2 Mansɛnu 9 - ALLALA KUMƐ

Yehu Ma-Koe Isirɛla Mansɛ La

¹ Wo kɔma, Nɛbi Ilaisa ya ala nɛbi-karan-dan do kele ka a fɔ a ye ko, “I rabɛn ta-koe ma. I ni tulu-barɛ kɛ bi ka ta Ramɔti-Kaliyadi soe burɔ.

² I wa ke nyɔ tumɛ min, i ni Nimisi mamanɛ Yehu nyini, Mansa Yɛhosafatila dan, kɔni. I wa a yen tumɛ min, i ni a bi ka ta wo dan na konko do la.

³ Wo wa ke konko wo la tumɛ min, i si dantɛgɛ-tuli kɛ do kɛ a kunyɛ rɔ. I tenbi tuli kɛla a kunyɛ rɔ, i ni a fɔ ko, ‘Mari ara ile yabɔ ka i ma Isirɛla mɔgɛnuna mansɛ la.’ I wa ban kɛ mala tumɛ min, i ni i buri bɔla nyɔ.”

⁴ Nɛbi-karan-dan wo tara Ramɔti-Kaliyadi soe burɔ.

⁵ A ke soe wo burɔ, a ya a taran, kɛlɛ-den-kunyɛnu bi ladɛn do rɔ. A ya a fɔ ko, “Sarakanɛ do ye n bolo ka a fɔ i ye.” Yehu ya a fɔ a ye ko, “I ye yon ma ma tɛma?” Nɛbi wo ko, “N fa, ile yɔ!”

⁶ Anu mɔgɔ filɛ tara konko do la. Anu ke nyɔ, nɛbi wo ya tuli wo kɛ Yehu kunyɛ rɔ. Nɛbi wo ko, “Isirɛlata Mari Alla ko a ara i ma ata mɔgɛnuna mansɛ la Isirɛla tɔ bi.

⁷ A ko i ni ila mansɛ faga, Mansa Ehabula dan, kɔni. A ko i ni wo ma bawo Yɛsɛbɛli ara ale Marita nɛbi anubɛ ata wɔli-kɛla-siyaman faga. Wo si ma ale Yɛsɛbɛlita tɔrɔyɛ la.

⁸ A ko Mansa Ehabuta denbayɛ mumɛ, i ni wo bɛɛ lato dogbe, hali a tugura min na, a fereta min na.

⁹ Mari ko a si a ma Mansa Ehabuta denbayɛ la iko a ya a ma Nebatila den Mansa Yɛrabowami anubɛ Ahayala den Mansa Beyasa la nya min.

¹⁰ A ko ala musi Yɛsɛbɛli ti togon kɔnɔ wulinu si a soge dɔn Yɛsɛreli soe burɔ.” Nɛbi ban kɛ fɔla, a burimatoe bɔra konko wo la.

¹¹ Yehu fanan bɔra ka ta a ta-nyɔgɛnu tɛma ladɛn wo rɔ. Wonu ya a manyinika ko, “Yuwɛ kɛ ya i kele nfen yuwaya-kuma ma nun? Tana ma bɔ nyɔ, nyɛ?” Yehu ya a fɔ anu ye ko, “Wo ya mɔgɔ-sufa kɛla kuma-bole lɔn.”

¹² Anu ya a fɔ ko, “I telen tonyɛ la ma ye.” Yehu ya a fɔ anu ye ko, “A nara Marita kumɛ la n bara. A ya dantɛgɛ-tuli kɛ n kunyɛ rɔ. A ko Mari ko nde le ye mala Isirɛla mɔgɛnuna mansɛ la.”

¹³ Tiriyante wo rɔ, anu ya anuna durukinu bɔ anu kan na ka anu tasa ale Yehu kɔrɔ dugi ma wo tumɛ ale Yehu sɔnɛ kan-tina-mayɛlɛnɛ do rɔ anu damasi kuma. Wo kɔma, anu ya buri fɛ. Anu dama ya a lasɔnkɔ ko, “Yehu ara ma mansɛ la.”

Mansa Yɔram Faga-Koe Mansa Yehu Bolo

^14-15 Kɛ wati ya a taran, Isirɛla Mansa Yɔram ye a dandan tinɛ Yɛsɛreli soe burɔ bawo a tanbanta wo tumɛ anubɛ Siriya Mansa Hasiyɛli kɛlɛta Ramɔti-Kaliyadi soe dafɛ. Mansa Yehu ya yanfɛ kiri ka a fɔ a ta-nyɔgɔ kɛlɛ-den-kunyɛnu ye ko, “Ni wo ye n fɛ, mɔgɔ-wo-mɔgɔ kana bɔ Ramɔti soe kɛ burɔ ka ta koe kɛ rakaran Yɛsɛreli soe burɔ.”

¹⁶ A yɛlɛta ala kirindi rɔ ka Yɛsɛreli kilɛ bira, ado Yuda Mansa Ehasaya ye Mansa Yɔram kɔndɔn tinɛ bawo ala tɛlɛnu ma kɛndɛya wɛ.

¹⁷ Tara-makandannɛ min bi Yɛsɛreli soe tarɛ kuma, wo ya Mansa Yehu anubɛ a ta-nyɔgɛnu yen nala. Wo ya a kan nakɛ mɔgɛnu ma ko, “N bara mɔgɛ donu yen nala kɔɔ!” Mansa Yɔram ya a fɔ ko, “Wo ni so-laburilɛ do lata ka anu mafɛlɛn ni ma yogenu denu, ka, ni ma nyinyɛnu denu.”

¹⁸ So-laburilɛ wo tara Mansa Yehu taran. A ya a manyinika ko, “A sɔgɛ ye mansɛ la, a ni a lɔn ni a nyinyɛ le wole la, ka, ni a yoge le wo la.” Mansa Yehu ya a fɔ a ye ko, “Ileta sa wo rɔ. Kofu ma ma.” Tara-makandannɛ wo ya a fɔ ko, “Min tara anu mafɛlɛn tinɛ, n ma wo yen sɛgila tun.”

¹⁹ Anu ya mɔgɔ kelen nata tun. Wo ke Mansa Yehu ma, wo ya nyinikali-sufa wo le sa. Mansa Yehu ya a fɔ wo fanan ye tun ko, “Ileta sa wo rɔ. Kofu ma ma tun.”

²⁰ Tara-makandannɛ wo ya a fɔ tun ko, “A fila nyɔgɛ min tara anu mafɛlɛn tinɛ, n ma wo fanan yen sɛgila tun de!” Ale tara-makandannɛ wo ya a fɔ tun ko, “Mɔgɛ min sɔnɛ anu yarɔ, wo ye kirindi laburila iko yuwɛ, ado Nimisila den Yehu si kirindi laburi wo nya na le.”

²¹ Mansa Yɔram ya a fɔ ko, “Wo ni nna kirindi rabɛn.” Anu ban wo mala, anubɛ Yuda Mansa Ehasaya sigira anuna kirindinu tɔ ka ta Mansa Yehu labɛn tinɛ. Anu tara bɛn Yɛsɛreli kɛ Nebɔtila wɔli-kɛ-tina-kɔrɛ rɔ.

²² Mansa Yɔram ya Mansa Yehu manyinika ko, “I nara a nyimɛ le la, ka, a yogomɛ?” Mansa Yehu ya a fɔ a ye ko, “I na ya suwagayɛ anubɛ bɛsi-kɔ-koe min nawara ma tɛma, fananta wo ye ma tɛma, ma ti yisi-kimɛ sɔrɔn.”

²³ Mansa Yɔram ya ala kirindi tintan ka a buri. A ya a dɛ sa-a-rɔ ka a fɔ Mansa Ehasaya ye ko, “Anu bara murutiya n ma. Anu bi nna bu-koe le tɔ kɛ la.”

²⁴ Mansa Yehu ya ala kalabɛn rasagan a fanka-wɛ la ka Mansa Yɔram bon a kanban kun filɛ tɛma. Kalabɛn wo donta ka ta ha a sɔn-kole. A buira ala kirindi rɔ.

²⁵ Mansa Yehu tatugunnɛ min tɔgɛ Bidika, ale Yehu ya a fɔ wo ye ko, “Ta a furi bi kirindi rɔ ka a labui Nebɔtila wɔli-kɛ-tinɛ kɛ rɔ.” Mansa Yehu ya a fɔ Bidika ye tun ko, “Ma ye kirindi laburila Mansa Yɔram kɛ fa Mansa Ehabu kɔma wati min, i ma i hɛnkili to wo ko nun? Wati wo rɔ, Mari kumara Mansa Ehabu ma, a ko

²⁶ a ya a yen anu bara Nebɔti anubɛ ala dannu faga yan kunu. A ko fɔ a wa a tɔrɔ kan-tina-kelan kɛ rɔ yan. Woletɔ i ni ta Mansa Yɔram furi bi ka a labui Nebɔtila wɔli-kɛ-tinɛ kɛ rɔ alako ka Marita kumɛ latɔnbagaya.”

Mansa Ehasaya Faga-Koe Mansa Yehu Bolo

²⁷ Anu ya min ma Mansa Yɔram na, wo rayen Yuda Mansa Ehasaya bolo, a ya ala kirindi bi ka a buri tala Bɛti-Hagan wara la. Mansa Yehu anubɛ ala kɛlɛ-dannu bi a gbere la. Mansa Yehu ya a fɔ ala kɛlɛ-dannu ye ko, “Wo ni wo fanan faga.” A burimatoe ye tala Kari soe burɔ min bi Ibiliyam soe dafɛ. Anu ya a bon nyɔ le. Kɔnɔ a ya a ragbɛlɛya ka ta ha Magidɔ soe burɔ. A fagara nyɔ le.

²⁸ Ala mɔgɔ-banu ya a furi bi kirindi rɔ ka ta a togon Mansa Dawuda halala-luyi ma Yerusalɛm soe burɔ.

²⁹ Mansa Ehabula den Mansa Yɔramna mansayɛ san tan-ni-kelen nyɔgɛ Isirɛla nyamanɛ rɔ, Ehasaya mara mansɛ la Yuda nyamanɛ kun na san kelen pe wo le ma.

Yɛsɛbɛli Faga-Koe Mansa Yehu Bolo

³⁰ Wo kɔma, Mansa Yehu wulita ka ta Yɛsɛreli soe burɔ. Mansa Ehabula kɛɛ-musi Yɛsɛbɛli wo ya a lamɔɛn min kɛ ko Mansa Yehu min ya ala dan faga, wo ara na, a ya a ya-siyi lafin ka a kunyɛ rabɔ. A ya a sɔ mansɛla bolɔn wundan la ka a yɛ layigi kilɛ ma.

³¹ Mansa Yehu tenbimatoe ka don soe burɔ, Yɛsɛbɛli ya Mansa Yehu rasɛ nyinikalɛ la ko, “Simiri ya ala mansɛ faga tumɛ min, nfen mara wo la?”

³² Mansa Yehu ya a yɛ layɛlɛ a ma ka nyinikalɛ kɛ, a ko, “Mɔgɛ donu bi san ma nyɔ minnu bi n fɛ, wa?” Musi wola yɔɔn mɔgɔ-dande ya anu kunyɛ labɔ ka anu yɛ layigi Mansa Yehu ma.

³³ Mansa Yehu ya a fɔ wonu ye ko, “Wo ni a latosokoro dugi ma.” Wonu ya ale musi latosokoro. A yele pusenta dandan anubɛ soeenu ma. Mansa Yehu ya ala soeenu anubɛ ala kirindi bi ka a furi dɛgbɛ.

³⁴ Mansa Yehu donta mansɛla bɔn wo la ka fen-dɔn kɛ ka a min. Wo kɔma, a ya a fɔ mɔgɛnu ye nyɔ rɔ ko, “Wo ni dankatoe wo furi bi ka ta a togon bawo wo ya a lɔn mansa-dan le.”

³⁵ Kɔnɔ minnu tara musi wo furi bi tinɛ ka a togon, wonu ma fenfen taran nyɔ fɔ a kun-kole anubɛ a bolo-kole anubɛ a kin-kole.

³⁶ Wonu nara wo fɔ Mansa Yehu ye min kɛ, a ya a fɔ ko, “Mari ya kɛ le fɔ ala wɔli-kɛlɛ Nɛbi Ilaya Tisibi kɛ ye ko, ‘Wulinu si Yɛsɛbɛli soge dɔn Yɛsɛreli soe burɔ.

³⁷ A ko a toe min bi tola, wo ra si nyɛnsɛn dugi ma iko ninki-nyɛ. Mɔgɔ-wo-mɔgɔ ti sui a ma tun ko Yɛsɛbɛli le.’ ”