2 Mansɛnu 6 - ALLALA KUMƐ

Tɛgɛran-Mɛlan Layɛlɛ-Koe Yi Kuma Nɛbi Ilaisa Bolo

¹ Lunyɛ do, Nɛbi Ilaisala karan-den donu nara anu masigima-koe fɔ a ye ko, “Mala bɔn radɔgɔ.

² Ma ta Yorodan bɛ dafɛ ka bon-kɔn donu tɛgɛ. Ma ni bɔn do sɔ nyɔ rɔ.” Nɛbi Ilaisa sɔnta wo ma.

³ Ala karan-den kelen ya ale Nɛbi Ilaisa madiya ko a ni ta anu fɛ kɔn tɛgɛ tinɛ. Ale nɛbi sɔnta wo ma.

⁴ A bilara anu fɛ. Anu ke Yorodan bɛ dafɛ, anu donta kɔn-tɛgɛ rɔ.

⁵ Mɔgɔ kelen bi kɔn tɛgɛla, tɛgɛran-mɛlan bɔra a la a bolo ka bui yi rɔ. A ya a kan nakɛ Nɛbi Ilaisa ma ka a fɔ a ye ko, “N fa, n ya mɔgɔna-tɛgɛran min sinka, wo mɛlan ara bɔ a la n bolo ka bui yi rɔ. N si nfen ma gbɛ?”

⁶ Nɛbi Ilaisa ya a fɔ a ye ko, “A buira mintɔ?” Keminɛ wo ya nyɔ yira a la. Ale nɛbi ya kɔlɔma-bolɔn do tɛgɛ a la ka a lakɛ yi rɔ. Tɛgɛran-mɛlan wo yɛlɛta yi kuma.

⁷ Nɛbi Ilaisa ko, “A bi nyɔ.” Kei wo ya a bole lata ka a bi.

Kɛlɛ-Tinya-Koe Siriya anubɛ Isirɛla Tɛma

⁸ Siriya mansɛ anubɛ Isirɛla mansɛ kɛlɛta. Siriya mansɛ ya a kun nayigi ala kɛlɛ-den-kunyɛnu fɛ alako anu ni a lɔn anu si ta anu daga makɛ kan min.

⁹ Kɔnɔ yanni anu ni anu daga makɛ kan tinɛ min, Nɛbi Ilaisa si kilayɛ lata Isirɛla mansɛ ma ko Siriyanu bara ta anu daga makɛ pan tɔ, ale kana a gbɛrɛn nyɔ ma bawo Siriyanu bi a lapɛrɛnna.

¹⁰ Siriyanu bi tala anu daga makɛla Isirɛla mɔgɛ minnu da la, Isirɛla mansɛ ya wonu makawandi alako anu ni anu mabɛn Siriya wonu yarɔ. A tora mala wo nya le tuma-wo-tuma.

¹¹ Wo tora Siriya mansɛ yisi magboyala. A ya ala kɛlɛ-den-kunyɛnu kundɛn ka anu manyinika ko, “Yon sɔnɛ Isirɛla mɔgɛ kɛnu fɛ?”

¹² Ala kɛlɛ-den-kun kelen bi nyɔ, wo ya a fɔ ko, “Mansɛ, wo mɔgɔ sa ma tɛma. Hali i ya wɛwɛ le sa ila bɔn la, Nɛbi Ilaisa si ta wo rakaran Isirɛla mansɛ ye.”

¹³ Mansɛ wo ya a fɔ anu ye ko, “Wo ta a nyini. Ni wo ya a yen kan min, wo ni na a fɔ n ye. N si a biralɛnu nata.” Kilayɛ wonu nara tumɛ min ka a fɔ Siriya mansɛ ye ko Nɛbi Ilaisa ye Dotan soe burɔ,

¹⁴ mansɛ ya ala kɛlɛ-den-siyaman anubɛ anuna soeenu anubɛ anuna kirindinu nata nyɔ rɔ. Anu kera Dotan soe ma suyi rɔ ka soe lamini.

¹⁵ Wo banda kɛ subaga, Nɛbi Ilaisala wɔli-kɛlɛ ya a lawuli tumɛ min ka bɔ luyi ma, a ya Siriya kɛlɛ-den-siyaman yen anubɛ soeenu anubɛ kirindinu kan tinɛ bɛɛ Dotan soela foolɛ rɔ. A donta bɔn la ka a fɔ Nɛbi Ilaisa ye ko, “N tigi, Siriyanu bara na de, ma si kɛ ma kama?”

¹⁶ Nɛbi Ilaisa ya a fɔ a ye ko, “I kana kilan. Mata kɛlɛ-dannu siya anuta kɛlɛ-dannu ko.”

¹⁷ Wo kɔma, a ya mataralɛ kɛ, a ko, “Mari, nta wɔli-kɛlɛ kɛ yɛ laka alako a ni fen yen kɛ.” Wo le ya a to, Mari ya a kan wo lamɔɛn. A ya a ma, Nɛbi Ilaisala wɔli-kɛlɛ wo yɛ lakara Allata kɛlɛ-dannu ma. Wɔli-kɛlɛ wo ya a yɛ lata kɔnkɛnu ma soela foolɛ rɔ. A ya soeenu anubɛ kirindinu yen ta-mɛlan la anu bolo kan tinɛ bɛɛ rɔ kɔnkɛ wonu ma.

¹⁸ Siriyanu nara anu kan ma tumɛ min, Nɛbi Ilaisa ya matarali-kɛ, a ko, “N Mari, ma yoge kɛnu nafiyonya.” Mari ya ala kumɛ wo lamɔɛn ka mɔgɛ wonu nafiyonya.

¹⁹ Nɛbi Ilaisa tara anu nabɛn kilɛ la. A ya a fɔ anu ye ko, “Wo ara to-a-rɔ. Wo ye soe min nyini tinɛ, wo ma kɛ la. Wo ni bila n fɛ, wo ye kei min nyini tinɛ, n ni ta wo yira wo la.” A tara anu na Isirɛla mɔgɛnuta so-karantan rɔ.

²⁰ Anu ke soe wo burɔ, Nɛbi Ilaisa ya matarali-kɛ tun, a ko, “Mari, anu yɛ laka. Anu ni fen-yen-kɛ.” Mari ya a kuman-kan wo lamɔɛn ka anu yɛ laka. Anu tɛrɛnara anu nyɛrɛ la anu yogenu barɛ Samariya soe burɔ.

²¹ Isirɛla mansɛ ya Siriya kɛlɛ-dan wonu yen tumɛ min, a ya Nɛbi Ilaisa manyinika a ko, “N fa, n ni anu faga? N ni anu faga fasai?”

²² Nɛbi Ilaisa ko, “I kana anu faga. Minnu bara anu niyi latenbi i ma, mɔgɔ ti wo faga. I si min ma, i ni anu de-nyini ka anu nasɛgi anu tigi ma.”

²³ Wo le ya a to, Isirɛla mansɛ ya ladiyɛ kɛ anu ye. A ban anu nafala, a ya anu nasɛgi anuna mansɛ ma. Ka a dabira wo-wulɔn-tele ma ha, Siriyanu ma bui Isirɛla mɔgɛnu ma tun.

Kɛlɛ Bui-Koe Samariya Soe Burɔ

²⁴ Wati tenbinɛ, Siriya Mansa Bɛnhedadi nara ala kɛlɛ-dan bɛɛsi la Isirɛla mɔgɛnu kan ma. Anu nara bui Isirɛla so-karantan Samariya ma.

²⁵ Kɛlɛ wo tora-a-la ha, kɔnkɔ-fitinɛ donta anuna so-karantan wo rɔ. Kɔnkɛ wo gbɛlɛyara ha, sofɛli-kunyɛ santa wodi-gbɛ-gbuni bi-segin la, ado hali kangbo-bo-gbalɛ yi-lafɛ-nya kelen, wo santa wodi-gbɛ-gbu-ni loli la.

²⁶ Isirɛla mansɛ tenbimatoe soe tarɛ kuma, a ya musi kelen worondo-kan lamɔɛn, musi wo ko, “N fa, n dɛnbɛ.”

²⁷ Ale mansɛ ya a fɔ musi wo ye ko, “Ni Mari ma ile dɛnbɛ, nde si i dɛnbɛ kama? Dɔn-fan do le nde bolo anubɛ minni-fan?

²⁸ Nfen mara?” Musi wo ko, “Wulɔn, mabɛ musi kɛ ya a rabɛn ko ma ni nta dan dɔn, wo banda kɛ, ma ni ale fanantɛ dɔn,

²⁹ ado ma ya ntɛ faga ka a dɔn. Wo banda kɛ, n tara a wara n ko ma ni atɛ dɔn gbɛ kɔnɔ n ya a taran, a ara atɛ dogon.”

³⁰ Mansɛ ya kumɛ kɛ lamɔɛn nya min na, a ya ala duruki rafara a kan na. Mɔgɛ minnu bi mansɛ dafɛ, wonu ya a yen ko kasa-duruki le ala duruku-kɔrɔ-don la.

³¹ Ale mansɛ ya a fɔ ko, “Ni Safatila den Nɛbi Ilaisa kɛ kunyɛ ma tɛgɛ a la bi, alamɛ Mari ya n faga.”

³² Mansɛ wo ya mɔgɛ do lata Nɛbi Ilaisa ma. Wo wati ya a taran, Nɛbi Ilaisa anubɛ mɔgɔ-ba donu siginɛ ale Nɛbi Ilaisala bɔn la. Yanni mɔgɛ wo ni ke, a ya a fɔ mɔgɔ-ba wonu ye ko, “Mansɛ mɔgɔ-fagalɛ, ala mɔgɛ wo ara na n kunyɛ tɛgɛ tinɛ a la. Ni a kera yan, wo ni kɛ dɛ ma ka a latogon gbuturu! Wo kana sɔn, a ni don n kuma muk! Ale mansɛ nyɛrɛ ye nala a kɔma serr!”

³³ A ye banna kumɛ kɛ fɔla wo gbetu, mansɛ wo kera. Mansɛ wo ko, “Mari le ya tɔrɔyɛ kɛ bɛɛ lana ma kuma. N si Marita dɛnbɛnɛ wo makɔnɔ nfen ko la tun?”