2 Samuwɛli 10 - ALLALA KUMƐ

Amonnu anubɛ Siriyanu Nɔ-Koe Mansa Dawuda Bolo

¹ Wati-tenbinɛ kɛ kɔma, Amon Mansa Nɛhasi fagara. Ala den Henɔn sigira a gbɛ rɔ.

² Mansa Dawuda ya a fɔ ko, “Fɔ n ba Henɔn kɛ ma n diyana-mɔgɛ la iko mabɛ a fa Nɛhasi manɛ nya min nun.” Wo le ya a ma, Mansa Dawuda ya kilayɛnu nata a fa saya-kɔndɔli-kɛ tinɛ. Kilayɛ wonu kenɛ Amon nyamanɛ rɔ,

³ Amon mɔgɔ-banu ya a fɔ Mansa Henɔn ye ko, “Ile lara a la ko Mansa Dawuda ya mɔgɛ kɛnu nana i fa saya-kɔndɔli-kɛ tinɛ le? Kɛnu ma na wo la. Anu nara mala soe lakɔrɔsi tinɛ le alako anu si fɛrɛ sɔrɔn nya min ka ma nɔ.”

⁴ Henɔn ya a ma, anu ya Mansa Dawudala kilayɛ wonu bira. Anu ya anu dɛ tɔnkɔn masii ka anu dɛ tɔnkɔn doi siibɛlɛ to. Wo kɔma, anu ya anuna duruku-yan-bɛnu tɛgɛ a la purunsan! Anu ya anu gben.

⁵ Mansa Dawuda ya wo lamɔɛn min kɛ, a ya mɔgɛ donu nata wonu nabɛn tinɛ, Amonnu bara minnu namiliya wo la. A ya a sara anu bara, a ko anu ni to sigini Yɛrikɔ ha anu buyɛ ni bɔ tun. Wo kɔma, anu ni na to nala Yerusalɛm.

⁶ Amonnu ya a lɔn min kɛ ko anu bara Mansa Dawuda ma anu yoge la, anu tara Siriya kɛlɛ-dan mɔgɔ waga mogan (20,000) masan Soba soe anubɛ Bɛti-Rihobu soe burɔ. Anu tara mɔgɔ waga tan-ni-fila masan Tɔbu nyamanɛ rɔ fanan. Anu tara Meyaka nyamanita mansɛ wara ka ale anubɛ ala kɛlɛ-dan mɔgɔ waga kelen (1,000) masan.

⁷ Mansa Dawuda fanan ya wo lamɔɛn min kɛ, a ya ala kɛlɛ-den-kun-tigi Yohabu anubɛ ala kɛlɛ-dan bɛɛsi lata Amonnu kɛlɛ tinɛ.

⁸ Amonnu ya anu sɔ-bole rabɛn anuna so-karantan-tarɛ-don-dɛ la min tɔgɛ Raba. Anu ya Siriya kɛlɛ-dan minnu masan Tɔbu nyamanɛ anubɛ Meyaka nyamanɛ rɔ, wonu fanan ya anu sɔ-bole rabɛn Dawuda kan ma gbɛkole ma.

⁹ Yohabu ya a yen ko a ye kɛlɛ tɛma gbɛ, kɛnu bi a yarɔ, kɛnu bi a kɔma. Woletɔ a ya ala kɛlɛ-den-tagbɛlɛnu natugu Siriyanu ma minnu bi gbɛkole ma.

¹⁰ A ya a na-kelen-nyɔgɛ Abisayi sɔ kɛlɛ-dan toenu yarɔ. Wonu tara Amonnu kɛlɛ tinɛ minnu bi soe tarɛ-don-dɛ la.

¹¹ Yohabu ya a fɔ a na-kelen-nyɔgɛ wo ye ko, “Ni i ya a yen, Siriyanu bara kɛlɛ ragbɛlɛya n kuma, wo na n dɛnbɛ de! Ni nde fanan ya a yen, Amonnu bara kɛlɛ ragbɛlɛya wo kuma, n si ta wo dɛnbɛ.

¹² Wo ni wo yisi gbɛlɛya ka wo kerinteya. Ma ni kɛlɛ kɛ mala nyamanita-mɔgɛnu ye anubɛ mata Alla halala soenuna ko la. Alamɛ Mari sako kɛra!”

¹³ Yohabu anubɛ ala kɛlɛ-dannu tara Siriyanu kɛlɛ tinɛ gbɛkole wo ma. Siriya wonu ya anu buri Yohabu kɔrɔ.

¹⁴ Amonnu ya a yen min kɛ, Siriyanu bara anu buri, anu denu fanan ya anu buri Abisayi kɔrɔ ka don tarɛ burɔ. Yohabu ya ala kɛlɛ-dan damasi bi. Anu sɛgira Yerusalɛm.

¹⁵ Siriyanu ya a lɔn yati, ko Isirɛla mɔgɛnu bara anu nɔ. Anu ya anu nyɔgɔn kundɛn kan-tina-kelen.

¹⁶ Soba Mansa Hadadisa ya kilayɛnu nata Siriyanu ma minnu bi Yufereti bɛ tele-bɔɛ wara la ka wonu kele. Wonu nara anu daga makɛ Hilam soe burɔ ka kofu Mansa Hadadisala kɛlɛ-dannu ma. Mansɛla kɛlɛ-den-kun-tigi min tɔgɛ Sobaki, wo le ye anu kun na.

¹⁷ Mansa Dawuda fanan ya wo lamɔɛn min kɛ, a ya Isirɛla kɛlɛ-dannu kundɛn kan-tina-kelen. Wonu ya Yorodan bɛ tɛgɛ ka ta Siriyanu magbenna Hilam soe burɔ. Anu ya a taran, Siriya wonu bara anu sɔ-bole rabɛn tarɛ dɛ la anu denu kan ma. Anu ya kɛlɛ dabira.

¹⁸ Siriya wonu ya anu buri Dawudala kɛlɛ-dannu kɔrɔ. Kɛlɛ-dan minnu bi kirindinu naburila, Isirɛla mɔgɛnu ya wonu mɔgɔ kɛmɛ wɔrɔnfila (700) faga. Minnu fanan bi soeenu naburila, Isirɛla mɔgɛnu ya wonu mɔgɔ waga bi-nani (40,000) faga. Isirɛla mɔgɛnu ya Siriya kɛlɛ-den-kun-tigi Sobaki tanban. Wo le ya a ma, wo kunyɛ tora kɛlɛ rɔ.

¹⁹ Mansa Hadadisala so-tiginu ya a yen min kɛ ko Dawudala kɛlɛ-dannu bara anu nɔ, anu ya anu nyɛrɛ latenbi Dawuda ma. Anu tora anuna dutinu natala Dawuda ma. Siriyanu kilanta Amonnu dɛnbɛn-koe ma tun.