2 Samuwɛli 15 - ALLALA KUMƐ

Murutiyɛ Rabɛn-Koe Abasalɔm Bolo

¹ Wati-tenbinɛ, Abasalɔm ya kirindi kelen bi anubɛ a sagan-soeenu. A ya kemini-mɔgɔ bi-loli fanan bi minnu si sɔ a yarɔ.

² Sɔgɔma-wo-sɔgɔma subaga, anubɛ wonu si anu nasɔ. Anu si anu sɔ kiti fɔ tinɛ yarɔ-kilɛ la tarɛ kɔma. Mɔgɛ min tenbi nala ala kumɛ la mansɛ wara, Abasalɔm fɔlɔn si mɔgɛ wo manyinika kilɛ la nyɔ a bɔ tinɛla ko ma. Mɔgɔ-wo-mɔgɔ bɔra bɔnsɔn min tɔ, wo wa wo fɔ a ye tumɛ min,

³ ale Abasalɔm si a fɔ wo tigi ye worɔ ko, “N bɔ, i si yo sɔrɔn de kɛ rɔ kɔnɔ mansɛla mɔgɔ-ba sa yan kaka min si ila kumɛ kɛ fɔ.”

⁴ A ye kumɛ min tugunna wo la, a si a fɔ le ko, “Ni nde mara kiti-tɛgɛlɛ la wo ye, wo kin. Woletɔ ni mɔgɔ-wo-mɔgɔ nara ala kumɛ la n bara, n si wola kiti tɛgɛ a kila-bɛrɛbɛrɛ fɛ.”

⁵ Ni mɔgɛ wo ya a madu a kɔrɔ ka a gbiliya, ale Abasalɔm si wo tigi bira ka a sunbu.

⁶ Isirɛla mɔgɛ min bɛɛsi taranta nala anuna kumɛ la mansɛ wara ka anuna kumɛ fɔ a kilɛ fɛ wo wati rɔ, Abasalɔm ya a ma wo damasi la wo nya na le. Wo le ya a wara-koe diya Isirɛla mɔgɛnu ye.

^7-8 San nani tenbinɛ, ale Abasalɔm ya a fɔ a fa Dawuda ye ko, “N fa, n siginɛ Siriyanu tɛma wati min Kesa nyamanɛ rɔ, n ya lanyiri kiri Mari ye. N ko ni a ya n bi ka na n na Yerusalɛm soe burɔ, n si ta a bato Hiburɔn soe burɔ. I yandi, a ma, n ni ta ka nna lanyiri latɔnbagaya Mari ye.”

⁹ Mansɛ ya a fɔ a ye ko, “Alamɛ Alla tora i fɛ.” Abasalɔm tara Hiburɔn soe burɔ.

¹⁰ A ke nyɔ, a ya kilayɛ lata Isirɛla bɔnsɔn tan-ni-filɛ damasi ma. A ko, “Ni wo ya buru-kan lamɔɛn, wo ni gbele-gbelen sewɛ bolo. Wo ni a fɔ ko, ‘Abasalɔm ara ma mansɛ la Hiburɔn soe burɔ.’ ”

¹¹ Abasalɔm ya mɔgɔ kɛmɛ fila kele Yerusalɛm soe burɔ. Wonu yili-latɛgɛnɛ bilara Abasalɔm fɛ ka ta Hiburɔn. Kɔnɔ anu sa ko-wo-ko kalama.

¹² Abasalɔm don ala saraka-bɔɛ rɔ, a ya kilayɛ lata Ahitafɛli ma Kailo soe burɔ. Mansa Dawuda makawandilɛ do le wo la. Abasalɔm ara yanfɛ min kiri a fa kan ma, a ara fɔlɔla fanka sɔrɔnna wo rɔ. Abasalɔm gba-fɛ-bilalɛnu tora siyayala.

Mansa Dawuda Bɔ-Koe Yerusalɛm Soe Burɔ

¹³ Mɔgɛ do tara a fɔ Mansa Dawuda ye ko, “Isirɛla mɔgɛnu bara sɔ ila den Abasalɔm fɛ kɔɔ!”

¹⁴ Mansɛ ya a fɔ ala mɔgɔ-banu ye minnu siginɛ Yerusalɛm ko, “Ma ma buri wona kaka Abasalɔm kɔrɔ. Ni wo ma, a si ma damasi bira ka so-burɔ-mɔgɛ damasi faga.”

¹⁵ Wonu ko, “Ma tigi, i ya kuma-wo-kuma fɔ ma ye, ma si wo bira.”

¹⁶ Ale mansɛ anubɛ ala denbayɛnu ya anu buri anubɛ ala mɔgɔ-banu. Fɔ a fɛ-sigi-musi mɔgɔ tan, a ya ala bolɔn to wonu denu bolo.

¹⁷ Ale mansɛ anubɛ ala mɔgɔ-banu ya soe boloka tumɛ min, anu tara sɔ bon-naban dafɛ.

¹⁸ Ala mɔgɔ-banu sɔra a dafɛ nyɔ. A makandannɛnu tara a yarɔ. A nara Filisiti kɛlɛ-dan mɔgɔ kɛmɛ wɔrɛ (600) minnu na ka bɔ Kati soe burɔ, a ya wonu fanan sɔ a yarɔ.

¹⁹ Kɛlɛ-dan wonuna kun-tigi min tɔgɛ Itayi, a ya wo manyinika. A ko, “Nfenna ile ye tala ma fɛ? Sɛgi, i ni ta sigi mansa-kurɛ dafɛ bawo sundan le ile la, ado kɛlɛ-maburilɛ le ile la.

²⁰ I ma mɛ wɛ n fɛ fɔlɔn. Nde si sɔn kama wo rɔ, i ni to yilan-yilanna n fɛ, ado nde nyɛrɛ-nyɛrɛ ma n ta tinɛ lɔn? I bɔnsɔn minnu bi yan, wonu bi, i ni sɛgi anu na soe. Alamɛ Mari tora i fɛ ka ko-nyimɛ kɛ i ye.”

²¹ Kɔnɔ Itayi ya a fɔ a ye ko, “N tigi, a ye mabɛ Mari tɛma. I tara kan-bo-kan, n bi i fɛ. Hali fagalɛ le, n bi i fɛ.”

²² Wo le ya a ma, Mansa Dawuda ya a fɔ a ye ko, “Nba, ma ta.” Itayi anubɛ ala kɛlɛ-dannu anubɛ anuna denbayɛnu tara Dawuda fɛ.

²³ Mansa Dawuda anubɛ ala mɔgɛnu bi tala, so-burɔ-mɔgɛnu bi dila anuna ko la anu sɛbɛ-kuna-wɛ la. Mansɛ anubɛ ala mɔgɛnu ya yi do tɛgɛ min tɔgɛ Kidirɔn. Anu kunyɛ telennɛ wulɛ wara le la.

²⁴ Saraka-masɔlɛ min tɔgɛ Sedoki, wonubɛ Lifayi bɔnsɔn-mɔgɛnu ya tɔn-kenkirɛ bi. Anu ya tɔn-kenkirɛ sigi dugi ma ha Mansa Dawuda anubɛ ala mɔgɛ damasi bɔra soe burɔ. Saraka-Masɔla Abiyatari fanan bi nyɔ.

²⁵ Mansa Dawuda ya a fɔ Sedoki ye ko, “Wo ni tɔn-kenkirɛ lasɛgi a gbɛ rɔ tun Yerusalɛm soe burɔ. Ni n di Mari ye, a si a ma, n ni na tɔn-kenkirɛ kɛ yen n yɛ la a gbɛ rɔ tun, yɔ!

²⁶ Kɔnɔ ni n ma di a ye tun, ko-wo-ko di a ye, a ni wo ma n na.”

²⁷ Mansa Dawuda ya a fɔ Sedoki ye tun ko, “Ko-rayennɛ le ile la. Ila den Ahimahasi anubɛ Abiyatarila den Yonatan bi. I ni sɛgi anu na i bolo soe burɔ. Alamɛ Alla tora i fɛ.

²⁸ Bɛ si tɛgɛ kan min wulɛ rɔ, n si i makɔni nyɔ ha ila kilayɛ ni ke n ma.”

²⁹ Sedoki anubɛ Abiyatari ya tɔn-kenkirɛ bi. Anu sɛgira Yerusalɛm soe burɔ. Anu tora nyɔ.

³⁰ Mansa Dawuda dimatoe ya Ɔlifi kɔnkɛ yɛlɛ. A salɛ yamatogonnɛ, ado a tonta-rakolɔn ye tagamana ka a yira ko a yisi tinyanɛ. Minnu damasi bilara a fɛ, wo dama kunyɛ yamatogonnɛ wo nya na le.

³¹ Mansa Dawuda ya a lamɔɛn tumɛ min ko Ahitafɛli ara kofu Abasalɔm ma murutiya tinɛ, mansɛ ya madiyali kɛ. A ko, “Mari, i yandi, alamɛ ko kana bɔ Ahitafɛlita makawandili-kan rɔ.”

³² Mansa Dawuda ke Alla bato tinɛ do ma kɔnkɛ wo kun tɛma, a diyana-mɔgɔ-bɛrɛbɛrɛ Araka soe kɛ Husayi, wo ya a taran nyɔ. Wo ye kela a ma tumɛ min, ala duruki rafaranɛ, gbangban ye a kunyɛ rɔ.

³³ Mansa Dawuda ya a fɔ wo ye ko, “Ni ile tara n fɛ, i ti ke n dɛnbɛna.

³⁴ Kɔnɔ ile ye min mala n ye, i ni sɛgi Yerusalɛm soe burɔ. I ni a fɔ Abasalɔm ye ko, i si to a fɛ iko i tora a fa fɛ nya min. Ni Ahitafɛli ya makawandili-kuma-wo-kuma fɔ, i ni a masɔsɔ.

³⁵ I si saraka-masɔlɛnu taran nyɔ, Sedoki anubɛ Abiyatari. I ya kuma-wo-kuma lamɔɛn Mansa Abasalɔm wola bɔn la, i ni ta wo fɔ mɔgɔ filɛ wonu ye.

³⁶ Anuna dannu Ahimahasi anubɛ Yonatan, wonu fanan bi nyɔ. I ya kuma-wo-kuma lamɔɛn n bara-koe rɔ, i si a fɔ dan wonu ye. Wonu fanan si na wo fɔ nde ye.”

³⁷ Mansa Dawuda diyana-mɔgɛ Husayi sɛgira tumɛ min, anubɛ Abasalɔm ya anu nyɔgɔn bɛn soe burɔ.