2 Mansɛnu 21 - ALLALA KUMƐ

Yuda Mansa Manasa Wara-Koe

¹ Manasa ya mansayɛ sɔrɔn Yuda nyamanɛ rɔ a sɔrɔn-san tan-ni-fila nyɔgɛ le ma. San bi-loli ani san loli kɔrɔ, a ye mansayɛ la Yerusalɛm soe burɔ. A na tɔgɛ le Hɛfisiba.

² Mansa Manasa ya hakɛ kɛ Mari la ka kisimiriya-koenu ma iko Mari ya mɔgɛ minnu gben Isirɛla mɔgɛnu yarɔ fɔlɔ nun.

³ A fa Mansa Hɛsakaya ya Alla-batobɛlɛnuna kɔ tinɛ minnu tinya, Mansa Manasa ya wonu sɔ a kurɛ la tun. A ya bɛsi-kɔ-tina-mayɛlɛnɛnu nadan anu si Beyali kɔ kan min. A ya kɔlɔma lɛsɛ musila muninyɛ rɔ iko Isirɛla Mansa Ehabu ya a ma nya min nun. Bɛsɛ wo tɔgɛ le Asura. Min sanɛ wo kuma, a ya lolenu fanan bato.

⁴ Bato-Bɔn min sɔnɛ Mari nyɛrɛ-nyɛrɛ ye, a ya Alla-batobɛlɛnuna kɔ tinɛnu nadan nyɔ, ado Mari ko nyɔ sɔnɛ a kelen pe le ye.

⁵ Bato-Bɔn wo kata gbaranda filɛ burɔ, a ya saraka-mintan-tinɛnu nadan nyɔ rɔ alako ka wonu ma lolenu bato tinɛ la.

⁶ A ya ala den-kei ma saraka-mintantɛ la, ado a bolo-tafɛlɛn wo, a duruya wo, a yi-kɔrɔ-fɛlɛn wo, a ya wo dama ma. Hali nyina-kɔlɛnu, a tara ke wonu fanan ma. A ya hakɛ min kɛ Mari la, wo da rakoloyara. Wo le ya a ma, Mari fonde bɔra a kuma.

⁷ A ara bɛsi-musumɛ min nadan kɔlɔma la min tɔgɛ Asura, a ya wo bi ka wo sigi Mari Bato-Bɔn la. Mari ara a fɔ Mansa Dawuda anubɛ ala den Mansa Silamɛni ye nyɔla ko la nun ko, “N bara Yerusalɛm soe kan-tina-kelan kɛ le yabɔ Isirɛla bɔnsɔn tan-ni-filɛ tɛma anu si to n batola kan min.

⁸ N bara tɔn min di nna wɔli-kɛla Musa ma, ni Isirɛla mɔgɛnu ya wo bɛɛsi bira, n ti sɔn mɔgɔ ni anu gben nyamanɛ kɛ rɔ, n bara min di anu benbanu ma nun.”

⁹ Kɔnɔ hali wo, anu ma sɔn anu tole masɔla. Mansa Manasa ya a ma, Isirɛla mɔgɛnu ya hakɛ kɛ dɔgɔma-ma-de hali ka tenbi mɔgɛ wonu na Mari ya minnu gben anu yarɔ nun.

¹⁰ Mari ya min fɔ nɛbinu ye, anu ya wo latenbi mɔgɛnu ma. Mari ko,

¹¹ “Manasa ara kisimiriya-koenu kɛ. A ya ko-yogomɛnu kɛ ka tenbi Kenan kɛnu na. A ara Yuda mɔgɛnu nabila bɛsi-kɔ-koe la.

¹² Bawo a ara wo ma, nde, Isirɛlata Mari Alla si Yerusalɛm soe anubɛ Yuda nyamanɛ halaki pɔ! Hali min ba wo lamɔɛn, a si a bole sa a dɛ la.

¹³ N si Yerusalɛm kɛnu tɔrɔ iko n ya Samariya kɛnu anubɛ Ehabu kegeyɛ tɔrɔ nya min nun. N si mɔgɛnu kian firan Yerusalɛm soe burɔ iko mɔgɛ ye fi rafiranna nya min ka a laburun.

¹⁴ Min bi tola anu niyi la, n si n yɛ firindi wonu ma ka anu kunyɛ don anu yogenu bolo. Anu yoge wonu si anu nɔ ka anu bolo-fan bɛɛ bi anu bolo.

¹⁵ Ni i ya a yen n bi kɛ mala, kebi anu benbanu bɔra Iyipiti nyamanɛ rɔ ka na yan, anu bi hakɛ kɛla n na tolon! Anu bara a ma, n bara diminya kosɛbɛ!”

¹⁶ Mansa Manasa ya a ma, Yuda mɔgɛnu bara hakɛ kɛ Mari la ka anu don bɛsi-kɔ-koe rɔ. Min sanɛ wo kuma, sɔn-yogoma sa mɔgɛ minnu na, mansɛ ya wonu mɔgɔ-siyaman faga ha wonu yele tugura a rɔ Yerusalɛm kilɛnu na iko gboron-gboronna-yi.

¹⁷ Mansa Manasa ya koe min bɛɛsi ma ala mansayɛ kɔrɔ katarala a ya hakɛ min kɛ, anu ya wo bɛɛ sɛbɛ Yuda Mansɛnuna Buku do rɔ.

¹⁸ A fagara tumɛ min, anu ya a togon a halala kata burɔ Ɔsa ye lu-kɔndɛ min fɛ-birala, kɔni. Ala den Amɔn sigira a gbɛ rɔ.

Yuda Mansa Amɔn Wara-Koe

¹⁹ Amɔn ya mansayɛ sɔrɔn Yuda nyamanɛ rɔ a sɔrɔn-san mogan-ni-fila nyɔgɛ le ma. San fila, a ye mansayɛ la Yerusalɛm soe burɔ. A na le Harusila den Mɛsulɛmɛti min bɔra Yɛtaba.

²⁰ Ale Mansa Amɔn fanan ya hakɛ kɛ Mari la iko a fa Mansa Manasa ya a ma nya min.

²¹ A ya a fa sɔn bi ka a fala bɛsɛ wonu kɔ.

²² A ya a ban Mari la, a benbanuta Alla, kɔni, ka Marita tɔnnu tinya.

²³ Mansa Amɔnna mɔgɔ-banu ya yanfɛ rabɛn a ma ka a faga ala bolɔn la.

^24-26 Wo kɔma, mɔgɔ-ba minnu ya Mansa Amɔn faga wo la, Yuda mɔgɛnu ya wonu fanan faga. Anu ya Mansa Amɔn togon a fa dafɛ a halala-kata burɔ Ɔsa ye lu-kɔndɛ min fɛ-birala. Anu ya ala den Yosaya sigi a gbɛ rɔ. Mansa Amɔn ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Yuda Mansɛnuna Buku do rɔ.