2 Samuwɛli 16 - ALLALA KUMƐ

Mansa Dawuda anubɛ Saiba Wara-Koe

¹ Mansa Dawuda tenbi Ɔlifi kɔnkɛ la doni, a ya Mɛfibasɛtila wɔli-kɛlɛ Saiba taran nyɔ. Sofɛlɛ fila ye a bolo. Fenfen kirinɛ sa wonu kɔ tɛma fɔ dɔn-fannu, biredi-lɔngbɔn kɛmɛ fila, anubɛ nɔnbɔ-gbɔ-gbalanɛ tɔnsɔn kɛmɛ, anubɛ toro-gbɔ-gbalanɛ gbu kɛmɛ, anubɛ nɔnbɔ-gbɔ-yi gbolo-bɔrɔ kelen.

² Mansa Dawuda ya ale Saiba manyinika. A ko, “I ye tala nfen mala kɛ dama la?” Saiba ya a fɔ a ye ko, “Sofɛlɛ kɛnu nara ila denbayɛ ye alako anu kana tagama anu kian la. Dɔn-fan kɛnu, ila mɔgɛnu dɔntɛ le wonu na. Anu ba bandan tagamana kan min wulɛ rɔ, anu si anu kan lakimɛ nɔnbɔ-gbɔ-yi wo la.”

³ Mansɛ ya a manyinika, a ko, “Mansa Sɔli mamanɛ Mɛfibasɛti, wo ye mintɔ kaka?” Saiba ko, “N ya a to Yerusalɛm soe burɔ le bawo a miri le ko Isirɛla mɔgɛnu bi a benbala nyamanɛ lasɛgila a ma le tun.”

⁴ Mansɛ ya a fɔ Saiba ye ko, “Mɛfibasɛti bolo-fan damasi, i halalɛ le wonu na gbɛ!” Saiba ko, “Ila keminɛ le nde la. Alamɛ n wara-koe ya i hɛnɛ.”

Mansa Dawuda anubɛ Simayi Wara-Koe

⁵ Mansa Dawuda ke Bahura soe burɔ, Mansa Sɔli na-kelen-nyɔgɛ Kɛra, wola den Simayi bɔra soe ka ta a taran nyɔ. A ye tala Mansa Dawuda mamɔɛnna.

⁶ Simayi donta kuru-lakɛ rɔ Mansa Dawuda anubɛ ala mɔgɔ-banu ma. Kɔnɔ hali wo, mansɛ lafoonɛ ala kɛlɛ-dannu anubɛ a makandannɛnu na.

⁷ A ya Mansa Dawuda mamɔɛn dabira tun. A ko, “I bɔ yan! Ile mɔgɔ fagalɛ, ko-yogoma-kɛlɛ.

⁸ I wara Mansa Sɔlila nyamanɛ bi a bolo ka ala mɔgɔ-siyaman faga woletɔ Mari ye i tɔrɔla kɛ nya na ila mɔgɔ fagɛla ko la. Mari ara ila nyamanɛ di ila den Abasalɔm ma. I wara kasara pɔ, ile mɔgɔ-fagalɛ.”

⁹ Sɛruwa Abisayi ya a fɔ Mansa Dawuda ye ko, “N tigi, nfenna i ye sɔnna wuli kɛ ye i mamɔɛnna? A ma, n ni ta a kunyɛ tɛgɛ a dagɛ rɔ!”

¹⁰ Mansɛ ya a fɔ Abisayi anubɛ a kɔrɔ Yohabu ye ko, “Wota sa kɛ rɔ. Ni Mari le ya a fɔ a ye ko a ni n mamɔɛn, yon si a fɔ a ye ko a kana wo ma?”

¹¹ Mansa Dawuda ya a fɔ Abisayi anubɛ ala mɔgɔ-banu ye tun ko, “Nde faga-sɔgɛ ye n halala-den-sɔrɔnnɛ la. Hali wo ma tɛrɛna n mamɔɛn kɛ la Bɛnyamɛ bɔnsɔn-mɔgɛ kɛ bolo. Mari le wara a fɔ a ye ko a ni n mamɔɛn. Wo ni a to nyɔ, a ni n mamɔɛn iko a di a ye nya min.

¹² Tumado Mari si nta tɔrɔyɛ kɛ yen ka ala mɔɛn wo yɛlɛma duwɛ la n ye.”

¹³ Mansa Dawuda anubɛ ala mɔgɛnu ya kilɛ bira ka ta. Kɔnɔ hali wo Simayi bilara anu fɛ. A ye a mamɔɛnna. A ye bɔnkɛ anubɛ kuri lakɛla anu ma kɔnkɛ bu la.

¹⁴ Ale Mansa Dawuda anubɛ ala mɔgɛnu bi kela Yorodan bɛ ma tumɛ min, anu bara bandan dɔgɔma-ma-de! Anu ya anu niyi madɛn nyɔ.

Abasalɔm Ta-Koe A Fa Kan ma Yerusalɛm Soe Burɔ

¹⁵ Abasalɔm anubɛ a gba-fɛ-bilalɛnu, Isirɛla mɔgɛnu, kɔni, wonu tara Yerusalɛm. Ahitafɛli fanan bilanɛ anu fɛ.

¹⁶ Mansa Dawuda diyana-mɔgɛ Husayi ya Abasalɔm yen tumɛ min, a ya a kan nabɔ, a ko, “Alamɛ mala mansɛ mɛra! Alamɛ mala mansɛ mɛra!”

¹⁷ Abasalɔm ya a manyinika. A ko, “I wara a ma i diyana-mɔgɛ la ka le? Nfenna i ma ta a fɛ?”

¹⁸ Husayi ya a fɔ a ye ko, “Nde si ta kama? Mari anubɛ mɔgɛ kɛnu anubɛ Isirɛla mɔgɛ damasi ara mɔgɛ min yabɔ, nde fanan bi wo le fɛ.

¹⁹ Ni n ma wɔli n tigila dan kɔrɔ, n si wɔli yon ye wo rɔ? Iko n wɔlita i fa ye nya min, n bi wɔlila ile fanan ye wo nya na le.”

²⁰ Abasalɔm ya a makawandilɛ Ahitafɛli manyinika. A ko, “Ma ara ke Yerusalɛm soe burɔ. Ma ni nfen ma gbɛ?”

²¹ Ahitafɛli ya a fɔ a ye ko, “Ta i sa i fa fɛ-sigi-musinu fɛ, a ya ala bolɔn to minnu bolo, kɔni. I wa wo ma tumɛ min, Isirɛla mɔgɛ damasi si a lɔn wo rɔ ko diyanaya ti taran wobɛ i fa tɛma tun, ado wo si a ma, ila mɔgɛnu ni kerinteya.”

²² Anu ya fani-bɔn sɔ Abasalɔm ye bolɔn wo kuma Isirɛla mɔgɛnu si a yen kan min. Abasalɔm ya a sa a fa fɛ-sigi-musi wonu fɛ nyɔ.

²³ Ahitafɛli ya Abasalɔm makawandi ko-wo-ko la, a si wo bira iko Alla nyɛrɛta kumɛ. Mansa Dawuda anubɛ Abasalɔm mɔgɔ filɛ bɛɛ lara le ala makawandili-kumɛ la nun.