2 Samuwɛli 2 - ALLALA KUMƐ

Dawuda Ma-Koe Mansɛ la Yuda Nyamanɛ Rɔ

¹ Dawuda ban saya-tolon kɛla, a ya Mari manyinika. A ko, “N ni ta sigi soe do kun na wo rɔ Yuda nyamanɛ rɔ, wa?” Mari ko, “Ɔn!” Dawuda ko, “Soe nyamintan ye wo la?” Mari ko, “Hiburɔn soe.”

² Dawuda tara ala musu filɛ la a bolo Hiburɔn soe burɔ, Ahinowan anubɛ Abigɛli, kɔni. Ahinowan bɔra Yɛsɛreli soe burɔ anubɛ Abigɛli, Nebalila musu-tonɛ bɔra Kamɛli soe burɔ.

³ Wo kɔma, a tara ala keminɛ wonubɛ anuna denbayɛnu na a bolo. So-mɛsɛ minnu bi Hiburɔnna foolɛ rɔ, anu tara anu sigi wonu tɔ.

⁴ Yuda bɔnsɔn-mɔgɛnu nara ka Dawuda ma mansɛ la. Dawuda ya a lamɔɛn min kɛ ko Yɛbusi kɛ minnu bi Kaliyadi nyamanɛ rɔ, wonu bara Mansa Sɔli togon,

⁵ a ya kilayɛ donu nata nyɔ. A ko, “Alamɛ wo ya Marita duwɛ sɔrɔn bawo wo ara wola mansɛ gbiliya ka a togon.

⁶ Alamɛ Mari tora wo fɛ ka to ko-nyimɛ kɛla wo ye. Nde fanan si wo bira boloko-nyimɛ-kɛ ka a tɛgɛ wo ara min nadan.

⁷ Wola mansɛ Sɔli ara so-mayɛlɛma-kɛ. Anu bara nde sigi a gbɛ rɔ Yuda nyamanɛ rɔ. Woletɔ wo ni wo yisi gbɛlɛya ka wo kerinteya.”

Isibosɛti Ma-Koe Mansɛ la Isirɛla Nyamanɛ Rɔ

⁸ Mansa Sɔlila kɛlɛ-den-kun-tigi, Nɛrila den Abina, wo ya a buri Mansa Sɔlila dan do la a bolo min tɔgɛ Isibosɛti. Anu tara Yorodan bɛ kɔgɔma ka ta anu sigi Mahanayim soe burɔ.

⁹ Abina ya wo ma mansɛ la ka a sigi Isirɛla nyamanɛ bɛɛ kun na, katarala Kaliyadi anubɛ Asɛra anubɛ Yɛsɛreli anubɛ Ifɛrɛm anubɛ Bɛnyamɛ nyamanɛnu ma.

¹⁰ A sigira mansayɛ la a san bi-nani nyɔgɛ le ma. San fila pe, a ya wo le bɔ mansayɛ la. Kɔnɔ Yuda bɔnsɔn-mɔgɛnu sɔnɛ Dawuda fɛ gben!

¹¹ San wɔrɔnfila karɛ wɔrɔ, a ye Yuda nyamanɛ kun na Hiburɔn soe burɔ.

Kɛlɛ Kɛ-Koe Isirɛla Mɔgɛnu anubɛ Yuda Mɔgɛnu Tɛma

¹² Abina anubɛ Mansa Isibosɛtita kɛlɛ-dan donu bɔra Mahanayim soe burɔ ka ta Kibiyon soe burɔ.

¹³ Yohabu na tɔgɛ le Sɛruwa. Ale Yohabu anubɛ Dawudata keminɛ donu tara dala-kundi do dafɛ. Yohabunu sigira a tɔnkɔn doi rɔ, Abinanu sigira a tɔnkɔn doi fanan tɔ.

¹⁴ Abina ya a fɔ Yohabu ye ko, “Ma ni mala kɛlɛ-dan donu nabɔ, anu ni solomurila kɛlɛ-kɛ ka a lɔn ni min si a ta-nyɔgɛ nɔ.” Yohabu fanan sɔnta wo ma.

¹⁵ Mɔgɔ tan-ni-fila bɔra Bɛnyamɛ bɔnsɔn rɔ alako wonu ni kɛlɛ kɛ Mansa Isibosɛti ye. Mɔgɔ tan-ni-fila fanan bɔra Dawudata keminɛnu tɔ.

¹⁶ Anu yatɛ bɛnta mɔgɔ mogan-ni-nani ma. Bɛɛ ya a ta-nyɔgɔ bira a kan-kɔlɔma ma. Bɛɛ ya ata solomuri sɔrɔngbɔ fanan a ta-nyɔgɛ tɔnkɔn rɔ. Anu dama fagara anu nyɔgɔn fɛ nya-kun-kelen. Woletɔ anu ya kan tinɛ wo tɔgɔ sa Solomuru-Dugu.

¹⁷ Tiriyante wo rɔ, kɛlɛ-belebele buira anu tɛma. Dawudala keminɛnu ya Abina anubɛ Isirɛla kɛlɛ-dannu nɔ.

¹⁸ Sɛruwala den mɔgɔ sawɛ ye nyɔ nun. Wonu tɔgɛ le Yohabu anubɛ Abisayi anubɛ Asahɛli, ado Asahɛli wo ye a burila iko woyan.

¹⁹ Asahɛli wo ya Abina gben.

²⁰ Abina ya a yɛ lasɛgi a kɔma ka Asahɛli mafɛlɛn. A ya a manyinika, a ko, “Asahɛli le ma ile la?” Asahɛli ya a labira, a ko, “Ɔn!”

²¹ Abina ya a fɔ a ye ko, “I bɔ nde fɛ. Bila kɛlɛ-dan do fɛ. I ni wola bolo-fannu bi a bolo.” Kɔnɔ Asahɛli ma sɔn a bɔla a fɛ.

²² Abina ya a fɔ a ye tun ko, “I bɔ nde fɛ. Ni n ya i faga, n si nfen fɔ i kɔrɔ Yohabu ye?”

²³ Kɔnɔ Asahɛli ma sɔn a bɔla a fɛ. Woletɔ Abina ya ala tanbɛ lasɛgi a kɔma ka keminɛ wo sɔgɔ a buyi rɔ. Tanbɛ wo bɔra a kɔma. Asahɛli wo buira nyɔ, a niyi bɔra. Abinala kɛlɛ-dan min ba ke ale Asahɛli furi ma, wo si sɔ doni ka a mafɛlɛn, a ni na to tenbila.

²⁴ Furi wo na-kelen-nyɔgɔn filɛ Yohabu anubɛ Abisayi, wonu ya ale Abina sagaran. Tele-kolo-wulan ma, anu kera Ama kɔnkɛ ma min bi Kiya soe tele-bɔɛ wara la. Kibiyon dugu-magbalanɛ-rɔ-kilɛ ye nyɔ le.

²⁵ Bɛnyamɛ bɔnsɔn-mɔgɛnu ya anu nadɛn Abina fɛ kɔnkɛ wo kuma ka anu sɔ-bole rabɛn.

²⁶ Abina ya Yohabu rakele, a ko, “A sɔgɛ ye i la, ma ni to kɛlɛ kɛla burubukai? I ma a lɔn ko kɛlɛ-laban ma fenfen na fɔ koninteyɛ? I ti a fɔ ila keminɛnu ye ko anu ni fara ma la, ado ma dama na-kelen-nyɔgɔma-gbansan de?”

²⁷ Yohabu ya a fɔ a ye ko, “N bara n keli Alla-nimɛ rɔ, ni i ma kuma sufa kɛ fɔ nun, ma ti bɔ i kɔma ha sina sɔgɔma.”

²⁸ Yohabu ya kɛlɛ-buri fɛ alako anu ni fara anu kɛlɛ-nyɔgɛ kɛnu gbenna. Kɛlɛ banta anu tɛma.

²⁹ Abina anubɛ ala kɛlɛ-dannu kira tagamana Yorodan-ba-lɛɛ wo rɔ ha bandɛ kara. Anu ya Yorodan bɛ tɛgɛ ka to tagamana ha anu tara ke anu barɛ Mahanayim soe burɔ.

³⁰ Yohabu fanan ya ala kɛlɛ-dannu kundɛn tumɛ min, a ya a yen, hali a dɔgɛ Asahɛli bɔnɛ a la, ala kɛlɛ-dan mɔgɔ tan-ni-kɔnɔntɔ ara tunu.

³¹ Kɔnɔ Yohabuta kɛlɛ-dannu ya mɔgɔ kɛmɛ sawa ani mɔgɔ bi-wɔrɔ (360) faga Abinata kɛlɛ-dannu tɔ, Bɛnyamɛ bɔnsɔnnu, kɔni.

³² Yohabu anubɛ ala kɛlɛ-dannu ya Asahɛli furi bi ka ta a togon anuna kebila-kaburu-soe rɔ min bi Bɛtalehɛm kɔma. Wo kɔma, anu denu fanan kira tagamana kudu! Anu tara ke Hiburɔn soe ma sɔgɔma.