2 Samuwɛli 17 - ALLALA KUMƐ

Ahitafɛli Sɔsɔ-Koe Husayi Bolo

¹ A ma mɛ wo kɔma, Ahitafɛli ya a fɔ Abasalɔm ye tun ko, “A ma, n ni kɛlɛ-dan mɔgɔ waga tan-ni-fila (12,000) bi. N ni i fa Dawuda sagaran bi suyi rɔ.

² A bandannɛ tenbi, a yisi tinyanɛ, ma ni a kɛlɛ wati wo rɔ. A si kilan, ado ala kɛlɛ-dannu si anu buri. Nde si ale mansɛ kelan bira ka a faga.

³ Wo kɔma, n si ala kɛlɛ-dan damasi bi dɔngbɔ-dɔngbɔ ka na anu to i ma iko musi tenbi sɛgila ala kei-kɔrɛ ma. Bawo i ye mɔgɔ kelen de kunyɛ lanyinina, a toe wonu si kisi.”

⁴ Abasalɔm anubɛ Isirɛla mɔgɔ-banu ya makawandili-kumɛ kɛ bira anu bolo filɛ la.

⁵ Abasalɔm ya a fɔ anu ye ko, “Nba, wo ni Husayi fanan kele. Ma ni a lɔn ale fanan bi min fɔla.”

⁶ Husayi kenɛ anu ma, Abasalɔm ya ale fanan manyinika. A ko, “Ahitafɛli ara kumɛ kɛ le fɔ ma ye. Ile ko kama wo rɔ?”

⁷ Husayi ya a fɔ anu ye ko, “Ahitafɛli ara kumɛ min fɔ kɛ la, ma kana wo bira wona.

⁸ Bɛɛ ya a lɔn serr, ko i fa Dawuda anubɛ ala kɛlɛ-dannu tagbɛlɛ, ado anu fere iko kulu-yuwan. Ni mɔgɛ ya ala dannu bi, wo ya a lɔn wo si min ma. Wo ya a lɔn fanan ko kɛlɛ-kurugba-kɔrɛ le i fa la woletɔ anubɛ ala kɛlɛ-dannu ti ki kan-tina-kelen.

⁹ Tumado kɔrɛ, a dogonnɛ faran la kan do. Ni wo ma, a ye kan tinɛ do rɔ. Ni Mansa Dawuda wulita ila kɛlɛ-dan donu kɛlɛla tumɛ min, mɔgɔ-wo-mɔgɔ ya wo lamɔɛn, wonu si belenna a fɔla anu nyɔgɔn ye ko mansɛ ara wuli Abasalɔmta kɛlɛ-dannu natola.

¹⁰ Woletɔ ni wo ara don mɛ rɔ, hali ila kɛlɛ-dan minnu kerinte iko yarɛ, wonu kun ma si kɔ kilan bolo bawo Isirɛla mɔgɛ damasi ya a lɔn ko i fa Dawuda anubɛ ala kɛlɛ-dannu kolo gbɛlɛ.

¹¹ Nde, Husayi si min fɔ wo ye worɔ, i ni kilayɛ lata Isirɛla tonko nanɛ bɛɛ rɔ ko anu ni anu kundɛn kan-tina-kelen. Wo si a ma, ma ni siyaya iko ba-kɛnkɛn. Ma wa wuli tala kɛlɛ rɔ, ile Abasalɔm nyɛrɛ-nyɛrɛ si sɔ ma yarɔ.

¹² Ma si Dawuda nyini. Yanni a ni a lɔn min bi mala, ma ara bui a ma. Ale wo, ala kɛlɛ-dannu wo, anu damasi si faga tɛrr!

¹³ Ni a ya a buri, a ni ta a dogon so-wo-so burɔ, mala mɔgɛnu si yili sɔ soe wo tarɛ la ka a labui folo-wunban rɔ. Hali soe wo bɔn bɔnku kelan ti to a gbɛ rɔ kɔnkɛ wo kuma.”

¹⁴ Abasalɔm anubɛ Isirɛla mɔgɔ-banu lara Husayita kumɛ wo la ka tenbi Ahitafɛlitɛ la. Mari ara ban a latɛgɛla ko anu kana Ahitafɛlita makawandili nyimɛ wo bira alako a si Abasalɔm halaki nya min.

Gbundu-Koe Fɔ-Koe Mansa Dawuda ye A Diyana-Mɔgɛnu Bolo

¹⁵ Husayi ya Ahitafɛli sɔsɔ nya min, a tara wo rakaran Saraka-Masɔla Sedoki anubɛ Abiyatari ye. Wo kɔma, ale ya min fɔ Abasalɔm anubɛ Isirɛla mɔgɔ-banu ye, a ya wo fanan fɔ saraka-masɔlɛ wonu ye.

¹⁶ Wo kɔma, a ya a fɔ anu ye tun ko, “Wo ni kilayɛ lata Mansa Dawuda ma kaka. Wo ni a fɔ a ye ko anu kana ki bɛ-tɛgɛ tinɛnu tɔ wulɛ rɔ bi. Anu ni Yorodan bɛ tɛgɛ yona-yona alako anu kana na anubɛ ala kɛlɛ-dannu bira ka anu faga.”

¹⁷ Kɔnɔ wo ya a taran, Abiyatarila den Yonatan wo anubɛ Sedokila den Ahimahasi dogonnɛ Ɛnrogɛli tenke dafɛ Yerusalɛm soe kɔma bawo a ma di anu ye mɔgɔ ni anu yen donna soe burɔ. Yɔɔn-sunkurɔn do ye nyɔ nun, wo le si to ta-ni-sɛgi kɛla anu tɛma alako koe minnu ba tenbi soe, anu denu ni wo lɔn yi wo dafɛ nyɔ. Wo kɔma, anu burimatoe si ta wo fɔ Mansa Dawuda ye.

¹⁸ Kɔnɔ lun kelen, dennɛ do ya anu dogonnɛ yen nyɔ. Dennɛ wo tara wo fɔ Abasalɔm ye. Anu fanan ya anu buri ka ta anu dogon kei do warɛ Bahurim soe burɔ. Anu yigira kei wola kɔlɔn rɔ.

¹⁹ Kei wola musi ya kɔlɔn wo dɛ latogon anu ma ka dɔn-fan do sa tele la kɔlɔn wo da-latogɔn kuma alako mɔgɛnu kana na sui anu ma.

²⁰ Abasalɔmla mɔgɔ-ba donu nara musi wo manyinika mɔgɛ kɛnuna ko ma. Musi wo ya a fɔ anu ye ko, “Anu bara bɛ tɛgɛ nun, bi ma!” Mɔgɔ-ba wonu ya mɔgɔ filɛ kɛnu nanyini kɔnɔ anu ma anu yen. Anu sɛgira anu kɔma Yerusalɛm.

²¹ Mɔgɔ-ba wonu bɔɛ nyɔ, Yonatan anubɛ Ahimahasi bɔra kɔlɔn wo rɔ. Koe min bɛɛsi tenbira, anu tara wo fɔ Mansa Dawuda ye. Ahitafɛli ara yanfɛ min tabɛn a kan ma, anu ya wo fanan fɔ a ye. Anu ko, “Wo ni wo tiriya Yorodan bɛ tɛgɛla bi.”

²² Wo le ya a ma, Mansa Dawuda anubɛ ala mɔgɛnu donta bɛ-tɛgɛ rɔ. Yanni banda-ka-da-pinpi ni ke, anu banta tenbila.

²³ Ahitafɛli ya a yen min kɛ ko anu sa ata kawandili-kan birala tun, a ya kirikɛ sa ala sofɛlɛ kuma. A sigira a la ka a warɛ-kilɛ bira. A ke a warɛ-soe burɔ, a ya a kɛɛ ratala. A ban wo la, a tara a dun kɔlɔma la ka a nyɛrɛ faga. Anu ya a furi bi ka ta a togon anuta kebila kaburu-soe la.

²⁴ Abasalɔm anubɛ ata Isirɛla kɛlɛ-dannu bi Yorodan bɛ tɛgɛla tumɛ min, wo ya a taran, Mansa Dawuda anubɛ ala kɛlɛ-dannu bara ke Mahanayim soe burɔ.

²⁵ Abasalɔm ya Amasa ma ata kɛlɛ-den-kun-tigi la Yohabu gbɛ rɔ. (Amasa wo fa tɔgɛ le Yɛta. Sumanyila bɔnsɔn-mɔgɛ do le ale Yɛta la. Yɛta wo ya Nɛhasila dunmusi Abigɛli furu. Abigɛli wo kɔrɔ musi le Sɛruwa la, Yohabu na, kɔni.)

²⁶ Abasalɔm anubɛ ala kɛlɛ-dannu ya anu daga makɛ Kaliyadi nyamanɛ rɔ.

²⁷ Mansa Dawuda kera Mahanayim soe burɔ tumɛ min, anu ya Nɛhasila den Amon Mansa Sobi taran nyɔ min bɔra Raba soe burɔ. Anu bɛnta Amiyɛlila den Makiri la min bɔra Lodiba soe burɔ. Anu bɛnta Basilayi fanan na min bɔra Rokɛlim soe burɔ Kaliyadi nyamanɛ rɔ.

^28-29 Mansa Dawuda bɛnta mɔgɔ sawɛ minnu na kɛ la, fenfen sa anu bolo fɔ dɔn-fen-sa-mirannu, anubɛ bɔnku-dagɛnu, anubɛ burun-kurɛnu anubɛ dɔn-fannu. Anu ya wonu damasi di Dawuda anubɛ ala kɛlɛ-dannu ma. Anu nara minnu na, wo le kɛnu na, fui-fen-subolo fila wo, dɛgɛ-munke wo, buyi wo, sɔsɔ-mɛsɛ wo, liyi wo, fɛnɛ wo, nono-tagbalanɛ wo, anubɛ sagɛ donu. Anu ya wonubɛ miran wonu di Mansa Dawudanu ma bawo anu ya a lɔn ko anu kan la si gbala le. Kɔnkɛ fanan si anu bira le wulɛ rɔ, ado anu si bandan de fanan.