2 Mansɛnu 4 - ALLALA KUMƐ

Kɛɛ-Musi Do Dɛnbɛn-Koe Nɛbi Ilaisa Bolo

¹ Nɛbi dola kɛɛ-musi nara Nɛbi Ilaisa wara ka a fɔ a ye ko, “N fa, n nara i wara le. Nna kei ara faga. I ya a lɔn ko mɔgɛ le wo la nun min bi Alla gbiliyala. Kɔnɔ yaga, mɔgɛ dola yili ye a la nun. Yilima-tigi wo ye nala le nna den filɛ bi tinɛ ka ta anu ma yɔɔn la nna keila yili wola ko la.”

² Nɛbi Ilaisa ya a fɔ a ye ko, “A sɔgɛ ye i la, n ni nfen ma i ye? Nfen bi i bolo bɔn la?” Kɛɛ-musi wo ya a fɔ a ye ko, “Fenfen sa n bolo bɔn la fɔ tulu-bara-dɔgɔmani kelen.”

³ Nɛbi Ilaisa ya a fɔ a ye ko, “Ta, miran-siyaman sinka i sigi-nyɔgɛnu ma.

⁴ Wo kɔma, wobɛ ila den filɛ wonu ni ta bɔn burɔ, wo ni dɛ latogon. Wo ni tuli wo kɛ miran wonu tɔ. Miran min na wa fa, wo ni wo sigi a dan na.”

⁵ Anu tara miran wonu sinka iko nɛbi wo ya a fɔ a ye nya min. Anu donta bɔn la ka dɛ latogon. Ala dan wonu tenbi miran minnu sigila, ale ye tuli kɛla wonu tɔ ka bɔ ala tulu-bara-dɔgɔmanɛ wo rɔ.

⁶ A ban miran wonu nafala, a ya anu manyinika, a ko, “Miran-takolɔn donu bi nyɔ tun?” Ala dan do ya a fɔ a ye ko, “A laban le i kɔrɔ wo la.” Miran wo lafara tumɛ min, tulu ma bɔ tun.

⁷ Musi wo tara Nɛbi Ilaisa wara tun ka a nya rakaran a ye. Nɛbi Ilaisa ya a fɔ a ye ko, “Tuli wonu mayira. I ni ila keila yili sara. A wodi-toe si ma wobɛ ila dannu de-nyini-fan la.”

Nɛbi Ilaisa anubɛ Sunam Musi Wara-Koe

⁸ Lunyɛ do, Nɛbi Ilaisa tara Sunam soe burɔ. Musu-nɔnfulu-tigi do siginɛ soe wo burɔ. Musi wo ya Nɛbi Ilaisa kele fen dɔn tinɛ. Ka a bi wulɔn ma ha a mɛra gbɛ, a wa ta nyɔ tuma-wo-tuma, a si fen-dɔn-kɛ musi wo warɛ.

⁹ Musi wo ya a fɔ ala kei ye ko, “Kei min bi nala ma wara tuma-wo-tuma, Allata mɔgɔ-sɛnimɛ le.

¹⁰ Ma ni bon-nɛ do sɔ a ye, mala bɔn kɛ kuma. Ma si sa-fan, anubɛ tebulu, anubɛ waganɛ, anubɛ lɛnpu ladon nyɔ. A wa na ma kɔndɔn tinɛ tuma-wo-tuma, nyɔ si ma a yiyɛ la.”

¹¹ Lunyɛ do, Nɛbi Ilaisa nara Sunam soe kɛ burɔ tun. A tara a yiyɛ wo la, anu ya min tabɛn a ye. A ya a sa nyɔ.

¹² A ya ala wɔli-kɛlɛ Kɛhasi kele ko a ni ta ala sundan-yiya-tigi-musi wo kele. Musi wo nanɛ,

¹³ Nɛbi Ilaisa ya a fɔ Kɛhasi ye ko, “Musi kɛ ara tɔrɔ ma ye. A manyinika, male ni nfen ma a ye? Tumado a sɔgɛ ye a la, ma ni ta mansɛ le wara, ni wo ma, kɛlɛ-kurugbɛ wara ka ta kuma wonu na a ye?” Musi wo ko, “N bi nyinina fan min bɛɛsi ma, wo ye n bolo nna mɔgɛ kɛnu tɛma.”

¹⁴ Wo kɔma, Nɛbi Ilaisa ya a fɔ Kɛhasi ye tun ko, “Ma si nfen ko-nyima kɛ musi kɛ ye?” Kɛhasi ya a fɔ ko, “Nde ya min yen musi kɛ wara-koe rɔ, den-kei sa a bolo, ado ala kei ara kɔrɔya.”

¹⁵ Nɛbi ya a fɔ Kɛhasi ye worɔ ko, “A fɔ a ye ko a ni na bɔn burɔ yan.” Musi wo nara sɔ bonda-dɛ la.

¹⁶ Nɛbi Ilaisa ya a fɔ musi wo ye ko, “Kɛ-nyɔgɔn-tumɛ yari, a si a taran, den-kei siginɛ i kɔnkɔn tɔ.” Musi wo ko, “N fa, i yandi, Allata mɔgɛ le ile la. I kana foninyɛ fɔ n ye.”

¹⁷ Musi wo ya dan sɔrɔn wo san-nasɛgi-wati rɔ iko Nɛbi Ilaisa ya a fɔ a ye nya min.

Sunam Musila Dan Faga-Koe

¹⁸ San-dande tenbinɛ, dan wo min sɔrɔnta wo la, wo ya a fa sagaran sɛnɛ rɔ dɔn-fen-tɛgɛ-wati.

¹⁹ Kɔnɔ a ma mɛ, kun-dumɛ ya dennɛ wo bira latiriya-bole wo ma. Dennɛ wo dira kun-dumɛ wo kɔrɔ. A fa ya a fɔ ala wɔli-kɛlɛ do ye ko a ni ta dan wo la a na wara soe.

²⁰ Wɔli-kɛlɛ wo tara dan wo to a na ma tumɛ min, a na ya dan wo sigi a kian kuma. Ka a bi sɔgɔmɛ wo ma ha tele latelan, dan wo niyi bɔra.

²¹ Musi wo ya dan wo bi ka ta a sa Nɛbi Ilaisa yiyɛ la. A bɔra ka dɛ latogon furi wo ma.

²² A ya ala kei kele ka a fɔ a ye ko, “Wɔli-kɛla kelen anubɛ sofɛlɛ ni na yan. N bi tala Nɛbi Ilaisa wara. N bi nala kaka.”

²³ Ala kei ya a manyinika ko, “Nfen bi a mala, i ye tala bi? Mɔgɔ si ta nɛbi wara bi? Sulen-Tele le ma bi, ni wo ma, Karɛ-Kurɛ-Ladɛn?” Kɔnɔ musi wo ya a fɔ ko, “N fa, i yisi ni kimɛ. Ma tele, yo. N si i taran.”

²⁴ Musi wo ya kirikɛ sa sofɛlɛ wo kuma. Ala wɔli-kɛlɛ min bi bilala a fɛ, a ya a fɔ a ye ko, “Sofɛlɛ kɛ lagbengben. A ni a kian latiriya. A kana tagama a fɛrɛma de fɔ n ba a fɔ i ye.”

²⁵ A sigira sofɛlɛ wo la. Anu ya Kamɛli kɔnkɛ kilɛ bira nɛbi wo siginɛ kan min. Nɛbi Ilaisa ya musi wo namatoe yen wula-yan la min kɛ, a ya a fɔ ala wɔli-kɛla Kɛhasi ye ko, “I yɛ lata Sunam musi wo ma nala pan.

²⁶ I buri tala a labɛnna ka a manyinika ni ala mɔgɛ bɛɛsi kɛndɛ.” Kɛhasi kenɛ ale musi wo ma, a ya musi wo manyinika. Musi ko, “Tana sa nyɔ.”

²⁷ Kɔnɔ ale musi kenɛ Nɛbi Ilaisa ma, a ya a gbesi dugi la ka Nɛbi Ilaisa kian bira. Kɛhasi ko a ni ale musi bɔ nyɔ kɔnɔ Nɛbi Ilaisa ma sɔn. A ko, “A to nyɔ. I ma a lɔn kɛ yisi tɔrɔnɛ le a ma kɛ la, ado Mari ma fenfen fɔ n ye ala ko rɔ, wa.”

²⁸ Musi wo ya a fɔ ale nɛbi ye ko, “N fa, nde le ya i manyinika den-sɔrɔn-koe la nun? N ma a fɔ i ye nun ko i kana n yili-madiya?”

²⁹ Nɛbi Ilaisa ya a tintan ala wɔli-kɛla Kɛhasi la ka a fɔ a ye ko, “I buri tala nna sewuri kɛ la. I kana kuma mɔgɔ-wo-mɔgɔ la kilɛ la. Ni mɔgɛ do kumara i la, i kana a yabi. Ta sekeke! I wa ke bɔn la, i ni nna sewuri kɛ sa furi wo yakɔrɛ kuma.”

³⁰ Musi wo ya a fɔ Nɛbi Ilaisa ye ko, “N bara n keli Mari-nimɛ anubɛ ile ye ko n ti i to yan!” Wo le ya a ma, Nɛbi Ilaisa ya a lasɔ ka bila a fɛ.

³¹ Kɛhasi ya a buri tala anu yarɔ. A ke dennɛ wo furi ma, a ya nɛbila sewuri sa a yakɔrɛ kuma. Kɔnɔ hali wo, dennɛ wo niyi ma sɛgi a rɔ. Wo kɔma, Kɛhasi burimatoe sɛgira ka ta Nɛbi Ilaisa kun-kɔrɔ-bɛn. A ke a ma, a ya a fɔ a ye ko, “Dan wo niyi ma sɛgi a rɔ muk!”

³² Nɛbi Ilaisa nyɛrɛ kenɛ, a yɛlɛta bɔn la. A ya dennɛ wo furi sanɛ taran a yiyɛ wo la.

³³ A ya dɛ latogon a kɔma ka Mari matara.

³⁴ Wo kɔma, a ya a sa furi wo kuma. A ya a dɛ bɛn a dɛ ma ka a yɛ bɛn a yɛ ma ka a bole sa a bole kuma. A sanɛ tora dan wo kuma, ha a fɛrɛ kaliyara.

³⁵ Nɛbi Ilaisa ya a lasɔ ka a matagama bon kole ma. Wo kɔma, a tara a sa dan wo kuma iko a ya a ma nya min fɔlɔn. Furi wo tisora iko wɔrɔnfila. A ya a yɛ maka.

³⁶ Nɛbi Ilaisa ya Kɛhasi rakele ko a ni ta dan wo na kele a ye. Kɛhasi tara ale musi kele. Musi wo ke bɔn burɔ, nɛbi ko, “Hɔn, i ma ila dan yen.”

³⁷ Musi wo ya a sa dugi ma Nɛbi Ilaisa kɔrɔ. Wo kɔma, a ya a lasɔ ka ala dan bi ka ta.

Mɔgɔ-Faga-Fan Ke-Koe Dagɛ Rɔ

³⁸ Wati do kera, kɔnkɔ-fitinɛ donta Isirɛla nyamanɛ rɔ. Wo ya a taran, Nɛbi Ilaisa ara sɛgi Kiligali, a ye nɛbinu karanna. A ya a fɔ ala wɔli-kɛlɛ ye ko a ni daga-belebele sigi tɛ rɔ alako a ni pɔrɛ do ladan.

³⁹ Ala karan-dan do tara binyɛ rɔ ka manfan donu keri. A ya nɔnbɛ do taran. A ya wo gbɔɛ donu keri ka a kɛ ala duruki dɛ la ka ta a la. A ke a la a ta-nyɔgɛnu ma, a ya nɔnbɔ-gbɔɛ wonu tatɛgɛ ka a kɛ pɔrɛ kuma dagɛ rɔ. Hali wo, a ta-nyɔgɛ wonu ma nɔnbɔ-gbɔɛ wo lɔn.

⁴⁰ Anu ya pɔrɛ wo bɔ a rɔ tumɛ min, a ta-nyɔgɛ minnu ya a mafɛlɛn, wonu ya anu kan nabɔ Nɛbi Ilaisa ma. Anu ko, “E, Allata mɔgɛ, faga-fan le dagɛ rɔ kɛ la.” Anu ma ke a dɔnna.

⁴¹ Nɛbi Ilaisa ya dɛgɛ-munke makele ka a kɛ dagɛ wo rɔ. A ya pɔrɛ wo do di karan-dan wonu ma. Anu ya a dɔn. Pɔrɛ wo mara dɔn-fen-bɛrɛ la tun.

Mɔgɔ Kɛmɛ Rabɔ-Koe Dɔn-Fen-Nɛ La

⁴² Lunyɛ do, kei do bɔra Beyali-Salesa soe burɔ ka na dɔn-fen kun-fɔlɛ biredi mogan na Nɛbi Ilaisa ye. A nara fui-fan wo tɔnsɔn-kiri donu na fanan. Nɛbi Ilaisa ya a fɔ ala wɔli-kɛlɛ ye ko a ni wonu ma karan-dan wonu de-nyini-fan la.

⁴³ Kɔnɔ ala wɔli-kɛlɛ wo ya a fɔ a ye ko, “E, kɛ si mɔgɔ kɛmɛ rabɔ?” Kɔnɔ Nɛbi Ilaisa ya a fɔ a ye ko, “Ile ni a di anu ma tun bawo Mari ko anu si kɛ dɔn, a toe ni to.”

⁴⁴ Wɔli-kɛlɛ wo ya dɔn-fan wo sigi anu kɔrɔ. Anu damasi ya dɔn-fan wo dɔn. A toe tora iko Mari ya a fɔ Nɛbi Ilaisa ye nya min.