2 Mansɛnu 23 - ALLALA KUMƐ

Mari Bato-Nya-Bɛrɛ Lana-Koe Mansa Yosaya Bolo

¹ Ale Mansa Yosaya ya Yuda nyamanita-mɔgɔ-banu anubɛ Yerusalɛm mɔgɔ-banu kundɛn kan-tina-kelen.

² A saraka-masɔla wo, a nɛbi wo, a mɔgɔ-ba wo, a bolo-kolon wo, a fen-tigi wo, anu dama tara anu nyɔgɔn fɛ Bato-Bɔn la. Anu ya tɔn-buku min yen Mari Bato-Bɔn la, mansɛ nyɛrɛ-nyɛrɛ ya wo karan anu damasi ye.

³ A ban, ale mansɛ wo sɔra Bato-Bɔn sɛnbɛrɛn-kɔn fɛ ka lanyiri kiri Mari ye. A ko a si ala tɔn wonu natɔnbagaya a yisi bɛɛ la. A ko a si sereya mumɛ bɛɛsi bira iko sarama-kan sɛbɛnɛ Marita buku rɔ nya min. Ala nyamanita-mɔgɛ wonu damasi sɔnta kumɛ wo ma. Anu ko anu denu fanan si tɔn wo damasi bira.

⁴ Saraka-Masɔla-Kun-Tigi-Wɛ Helikaya wo, a tatugunnɛnu wo, saraka-masɔlɛ minnu bi Bato-Bɔn bonda-da-makandanna wo, Mansa Yosaya ya a fɔ wonu ye ko, “Beyali kɔ-fannu wo, Asura kɔ-fannu wo, lolenu-bato-fannu wo, wo ni wonu nabɔ Bato-Bɔn kɛ burɔ.” Wonu ban bɛsi-kɔ-miran wonu nabɔla luyi ma, mansɛ ya miran wonu nabɔ soe kɔma ka anu mintan Kidirɔn lɛɛ telen tɔ. A ya a ma, anu tara wonu gbangban la Bɛtɛli soe burɔ.

⁵ Bɛsi-kɔlɛnu bi sarakɛnu bɔla ka isɛnti mintan kan-tina-mayɛlɛnɛnu tɔ anuna bɛsi Beyali anubɛ tele anubɛ karɛ anubɛ lolenu ye, ado Yuda mansɛnu denu ya bɛsi-kɔlɛ wonu sɔ. Ni min bi ala wɔli kɛla Yerusalɛm soe dafɛ le, ka, ni a taranta so-gbɛrɛkɛ le tɔ Yuda nyamanɛ rɔ, Mansa Yosaya ya wonu dama ban Yuda nyamanɛ rɔ.

⁶ Bɛsɛ min tɔgɛ Asura, a ya kɔlɔma wo labɔ luyi ma ka ta a la Kidirɔn lɛɛ rɔ. A ya wo mintan nyɔ ka a bunden gburr! A ya wo gbangban bi ka a furufuru nyɔ-kaburu-soe rɔ.

⁷ Yɛlan-keimɛnu bi konko minnu na Bato-Bɔn kata burɔ, a ya wonu tinya. Musinu bi durukinu nadanna Asura kɔlɛnu ye nyɔ le.

⁸ A ya bɛsi-kɔ-tina-mayɛlɛnɛ bɛɛ latinya Yuda nyamanɛ rɔ bɛsi-kɔlɛnu bi wɔlila kan tinɛ minnu tɔ. Yasowa min bi so-tigiyɛ la Yerusalɛm soe burɔ, wo ya tarɛ don-dɛ ladan don-da-wɛ bolo-maran wara la ka a nyɛrɛ tɔgɛ sa don-dɛ wo ma. Bɛsi-kɔ-tinɛ minnu bi nyɔ wara la, Mansa Yosaya ya wonu natinya. Marita saraka-masɔlɛ minnu kofura bɛsi-kɔlɛnu ma Yuda nyamanɛ rɔ, Mansa Yosaya ya wo damasi kundɛn Yerusalɛm soe burɔ.

⁹ A ma sɔn saraka-masɔlɛ wonu ni wɔli Mari Bato-Bɔn burɔ kɔnɔ a sɔnta ko saraka-masɔlɛ wonu ni saraka-masɔlɛnuta biredi-yɛlɛbɛlɛ dɔn anu ta-nyɔgɔ-saraka-masɔlɛnu fɛ.

¹⁰ Alla-batobɛlɛnuna kɔ tinɛ min tɔgɛ Tofɛti, ale Mansa Yosaya tara wo latinya Hinom lɛɛ rɔ. A ya wo ma alako mɔgɛnu kana na anuna dannu mintan anuna bɛsi Molɛki ye nyɔ.

¹¹ Yuda mansa-kɔrɛnu ya soee minnu ma tele-bato-fan la, a ya soee wonu nabɔ kata burɔ ka anuna kirindi mintan. (Soee wonu namaranɛ kata le burɔ don-dɛ dafɛ nun Netan-Mɛlɛkila bɔn dafɛ. Mɔgɔ-ba do le wo la nyɔ.)

¹² Yuda mansɛnu ya bɛsi-kɔ-tinɛ minnu nadan Mansa Ehasi ki-tina-kɔrɛ kuma, ale Mansa Yosaya ya wo rakeri. Mansa Manasa ya bɛsi-kɔ-tinɛ minnu nadan Mari Bato-Bɔn kata gbaranda filɛ burɔ nun, a ya wonu fanan takeri. A ya kan-tina filɛ wo bɛsɛnu takerikeri ka wonu nakɛ a rɔ Kidirɔn lɛɛ rɔ.

¹³ Yuda mɔgɛnu kɛnɛna Saidon kɛnuna bɛsɛ do kɔla nyɔ min tɔgɛ Asitɔra. Anu kɛnɛna Mohabu kɛnuna bɛsɛ do kɔla nyɔ rɔ min tɔgɛ Kimasi. Anu kɛnɛna Amon kɛnuna bɛsɛ do kɔla nyɔ rɔ min tɔgɛ Molɛki. Isirɛla Mansa Silamɛni ya bɛsi-kɔ-tina-mayɛlɛnɛ minnu nadan Yerusalɛm tele-bɔɛ wara la, Kasara kɔnkɛ dugula wara la, ale Mansa Yosaya ya wo damasi latinya.

¹⁴ Mansa Yosaya ya kuru-lɛsɛnɛ wonu takerikeri. Wo kɔma, anuna bɛsɛ min tɔgɛ Asura, a ya wo fanan takeri. Wo kɔma, a ya kan tinɛ wo yamatogon mɔgɔni-gbu-kolenu na.

¹⁵ Nebatila den Mansa Yɛrabowami min ya Isirɛla mɔgɛnu nadon hakɛ rɔ, wo ya bɛsi-kɔ-tinɛ min nadan Bɛtɛli, Mansa Yosaya ya wo fanan tinya. Kuri minnu nadannɛ saraka-mintan-tinɛ la, a ya wonu tatiitii ka anu munku iko gbangban ka Asurala muninyɛ mintan.

¹⁶ Ale Mansa Yosaya ya a tintan ka kaburu donu yen kɔnkɛ bu la. A ya a fɔ mɔgɛnu ye ko wonu ni ta furi wonu kolenu nabɔ kaburu wonu tɔ ka wonu mintan saraka-mintan-tinɛ kuma. A ya wo ma alako saraka-mintan-tinɛ wo la ni tinya iko Allata mɔgɛ ya a fɔ nya min nun.

¹⁷ Wo kɔma, Mansa Yosaya ya a yɛ lata ka kaburu do yen tun. A ya mɔgɛnu manyinika ko, “Yon kaburu ye wo la?” Bɛtɛli so-burɔ-mɔgɛnu ya a fɔ ko, “Allata mɔgɛ min ya wɔlɔyiya-kumɛ fɔ kan tinɛ kɛla tinya-koe rɔ ka bɔ Yuda, wo le kaburu ye wo la.”

¹⁸ Mansa Yosaya ko, “Hali mɔgɔ ma a bole tugu kaburu wo la.” Woletɔ anu ma anu bole tugu Allata mɔgɛ wo kolenu na anubɛ nɛbi wo min bɔra Samariya.

¹⁹ Wo kɔma, Mansa Yosaya tara Alla-batobɛlɛnuna bɛsi-kɔ-tina-mayɛlɛnɛnu tinya Samariya nyamanɛ kan tinɛ bɛɛ rɔ. Mari diminyara Isirɛla mansɛnu ma nun bawo anu denu denu ya kan-tina-mayɛlɛnɛ wonu nadan. A ya min nyɔgɔn sigi saraka-mintan-tinɛ ma Bɛtɛli soe burɔ, a ya wo le sufa sigi saraka-mintan-tinɛ doi wonu ma Samariya nyamanɛ rɔ.

²⁰ A ya Alla-batobɛlɛnuna bɛsi-kɔlɛnu faga anuna saraka-mintan-tinɛnu kuma kan-tina-mayɛlɛnɛ wonu tɔ. Wo kɔma, a ya mɔgɔni-gbu-kolenu mintan saraka-mintan-tinɛnu kuma alako ka wonu natinya. A ban, a sɛgira Yerusalɛm soe burɔ.

Kanan-Ko-Ladiyɛ Kɛ-Koe Mansa Yosaya Bolo

²¹ Mansa Yosaya ya a fɔ mɔgɛnu ye ko anu ni Kanan-Ko-Ladiyɛ kɛ ka anuta Mari Alla gbiliya iko a ya a yen tɔn-buku rɔ nya min.

^22-23 Woletɔ Yosayala mansayɛ san tan-ni-segin nyɔgɛ ma, anu ya ladiyɛ kɛ kɛ Yerusalɛm soe burɔ. Kɛlɛ-kurugbɛ minnu bi Isirɛla mɔgɛnu kun na nun ka a bi wonuta wati ma ha ka a sigi kɛ wati la, Yuda mansa wo, Isirɛla mansa wo, anu fenfen ma Kanan-Koe kɛ sufa ladɛn kɛ fɔ Mansa Yosaya kɛ.

Ko-Gbɛrɛ Donu Yɛlɛma-Koe Mansa Yosaya Bolo

²⁴ Wo kɔma, a yi-kɔrɔ-fɛlɛnna wo, a bolo-tafɛlɛnna wo, a bɛsɛ min namaranɛ mɔgɛnu bolo bɔn la wo, anubɛ bɛsɛ wonu kɔ mirannu wo, Mansa Yosaya ya wonu wara-koe ban Yerusalɛm soe anubɛ Yuda nyamanɛ bɛɛ rɔ. A ya wo ma alako mɔgɛnu ni tɔn sɛbɛnɛ wonu bira, Saraka-Masɔla-Kun-Tigi-Wɛ Helikaya ya min yen Mari Bato-Bɔn la.

²⁵ Ale Mansa Yosaya kɛ, a nyɔgɔn ma taran nun fɔlɔ, ado a nyɔgɔn don ma na taran min ya Mari sako kɛ a sɔndɔmɛ anubɛ a yisi bɛɛ la iko ale. A ya Nɛbi Musata tɔn bɛɛ bira.

²⁶ Kɔnɔ hali wo, Mansa Manasa ya koe minnu tinya, wo ya a ma, Mari fonde bɔra Yuda kɛnu kuma, ado ha kaka, a fonde ma kima wɛ.

²⁷ Ka tenbi wo la, Mari ko, “N si Yuda kɛnu kasara iko n bara Isirɛla kɛnu kasara nya min. N bara Yerusalɛm soe min yabɔ nun, n si n yɛ firindi wo ma. N bara a fɔ batoli-kɛ-tinɛ min ma nun ko anu ni to n batola nyɔ, n bara n kan-kɔ sɔ nyɔ fanan na.”

Yosayala Mansayɛla Ban

²⁸ Mansa Yosaya ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Yuda Mansɛnuna Buku do rɔ.

²⁹ Mansa Yosaya ye ala mansayɛ la wati min, Iyipiti Mansa Niko nara ala kɛlɛ-dannu na Yufereti bɛ dala Asiriyanu madɛnbɛ tinɛ kɛlɛ rɔ. Ale mansɛ tara kilɛ tɛgɛ tinɛ Iyipiti kɛlɛ-dan wonu ma Magidɔ soe burɔ. Iyipiti mansɛ ya a yen nyɔ min kɛ, a ya a faga. A kunyɛ tora kɛlɛ rɔ nyɔ le.

³⁰ Ala mɔgɔ-banu ya a furi sa ala kirindi rɔ ka sɛgi a la Yerusalɛm soe burɔ. Anu ya a togon a nyɛrɛta kaburu rɔ. Yuda nyamanita-mɔgɛnu ya Yosayala den Yɛhowahasi yabɔ ka wo sigi a fa gbɛ rɔ.

Yuda Mansa Yɛhowahasi Wara-Koe

³¹ Yɛhowahasi ya mansayɛ sɔrɔn Yuda nyamanɛ rɔ a sɔrɔn-san mogan-ni-sawa nyɔgɛ le ma. Karɛ sawa pe, a ye mansayɛ la Yerusalɛm soe burɔ. A na le Yɛrɛmayala den Hamutali la ka bɔ Libina soe burɔ.

³² Ale mansɛ fanan ya hakɛ kɛ Mari la iko a benbanu.

³³ Iyipiti Mansa Niko nara ale bira Ribila soe burɔ Hamati nyamanɛ rɔ. Wo le ya a ma, aleta mansayɛ banta Yerusalɛm soe burɔ. Mansa Niko kɛ ya a ma, Yuda nyamanita-mɔgɛnu ya duti di ale ma. A ya a ma, anu ya wodi-gbɛ labɔ minna gbiliyɛ anubɛ fui-fen bɔrɔ bi-loli rakɛn. A ya a ma, anu ya sɛnɛ fanan nabɔ minna gbiliyɛ anubɛ fui-fan bɔrɔ talɛ rakɛn.

³⁴ Ale Mansa Niko ya a ma, anu ya Mansa Yosayala dan do ma mansɛ la Yɛhowahasi gbɛ rɔ. Wo tɔgɛ le Ilayakim kɔnɔ Iyipiti Mansa Niko ya a tɔgɛ yɛlɛma ko Yahoyakim. Mansa Niko tara a kɔrɔ Mansa Yɛhowahasi la Iyipiti nyamanɛ rɔ. A fagara nyɔ le.

Yuda Mansa Yahoyakim Wara-Koe

³⁵ Iyipiti mansɛ ya duti-makele-koe min fɔ Yuda nyamanita-mɔgɛnu bolo nun, ale Yuda Mansa Yahoyakim ya duti wo makele anu bolo. A ya a makele anu na iko anu kelen-kelenta nɔnfuli sɔrɔn-bole ye nya min.

³⁶ Yahoyakim ya mansayɛ sɔrɔn Yuda nyamanɛ rɔ a sɔrɔn-san mogan-ni-loli nyɔgɛ le ma. San tan-ni-kelen kɔrɔ, a ye mansayɛ la Yerusalɛm soe burɔ. A na le Pɛdayala den Sɛbuda ka bɔ Ruma soe burɔ.

³⁷ Kɔnɔ ale mansɛ bilara Mari la iko a benbanu ya a ma nya min.