2 Samuwɛli 12 - ALLALA KUMƐ

Mansa Dawuda Makuma-Koe Nɛbi Netan Bolo

¹ Mari ya Nɛbi Netan sɔ Mansa Dawuda wara. Nɛbi ke nyɔ, a ya tili tɛgɛ mansɛ ye ko, “Kei fila le taranta so kelen tɔ, fen bi doi bolo, fen sa doi wo bolo.

² Fen-tigi wo, ninkinu anubɛ sagɛnu bi a bolo duk!

³ Kɔnɔ bolo-kolɔn wo, a ya saga-den kelen pe min san, wo le ye a bolo. Ala saga-dan kɛ fɛ-biranɛ a bolo a kin na! Saga-dan wonubɛ ala den-sɔrɔnnɛnu denu koloyara anu nyɔgɔn fɛ. Anubɛ saga-dan kɛ si fen dɔn kan-tina-kelen de! Anu si anu min yi-lafɛ kelen de la. A si a sigi a kian kuma. Saga-dan wo di a ye iko a halala dunmusi sɔrɔnnɛ.

⁴ Lunyɛ do, fen-tigi wo ya sundan sɔrɔn. Kɔnɔ a ma di fen-tigi kɛ ye a ni a halala kolo-fan wo do bi ka a faga ala sundan wo ye. Wo le ya a ma, a tara bolo-kolɔn wola saga-den kelan bi ka wo faga ala sundan wo ye.”

⁵ Netan ban tili kɛ tɛgɛla a ye, Mansa Dawuda diminyara fen-tigi wo ma. A ko, “N bara n keli Mari rɔ, a bɛnta, mɔgɔ-su kɛ ni faga!

⁶ Iko a ara karagbɛlɛya-su min nadan wo la ka bolo-kolɔnla kolo-fen kelan bi a bolo, a bɛnta de, a ni wo nyɔgɔn nani nasɛgi bolo-kolɔn wo ma.”

⁷ Netan ya a fɔ Mansa Dawuda ye ko, “Nba, n bara tili min tɛgɛ i ye, ile le fen-tigi wo la, yɔ! Min sanɛ wo kuma, Isirɛlata Mari Alla ko ale le ya i tanka Mansa Sɔli masibɛ ma ka i ma mansɛ la Isirɛla mɔgɛnu kun na.

⁸ Wo kɔma, a ko a ya Mansa Sɔlila musinu anubɛ ala nyamanɛ di i ma. A ko ale le ya i ma mansɛ la Isirɛla anubɛ Yuda nyamanɛ fanan kun na. A ko ni wo ma i wasa, a si wonu nyɔgɔn fila di i ma nun.

⁹ Mari ko nfenna i wara ala kumɛ bɔ a gbɛ rɔ? A ko nfenna i wara ko-yogoma-su kɛ ma? I wara a ma, Amonnu bara Yuraya faga kɛlɛ rɔ. Wo kɔma fanan, i wara ala musi bi!

¹⁰ A ko nba, min bi nala mala ile la gbɛ, ka a bi ila dannu ma ka a sigi i kegeyɛnu na, mɔgɔ kelen-kelen si faga wo dama rɔ tɔrɔyɛ bolo bawo i wara ata kumɛ tinya ka Yurayala musi bi.

¹¹ Mari ko a ara ban a latɛgɛla ko fɔ ila bonna-mɔgɛ do wa tɔrɔyɛ lana i kuma. A ko fɔ a wa ila musinu bi i bolo ka anu di kei-gbɛrɛkɛ ma. Wo wa ma tumɛ min, i si a lɔn wo rɔ ko a ara min fɔ, tonyɛ le wo la. Kei wo si a sa ila musinu fɛ tele rɔ gbaga!

¹² A ko ile ya ko-yogomɛ ma dogon le tɔ kɔnɔ a ko kei wo ye atɛ kɛla gbɛ le ma Isirɛla mɔgɛ bɛɛ yala gbaga!”

¹³ Mansa Dawuda ya a sɔn a hakɛ la, a ko, “N bara bila Mari la.” Nɛbi Netan ya a fɔ a ye ko, “Mari ara i makoto, i ti faga.

¹⁴ Kɔnɔ bawo i wara tɛgɛ Mari rɔ, Batasiba ara dan min sɔrɔn i ye wo la, wo si faga.”

¹⁵ Wo kɔma, Netan sɛgira a warɛ. Yurayala musi ya dan min sɔrɔn Mansa Dawuda ye, Mari ya a ma, wo kirayara dɔgɔma-ma-de!

Mansa Dawudala Dan Faga-Koe

¹⁶ Mansɛ ya Alla madiya alako dan wo ni kɛndɛya. A ya a ban dɔn-fan la. Su-wo-su, a si ta a sa dugi ma a warɛ bɔn la.

¹⁷ Ala mɔgɔ-banu kɛnɛna tala a madiyala fen-dɔn-koe ma kɔnɔ hali wo, a ti sɔn a lasɔ-koe ma anubɛ ka fen dɔn wonu fɛ.

¹⁸ Lɔgɔkun kelen tenbinɛ, dan wo fagara. Ala mɔgɔ-banu kilanta wo fɔla a ye. Anu ko, “Dan kɛ kirɛ sanɛ wati min, ni ma kumara Mansa Dawuda la, a ti ma denkun. Kama, ni male tara a fɔ a ye gbɛ ko ala dan ara sa, a ti fɛɛ sa a nyɛrɛ la?”

¹⁹ Mansa Dawuda ya a yen min kɛ, anu bi wɛwɛ sala anu nyɔgɔn ye, a suira ala dan saya-koe ma. A ya anu manyinika, a ko, “Nna dan le wara faga, wa?” Anu ko, “Ɔn!”

²⁰ Mansa Dawuda ya a lasɔ dugi ma. A tara a ku ka a kunyɛ rabɔ. A ya a mayɛlɛma. Wo kɔma, a tara Mari bato tinɛ. A bɔɛ nyɔ, a nara bɔn la. A ya dɔn-fan makele. Anu nara wo la tumɛ min, a ya a dɔn.

²¹ Ala mɔgɔ-banu ya a fɔ a ye ko, “Ma kɔndɔ ara fili. Ila dan kirɛ sanɛ wati min, i kɛnɛna dila, ado i ti sɔn fen na. Dan wola sayɛ kɔma, i wara i lasɔ ka fen dɔn kɛ.”

²² Mansa Dawuda ya a fɔ anu ye ko, “Tonyɛ le wo la. Nna dan kirɛ sanɛ wati min, n bi sunyɛ le tɔ nun, ado n bi dila. N ya a lɔn nun ko, tumado Mari si kinikini n ma ka dan kɛ niyi lasɛgi n ma.

²³ Kɔnɔ a ara ban fagala min kɛ kɛ la, n bi sunyɛ donna nfenna ko la wo rɔ tun? N si ke dan niyi lasɛgila a rɔ tun, ba? Nde fanan, lunyɛ do, fɔ n ba nna dan kɛ taran kɔnɔ ale ti sɛgi yan tɔ tun.”

Silamɛni Sɔrɔn-Koe

²⁴ Mansa Dawuda tara Batasiba makawandi. Saya-koe makimanɛ, a ya a latenbi a kɔma. Ala musi Batasiba wo ya buyi bi ka den-kei sɔrɔn. A ya dan wo tɔgɔ sa Silamɛni. Kɔnɔ dan wo di Mari ye min kɛ,

²⁵ wo le ya a ma, a ya Nɛbi Netan lata dan wo tɔgɔ sa tinɛ ko a ni wo kele Mari Diyana-Mɔgɛ.

Raba Soe Bira-Koe Mansa Dawuda Bolo

²⁶ Wati wo mumɛ kɔrɔ, Yohabu ye Amonnu kɛlɛla anuna so-karantan, Raba soe burɔ. A ara anu tagbɛrɛn. A ara to sɛ, a ni anuna mansa soe wo bi anu bolo.

²⁷ Yohabu ya a sara Mansa Dawuda wara. A ya a fɔ a ye ko, “N bara bui Raba soe ma ka anuna yi-bi-tinɛ bira.

²⁸ Wo ni na kɛlɛ-den-toenu na wo bolo. Wonu ni na bui soe ma ka a bi. Nde sa nyinina tɔgɔ ma soe kɛ bi-koe rɔ. A ma di n ye n tɔgɛ ni bɔ Amonnuna mansa soe kɛ bi-koe rɔ.” Anu tara wo fɔ Mansa Dawuda ye.

²⁹ Mansa Dawuda nara ala kɛlɛ-den-toenu na a bolo ha ka kɛ Raba soe ma. A ya soe wo bira-a-la ka a bi anu bolo.

³⁰ Mansa Dawuda ya anuna mansɛla mansaya-fulɛ bi a kunyɛ la ka a don a nyɛrɛ salɛ la. Fulɛ wo, sɛnɛ le wo la. Kuru-da-gbɛlɛnu sanɛ a ma tala. Ala gbiliyɛ anubɛ fui-fan bɔrɔ-talɛla gbiliyɛ rakɛn de. Wo kɔma, kɛlɛ ya fan minnu bira, a ya wo siyaman bi.

³¹ A ya Amonnu ma ala yɔɔn la ka anu nawɔli sɛrɛ anubɛ dɛɛ anubɛ tɛgɛran la. A ya donu sɔ bulɔku-gbesi-ko-wɔlɛ la. A ya wo ma Amon nyamanɛ mɔgɛ dama la wo nya na le tɛrr! A ban wo mala, a ya ala kɛlɛ-nyama bi. Anu sɛgira Yerusalɛm.