2 Mansɛnu 25 - ALLALA KUMƐ

Yerusalɛm Kɛnu Nɔ-Koe Babilɔn Mansɛ Bolo

¹ Wo le ya a ma, Mansa Nɛbukanasa nara ala kɛlɛ-dannu na ka bui Yerusalɛm soe ma. Wo mara Sɛdɛkayala mansayɛ san kɔnɔntɔ, a karɛ tan, tele tan nyɔgɛ ma. Anu ya anu daga makɛ nun Yerusalɛm soe tarɛ kɔma. Anu ya bɔnkɛ ladɛn a nyɔgɔn kuma tala tarɛ kɔma alako anu ni ke kilɛ sɔrɔnna so-burɔ-mɔgɛnu ma.

² Anu tora kɛlɛ wo kun na nyɔ rɔ ha Sɛdɛkayala mansayɛ san tan-ni-kelen-nyɔgɛ ma.

^3-4 A san tan-ni-kelen nyɔgɛ, a karɛ nani, tele kɔnɔntɛ ma, Babilɔn kɛnu kera tarɛ punsɔgɔla ka don. Wo ya a taran, kɔnkɛ ara mɔgɛnu malɔfɔkɔrɔya, fenfen sa anu si min dɔn. Hali Yerusalɛm soe lafoonɛ Babilɔn kɛlɛ-dannu na kɔnɔ Yerusalɛm mansɛ anubɛ ala kɛlɛ-dannu ya anu buri tala pinpi rɔ. Anu tenbira anuna mansɛla nako-rɔ-kilɛ la. Tara kun da filɛ latugun tinɛ, anu tenbira nyɔ le. Anu tara Yorodan-ba-lɛɛ wara la.

⁵ Kɔnɔ hali wo, Babilɔn kɛlɛ-dannu ya anubɛ anuna mansɛ sagaran. Anu ya Mansa Sɛdɛkaya bira gbɛkole do ma Yɛrikɔ soe dafɛ. Ala kɛlɛ-dannu ya a boloka ka a to a yogenu bolo la.

⁶ Anu tara Mansa Sɛdɛkaya la pon fɔɔ Babilɔn Mansa Nɛbukanasa ma Ribila soe rɔ. Anu bi nala a tɔrɔyala nya min, anu ya wo fɔ a ye.

⁷ Anu ya ale Mansa Sɛdɛkayala den-keinu faga a nyɛrɛ yakɔrɔ nyɔ. Wo kɔma, Mansa Nɛbukanasa ya a ma, anu ya Mansa Sɛdɛkaya yɛnu bɔ a kolɔn rɔ. Anu ya yɔlɔkɛ kɛ a ma ka ta a la Babilɔn nyamanɛ rɔ.

Mari Bato-Bɔn Kasara-Nya

⁸ Mansa Nɛbukanasala mansayɛ san tan-ni-kɔnɔntɛ, a karɛ loli, tele wɔrɔnfila nyɔgɛ ma, Mansa Nɛbukanasala mɔgɔ-ba do donta Yerusalɛm soe burɔ, ado ala kɛlɛ-den-kunyɛ le fanan. Wo tɔgɛ le Nɛbusaradan.

⁹ Anubɛ ala kɛlɛ-dannu ya tɛ tugu Mari Bato-Bɔn la anubɛ mansɛla bolɔn la anubɛ mɔgɔ-banuna bɔnnu na.

¹⁰ Babilɔn kɛlɛ-dannu ya tarɛ-toe wo damasi keri Yerusalɛm soela foolɛ rɔ.

¹¹ Boloma-wɔli-kɛlɛ minnu tora soe burɔ wo, minnu ya anu buri ka ta kofu Babilɔn kɛnu ma wo, Yuda nyamanita-mɔgɛ toenu wo, kɛlɛ-den-kunyɛ wo tara wonu na Babilɔn nyamanɛ rɔ.

¹² A ya minnu to Yuda nyamanɛ rɔ, fɔ bolo-kolon-gbɛnu, wɔli-kɛ-tina sa minnu bolo. A ya wonu to sɛni-ko-wɔlɛ kun na.

¹³ Mari Bato-Bɔn sɛnbɛrɛn-kɔn minnu nadannɛ silɛɛ la wo, kenkirɛ minnu nadannɛ silɛɛ la wo, yi-sigi-kunan min nadannɛ silɛɛ la wo, Babilɔn kɛlɛ-dannu ya wonu tinya ka ta silɛɛ wonu na anu bolo.

¹⁴ Mari Bato-Bon-miran min bɛɛsi ladannɛ silɛɛ la, a sɔbulu wo, a bugura-makɔ-fen wo, a saraba-tɛgɛ-fen wo, a yele-bira-fen wo, a isɛnti-mintan-fen wo, anu tara wo dama la.

¹⁵ Miran minnu nadannɛ sɛnɛ anubɛ wodi-gbɛ la, a ta-kɔ-miran wo, anubɛ a daganɛnu wo, anu tara wonu fanan na.

¹⁶ Mansa Silamɛni ya fan minnu nadan silɛɛ la wo, a sɛnbɛrɛn-kɔn filɛ wo, a yi-sigi-kenkirɛ wo, anubɛ yi-sigi-kunan wo, wonu gbili ha mɔgɔ ti anuna gbiliyɛ-dan lɔn.

¹⁷ Sɛnbɛrɛn-kɔn wonu takɛn. Anuna yanyɛ ya nunkan-nya tan-ni-segin tan-ni-segin bɔ. Anu kunna-sɛnu natugunnɛ anu na. Kunna-sɛ wonuna yanyɛ nunkan-nya sawa-sawa. Kunna-sɛ wonu nafoonɛ sila-yalɛnu na. Kɔn-gbɔɛ min tɔgɛ pamakarani, anu ya wola muninyɛ ladan silɛɛ la nun. Wonu tugunnɛ kunna sɛ wonu na sila-yalɛla minɛ rɔ a kuma.

Kɛlɛ Ta-Koe Yuda Mɔgɛnu Na

¹⁸ Saraka-Masɔla-Kun-Tigi-Wɛ Sɛraya wo, a kan-kɔrɔ-sigilɛ Sɛfanaya wo, Bato-Bɔn bonda-da-makandanna mɔgɔ sawɛ wo, Nɛbusaradan ya wonu dama bira.

¹⁹ Wo kɔma, a kɛlɛ-den-kun wo, a mansa-hɛnkili-kɔla mɔgɔ lolɛ wo, a kɛlɛ-den-kunyɛ wola kɛdi-sɛbɛla wo, a Yerusalɛm mɔgɔ-ba bi-wɔrɛ wonu wo,

²⁰ ale Nɛbusaradan ya wonu dama bira Yerusalɛm soe burɔ ka ta anu na pon Babilɔn mansɛ wara Ribila soe burɔ.

²¹ Anu ke anu na Ribila soe burɔ Hamati nyamanɛ rɔ, Babilɔn mansɛ ya Yerusalɛm kɛ wonu gbesi ka anu faga. Kɛlɛ tara Yuda mɔgɛnu na ka le.

Yuda Nyamanɛ Kerifa-Koe Kɛdalaya La

²² Mansa Nɛbukanasa ya Yuda nyamanɛ kerifa Ahaikamna den Kɛdalaya la. A benba tɔgɛ le Safan. Wo tora fugarɛ wonu kun na Yuda nyamanɛ rɔ.

²³ Kɛlɛ-den-kunyɛ anubɛ kɛlɛ-dan minnu ya anu buri kɛlɛ kɔrɔ, wonu ya a lamɔɛn min kɛ ko Yuda nyamanɛ tora Mansa Kɛdalaya bolo, anu tara kofu a ma Misipa soe burɔ. Minnu tara kofu Mansa Kɛdalaya ma, wonu tɔgɛ le kɛnu na, Nɛtanayala den Sumanyila wo, Kareyala den Yohenan wo, Tanhumɛtila den Sɛraya min bɔra Nɛtofa soe burɔ wo, anubɛ Yeyasanaya min bɔra Meyaka soe burɔ.

²⁴ Mansa Kɛdalaya ya a keli anu ye ko, “Hali wo ma kilan Babilɔn mɔgɔ-banu na. Wo sigi nyamanɛ kɛ rɔ. Wo ni to wɔlila Babilɔn mansɛ kɔrɔ. Wo wara-koe si ta a kilɛ fɛ.”

²⁵ Kɔnɔ san wo karɛ wɔrɔnfila nyɔgɛ ma, Nɛtanayala den Sumanyila kɛ, wo tara mɔgɔ tan la a bolo Misipa ka Kɛdalaya faga nyɔ. Sumanyila kɛ, mansa-bon-kɔrɛ-dan do le ale la. A benba tɔgɛ Ilasama. Babilɔn mɔgɛ anubɛ Yuda mɔgɛ minnu siginɛ Mansa Kɛdalaya fɛ, anu ya wonu fanan faga.

²⁶ Wo kɔma, Yuda mɔgɛ bɛɛsi, a bolo-kolon wo, a fen-tigi wo, anubɛ a kɛlɛ-den-kunya-toenu ya anu bɔ Yuda nyamanɛ rɔ ka ta Iyipiti nyamanɛ rɔ bawo anu kilannɛ Babilɔn mɔgɛnu na.

Yɛhoyasin Bɔ-Koe Yele La

²⁷ Ifali-Mɛrodaki mara mansɛ la san min na Babilɔn nyamanɛ rɔ, ale Babilɔn mansɛ wo ya ko-nyimɛ kɛ Yuda mansa kɔrɛ Yɛhoyasin ye ka a labɔ yele la. Mansɛ wo ya a labɔ yele la san bi-sawa ani san wɔrɔnfilɛ, a karɛ tan-ni-fila nyɔgɛ, a tele mogan-ni-wɔrɔnfila nyɔgɛ le ma.

²⁸ Babilɔn mansɛ wo ya a bira boloko-nyimɛ-kɛ. A ya sɔ-tina-belebele di a ma ka tenbi mansa biranɛ doinu na Babilɔn nyamanɛ rɔ.

²⁹ Ale mansɛ ya a rabɛn ko Mansa Yɛhoyasin ni yelela fanɛnu bɔ a ma. Ale mansɛ ya a rabɛn tun ko Mansa Yɛhoyasin kɛ ni to a de-nyinina ale mansɛ warɛ bɔn la a siyi-tele-bɛɛ kɔrɔ.

³⁰ Mansɛ ya a rabɛn ko tele-wo-tele, a si to wodi do dila a ma ka a makoe rabɛn a siyi-tele-bɛɛ kɔrɔ.