musu-magboyanɛnu.

⁴ Mansa Dawuda ya a fɔ Amasa ye, ala kɛlɛ-den-kunyɛ, kɔni, a ko, “Ta Yuda mɔgɛnu kundɛn. I ni na anu na sina matenbi.”

⁵ Amasa tara Isirɛla mɔgɛnu kele tinɛ kɔnɔ a ma sɛgi nyɔ-mansɛla lɔgɔ sanɛ ma.

⁶ Ale mansɛ ya a fɔ Abisayi ye ko, “Siba kɛta nanparan ye tenbila le Abasalɔmtɛ la. Nna kɛlɛ-dannu bi, wo ni a sagaran. Ni wo ma, a si ta soe donu bi tarɛ mininɛ minnu ma, ado a masɔrɔn-koe si gbɛlɛya ma bolo.”

⁷ Yohabula kɛlɛ-dannu, anubɛ mansa-makandannɛnu, anubɛ kɛlɛ-dan minnu bilanɛ Abisayi fɛ, wonu bɔra Yerusalɛm soe burɔ ka ta Siba bira tinɛ.

⁸ Anu ke fara-wɛ do ma Kibiyon soe dafɛ, ale Amasa bɛnta anu na nyɔ rɔ. Wo ya a taran, Yohabu mabɛnnɛ kɛlɛ-kɛ-koe la. Ala solomuri ye a lɛɛ rɔ. Wo kirinɛ a bu tɛma. Kɔnɔ Yohabu ye gbɛrɛnna a ma tumɛ min, ala solomuri bɔra a lɛɛ rɔ ka bui.

⁹ Yohabu ya Amasa kɔndɔn. A ko, “N bɔ, tana sa i la?” A ya Amasa bira a buyɛ ma a bolo nyimɛ la ka a nyɛrɛ ma iko a ye a sunbula le.

¹⁰ Kɔnɔ Amasa hɛnkili sa solomuru ma Yohabu bolo-maran rɔ. Yohabu ya a sɔgɔ a buyi rɔ. A nugi ladɛnta dugi ma. A ma wo ma iko fila. Amasa kimara yen! Wo kɔma, Yohabu anubɛ a dɔgɔ Abisayi fanan ya Siba sagaran dabira.

¹¹ Yohabula kɛlɛ-dan do sɔra Amasa furi dafɛ. A ya a kan mayɛlɛ, a ko, “Ni mɔgɛ minnu bi Yohabu anubɛ Mansa Dawuda fɛ, wo ni bila Yohabu fɛ.”

¹² Amasa tora sani a yele tɛma kila-kole la. Yohabula kɛlɛ-dan min ya kumɛ wo fɔ, wo ya a yen ko mɔgɛ bɛɛsi ara na sɔ furi wo dafɛ. Woletɔ a ya furi wo sagan ka a bɔ kila-kole la ka ta a sa binyɛ rɔ. A ya fanɛ do burun a ma.

¹³ A ya furi wo bɔ kilɛ la nya min wo, kɛlɛ-dannu bilara Yohabu fɛ. Anu tara Siba sagaran tinɛ.

¹⁴ Kɔnɔ wo ya a taran, Siba ara bɔ Isirɛla nyamanɛ kan tinɛ bɛɛ rɔ. A ke Ebɛli-Bɛti-Meyaka soe dafɛ, a fa Bikiri kebila-mɔgɛnu ya anu kundɛn nyɔ. Anu donta soe wo burɔ anu nyɔgɔn fɛ.

¹⁵ Yohabula kɛlɛ-dannu ya a lamɔɛn min kɛ ko Siba ye nyɔ rɔ, anu tara bui soe wo ma. Anu ya bɔnkɛ ladɛn tarɛ kɔma alako anu ni yɛlɛ tarɛ ma ka yigi a burɔ. Wo kɔma, anu ya denkɛ sin tarɛ kɔrɔ alako tarɛ wo ni bui.

¹⁶ Kɔnɔ musu-hɛnkilimɛ do ye soe wo burɔ. Wo ya Yohabu rakele ko, “Wo ni wo tole masɔ. Wo ni Yohabu kele n ye. A ni na. Kuma ye n bolo, n bi min fɔla a ye.”

¹⁷ Yohabu nanɛ, a ya a manyinika, a ko, “Yohabu le ile la?” Yohabu ko, “Ɔn.” Musi wo ko, “N fa, i si i tole masɔ n na?” Yohabu ko, “Awa, n bara na, n tole masɔnɛ.”

¹⁸ Musi wo ya a fɔ Yohabu ye ko, “Fɔlɔ nun, anu kɛnɛna a fɔla ko, ‘Wo ta tonya nyini tinɛ Ebɛli soe burɔ,’ ado wo mara le.

¹⁹ Mala soe kɛ, Isirɛla nyamanɛ kun-bira-soe le, yisi-kima-soe le, ado a so-burɔ-mɔgɛnu kan-kelen-tigi le anu na Isirɛla mɔgɛnu ye. Nfenna wo ye soe kɛ tinya-koe rɔ? A sɔgɛ ye wo la, wo ni Marita soe kɛ tinya?”

²⁰ Yohabu ya a fɔ a ye ko, “Ade, ma ti wo ma,

²¹ ado ma miriya ma wo la. Bikirila den Siba min bɔnɛ Ifɛrɛmta kɔnkɔ-nyamanɛ rɔ, wo le wara murutiyɛ lawuli Mansa Dawuda kan ma. Ni wo ya wo don ma bolo, ma si bɔ wola soe kɛ dafɛ.” Musi wo ya a fɔ a ye ko, “Tana ma wo la. Ma si a kunyɛ lafili wo ma tarɛ kɔma yan.”

²² Musi wo tara kɛwuya-kumɛ wo fɔ so-burɔ-mɔgɛ bɛɛ ye. Anu tara Siba kunyɛ tɛgɛ a la ka a lakɛ Yohabu ma tarɛ kɔma. Yohabu ya kɛlɛ-buri fɛ alako anu ni bɔ nyɔ. Anu sɛgira anu barɛnu tɔ. Yohabu tara Mansa Dawuda wara Yerusalɛm.

Mansa Dawudala Mɔgɔ-Banu Wara-Koe

²³ Yohabu le ye Isirɛla kɛlɛ-dannu kun na. Yɛhoyadala den Bɛnaya, wo le Mansa Dawuda makandannɛnu kun na.

²⁴ Adonaram, wo le ye ala yɔɔnnu kun na. Ahiludila den Yɛhosafati, Isirɛla mɔgɛnuna kuma-kɔrɔ-sɛbɛnɛnu, wo le ye wonu namarala.

²⁵ Mansɛla kɛdi-sɛbɛlɛ le Sifa la. Saraka-masɔla-wɛ le Sedoki anubɛ Abiyatari la.

²⁶ Aira min bɔra Yeyaya soe burɔ, saraka-masɔlɛ do le wo fanan na.