2 Mansɛnu 24 - ALLALA KUMƐ

¹ Yahoyakim ye mansayɛ la tumɛ min, Babilɔn Mansa Nɛbukanasa tara bui Yuda nyamanita-mɔgɛnu ma. San sawa Mansa Yahoyakim ye Mansa Nɛbukanasa kɔrɔ. Wo kɔma, a murutiyara a ma.

² Mari ya a ma, nyamani-kun nani mɔgɔ-kurɔn donu wulita Yuda nyamanita-mɔgɛnu kan ma iko Mari ya a fɔ ala wɔli-kɛla nɛbinu ye nya min nun. Kurun do bɔra Babilɔn, do nara ka bɔ Siriya nyamanɛ rɔ, do nara ka bɔ Mohabu nyamanɛ rɔ, anubɛ do nara ka bɔ Amon nyamanɛ rɔ.

³ Mari ya kɛ bɛɛ ma bawo Mansa Manasa ara ko-yogomɛ min kɛ. Wo le ya a to, Mari ya a yɛ firindi Yuda mɔgɛnu ma,

⁴ katarala Mansa Manasa ya mɔgɔ-magbalanɛ minnu faga. Mari ti a makoto ko-yogomɛ wonu na.

⁵ Mansa Yahoyakim ya koe min bɛɛsi ma ala mansayɛ kɔrɔ, wo bɛɛ sɛbɛnɛ Yuda Mansɛnuna Buku do rɔ.

⁶ Mansa Yahoyakim fagara tumɛ min, ala den Yɛhoyasin sigira a gbɛ rɔ.

⁷ Iyipiti mansɛ anubɛ ala kɛlɛ-dannu ma ke bɔla Iyipiti tun bawo Babilɔn mansɛ ara ala nyamanɛ donu bi a bolo ka a bi Yufereti bɛ ma ha ka ke Iyipiti dan doi ma kantɔ-wara la.

Yuda Mansa Yɛhoyasin Wara-Koe

⁸ Yɛhoyasin ya mansayɛ sɔrɔn Yuda nyamanɛ rɔ a sɔrɔn-san tan-ni-segin-nyɔgɛ le ma. A ye mansayɛ la Yerusalɛm soe burɔ karɛ sawa pe. A na le Ɛlinetanna den Nɛhusita min bɔra Yerusalɛm soe burɔ.

⁹ Mansa Yɛhoyasin fanan bilara Mari la iko a fa ya a ma nya min.

¹⁰ Ala mansaya-wati rɔ, Babilɔn Mansa Nɛbukanasa wola kɛlɛ-den-kunyɛnu nara anuna kɛlɛ-dannu na ka bui Yerusalɛm soe ma.

¹¹ Anu buinɛ Yerusalɛm soe ma, wo wati ya a taran, ale Mansa Nɛbukanasa nyɛrɛ ara na soe kan ma.

¹² Yuda Mansa Yɛhoyasin wo, a na wo, ala kɛlɛ-den-kunyɛnu wo, ala bolon-mafɛlɛnnɛnu wo, anubɛ ala mɔgɔ-banu, wonu ya anu nyɛrɛ labelen Babilɔn kɛnu ma. Nɛbukanasala mansayɛ san segin nyɔgɛ ma, a ya Mansa Yɛhoyasin bi ka ta a la birɛ rɔ a bolo.

¹³ Mansa Nɛbukanasa tara fen-kolomɛnu bi Mari Bato-Bɔn anubɛ mansɛla bolɔn la iko Mari ya a fɔ nya min nun. Mansa Silamɛni ara sɛnɛ sa Bato-Bon-miran minnu ma fɔlɔ, Mansa Nɛbukanasa ya sɛnɛ bɔ wonu ma ka ta anu na.

¹⁴ A ya mɔgɔ waga tan (10,000) bira ka ta wonu na Babilɔn nyamanɛ rɔ, a kɛlɛ-den-kun wo, a kɛlɛ-den wo, a boloma-wɔli-kɛla wo, katarala nunakɛnu ma. A tara anu dama la fɔɔ Babilɔn nyamanɛ rɔ. Fɔ fugarɛnu gbansan, wonu denu denu tora Yuda nyamanɛ rɔ.

¹⁵ A tara ale Mansa Yɛhoyasin anubɛ a na anubɛ ala musinu anubɛ ata mɔgɔ-banu anubɛ ata mɔgɔ-ba-tɔgɔlamɛnu na a bolo Babilɔn.

¹⁶ A tara mɔgɔ waga wɔrɔnfila (7,000) la minnu tagbɛlɛ anubɛ mɔgɔ waga kelen (1,000) minnu kusan boloma-wɔlɛ kɛnu na. Wonu fanan tagbɛlɛ.

¹⁷ Wo kɔma, a ya Mansa Yɛhoyasin fa-dɔgɔma Matanaya ma mansɛ la Mansa Yɛhoyasin gbɛ rɔ ka a tɔgɛ yɛlɛma ko Sɛdɛkaya.

Yuda Mansa Sɛdɛkaya Wara-Koe

¹⁸ Sɛdɛkaya ya mansayɛ sɔrɔn Yuda nyamanɛ rɔ a sɔrɔn-san mogan-ni-kelen nyɔgɛ le ma. San tan-ni-kelen, a ye mansayɛ la Yerusalɛm soe burɔ. A na le Yɛrɛmayala den Hamutali min bɔra Libina soe burɔ.

¹⁹ A bilara Mari la iko Mansa Yahoyakim ya a ma nya min.

²⁰ Mari diminyara Yuda mɔgɛnu ma anubɛ Yerusalɛm so-burɔ-mɔgɛnu ha a ya a kolan firindi anu ma.