2 Samuwɛli 1 - ALLALA KUMƐ

Mansa Sɔli Saya-Tii-Koe Dawuda La

¹ Dawuda bɔɛ Amalɛkinu nɔ tinɛ kɛlɛ rɔ Mansa Sɔlila sayɛ kɔma, a sɛgira Sikilagi soe burɔ. Tele fila,

² a sawa nyɔgɛ wo kɔma, keminɛ do burimatoe bɔra Mansa Sɔlila dagɛ rɔ. Kɔnɔ yanni a ni ke Dawuda ma, a ya ala duruki rafara ka gbangban kɛ a kunyɛ rɔ yisi-tinya bolo. A ke Dawuda ma, a ya a madu Dawuda kɔrɔ ka a gbiliya.

³ Dawuda ya ale keminɛ manyinika, a ko, “Ile bɔra mintɔ?” Keminɛ wo ko, “N burimatoe dogonnɛ bɔra Isirɛla mɔgɛnuta dagɛ le tɔ.”

⁴ Dawuda ya a manyinika, a ko, “Nfen mara?” Keminɛ wo ya a fɔ a ye ko, “Isirɛla kɛlɛ-dannu denu bara anu buri kɛlɛ kɔrɔ, ado anu mɔgɔ-siyaman fagara. Hali Mansa Sɔli anubɛ ala den Yonatan fanan fagara le.”

⁵ Dawuda ya a manyinika. A ko, “Ile ya a lɔn kama ko Mansa Sɔli anubɛ ala den, Yonatan bara faga?”

⁶ Ale keminɛ ko, “N bi Kilabowa kɔnkɛ kuma tumɛ min, n ya Mansa Sɔli yen, ala tanbɛ sɔnɛ a kɔrɔ, a lɛngbɛnnɛ a rɔ, ado wo ya a taran fanan, a yoge minnu siginɛ kirindinu tɔ anubɛ a so-laburilɛnu, wonu bara gbɛrɛn a ma.

⁷ Ale mansɛ ya a tintan tumɛ min, a ya n yen. Wo kɔma, a ya n takele. N ya a labira.

⁸ A ya n sibole manyinika. N ya a fɔ a ye ko Amalɛki le nde la.

⁹ A ya a fɔ n ye ko a tanban boloko-yogomɛ-kɛnɛ, ado a ye saya-bonda-dɛ le la kɛ la. A ko n ni ta a laban.

¹⁰ Woletɔ nde fanan tara a faga bawo n ya a lɔn serr, ko a ye fagala le. N ban a fagala, n ya ala mansaya-fulɛ anubɛ ala bolo-kalama-dɛɛn bi. N bara na wonu denu tola i ma kɛ la.”

¹¹ Dawuda anubɛ ala kɛlɛ-dannu ya anuna durukinu tafara yisi-tinya bolo.

¹² Mansa Sɔli anubɛ Yonatan anubɛ Isirɛla kɛlɛ-dan minnu fagara kɛlɛ rɔ, anu telenta dila ka sunyɛ don wonuna ko la bawo Marita mɔgɛ le wonu na.

¹³ Wo wati rɔ, Dawuda ya saya-tiilɛ wo manyinika, a ko, “Ile bɔra mintɔ?” Keminɛ wo ko, “Amalɛki le nde la kɔnɔ n siginɛ wola nyamanɛ le tɔ.”

¹⁴ Dawuda ya a manyinika, a ko, “Nfenna ile sisira Marita mansa-yabɔnɛ fagala?”

¹⁵ Dawuda ya a fɔ ala kɛlɛ-dan do ye ko, “Keminɛ kɛ faga.” Kɛlɛ-dan wo ya a faga kelenna,

¹⁶ ado Dawuda ara a fɔ ale Amalɛki wo ye nun ko, “I nyɛrɛ le ya i nyɛrɛ faga bawo i ya a fɔ kuma rakaran tinɛ i ko, ile le nyɛrɛ-nyɛrɛ ya Marita mansa-yabɔnɛ wo faga.”

Dawudala Saya-Tolon Kɛ-Koe

¹⁷ Dawuda ya saya-tolon do kɛ Mansa Sɔli anubɛ Yonatanla ko la.

¹⁸ A ya a fɔ ala mɔgɔ-banu ye ko anu ni Yuda mɔgɛnu karan wo la. (Saya-tolon kɛ sɛbɛnɛ Yasarila buku rɔ.)

¹⁹ “E, Isirɛla mɔgɛnu, mala kun-tiginu furi bolokanɛ kɔnkɛnu kuma Isirɛla nyamanɛ rɔ. Mala kɛlɛ-dan minnu kerinte, wonu bara bui.

²⁰ Ma kana wo fɔ Filisitinu ye minnu siginɛ Kati anubɛ Asikalɔn soenu tɔ. Ma kana sɔn, anuna musinu ni nyagalen. Ma kana sɔn, kemininyabɛlɛ wonuna dunmusinu ni sewa.

²¹ “Alamɛ duri anubɛ bandɛ kana yigi Kilabowa kɔnkɛ kuma. Alamɛ bin kana fɛrɛn nyɔ tun bawo kerintenuna nɛgɛ-walannu sanɛ nyɔ rɔ miliyɛ rɔ. Mansa Sɔlila nɛgɛ-walan ma ti mun tun tuli la min si a lamalan-malan.

²² Yonatan kusan kalabɛn lakɛla, ado ni a fa Sɔlila faan ye a bolo, a ti kinikini mɔgɔ-wo-mɔgɔ ma. Anu kɛnɛna anu yogenu fagala hali minnu makilannɛ.

²³ “Mansa Sɔli anubɛ Yonatan, anu di mɔgɛnu ye. Anu sɔn bɛɛ kelen, ado anu niyi bɔra anu nyɔgɔn fɛ le. Anu natiri kokɛ ko, ado anu tagbɛlɛ yarɛ ko.

²⁴ “E, Isirɛla musinu, wo ni wo di Mansa Sɔlila ko la. Ale le ya wo fɛrɛya bɔ kura-wulen-hakikɛnu na ka wo makiri sɛnɛ anubɛ dugu-kɔrɔ-nɔnfulinu na.

²⁵ “Kɛlɛ-dan minnu kerinte, wonu kunyɛnu bara to kɛlɛ rɔ. Yonatan, i furi sanɛ kɔnkɛnu tɛma.

²⁶ N bi n diyana-mɔgɛ Yonatan wo le di tinɛ kɛ la. I ya n bira boloko-nyimɛ-kɛ. I ya ila keninteyɛ min yira n na, wo tenbira musitɛ la.

²⁷ “Kɛlɛ-dan minnu kerinte, wonu bara bui. Anuna kɛlɛ-mirannu bolokanɛ, mɔgɔ mako sa anu na.”