2 Mansɛnu 2 - ALLALA KUMƐ

Nɛbi Ilaya Yɛlɛ-Koe San Ma

¹ Nba, Nɛbi Ilayala bi-wati gbɛrɛnnɛ Marila tɔnkɔlɔn bolo ka ta a la san ma, wo ya a taran, Nɛbi Ilaya anubɛ Nɛbi Ilaisa bɔmatoe Kiligali soe burɔ.

² Anu tamatoe, Nɛbi Ilaya ya a fɔ Nɛbi Ilaisa ye ko, “To yan. Mari wara n nata Bɛtɛli soe burɔ.” Kɔnɔ Nɛbi Ilaisa ko, “N bara n keli wobɛ Mari-nimɛ ye, n ti to yan!” Wo le mara anu natɛ la Bɛtɛli.

³ Anu ke Bɛtɛli, nɛbi-karan-dan minnu bi nyɔ, wonu ya Nɛbi Ilaisa manyinika ko, “I ma a lɔn ko Mari si i karan-mɔgɔ bi i bolo bi, wa?” Nɛbi Ilaisa ko, “Ɔn, n ya a lɔn kɔnɔ a sɔgɔ sa n na, n ni n dɛ bila wo rɔ.”

⁴ Nɛbi Ilaya ya a fɔ Nɛbi Ilaisa ye tun ko, “To yan, Mari wara n nata Yɛrikɔ.” Kɔnɔ a ko, “N bara n keli wobɛ Mari-nimɛ ye, n ti to yan!” Wo le mara anuna tɛ la Yɛrikɔ.

⁵ Anu ke Yɛrikɔ, nɛbi-karan-dan minnu bi nyɔ, wonu ya Nɛbi Ilaisa manyinika ko, “I ma a lɔn ko Mari si i karan-mɔgɔ bi i bolo bi, wa?” Nɛbi Ilaisa ko, “Ɔn, n ya a lɔn kɔnɔ a sɔgɔ sa n na, n ni n dɛ bila wo rɔ.”

⁶ Nɛbi Ilaya ya a fɔ Nɛbi Ilaisa ye tun ko, “To yan, Mari wara n nata Yorodan bɛ fɛ.” Kɔnɔ a ko, “N bara n keli wobɛ Mari-nimɛ ye, n ti to yan!” Wo le mara anuna tɛ la.

⁷ Nɛbi-karan-dan mɔgɔ bi-loli bilara Nɛbi Ilaya anubɛ Ilaisa fɛ ka ta Yorodan bɛ wara la. Anu ke nyɔ, anu ya anu sɔ Yorodan bɛ dafɛ kɔnɔ nɛbi-karan-dan mɔgɔ bi-loli wonu tora anu ma wulɛ la ka anu yɛ bɛn anu ma.

⁸ Nɛbi Ilaya ya ala duruki bɔ a kan na ka a mini ka a gbesi yi la. Tiriyante wo rɔ, yi farata filɛ la. Anu mɔgɔ filɛ tenbira dugu-gbalanɛ ma.

⁹ Anu ke bɛ kɔma, Nɛbi Ilaya ya a fɔ Nɛbi Ilaisa ye ko, “Yanni n ni ta ka i to yan, n si nfen ma i ye?” A ya a fɔ a ye ko, “I si i kɛɛ min to n bolo, Marita sɛnbɛ min bi i fɛ, alamɛ wo nyɔgɔn fila tora nde bolo.”

¹⁰ Kɔnɔ Nɛbi Ilaya ko, “Wo sɔrɔn gbɛlɛ. Kɔnɔ ni i yɛ taranta n na ha n wuli tumɛ ka yɛlɛ, i si a sɔrɔn. Ni i ya sa n na, i ti a sɔrɔn.”

¹¹ Anu tora anu matagamana ka kuma anu nyɔgɔn fɛ, tiriyante wo rɔ, soeenu anubɛ anuna kirindinu yigira ta-mɛlan la anu bolo ka anu fara. Wo kɔma, tɔnkɔlɔn wo yɛlɛta Nɛbi Ilaya la san ma.

¹² Nɛbi Ilaisa ya a yen yɛlɛla, a ya a rakele, a ko, “E, n fa! Ile Isirɛla latankalɛ! I wara ta!” Nɛbi Ilaisa ma a yen tun. Yisi-tinyɛ wola ko la, Nɛbi Ilaisa ya a kan-na-duruki rafara filɛ la.

¹³ Wo kɔma, Nɛbi Ilaya yɛlɛmatoe, ala duruki wo bɔra a kan na ka bui. A ya wo bi ka na a la Yorodan bɛ dafɛ.

¹⁴ Ale fanan ya duruki wo gbesi Yorodan bɛ wo la. A ko, “Nɛbi Ilayata Mari Alla ye mintɔ?” Wo kɔma, a ya duruki wo gbesi yi la tun. Yi farata filɛ la. A tenbira ka ta nɛbi-karan-dan mɔgɔ bi-lolɛ wonu bara la.

¹⁵ Yɛrikɔ nɛbi-karan-dan minnu yɛ bɛnnɛ anu ma nun, wonu ko, “Nɛbi Ilayata sɛnbɛ ye Nɛbi Ilaisa fɛ!” Anu tara a labɛn ka anu madu dugu ma a kɔrɔ.

¹⁶ Anu ko, “Mɔgɔ bi-lolɛ kɛndɛ ye ma fɛ yan. Ma ye a fɛ, anu ni ta i karan-mɔgɔ nyini. Tumado, Marita sɛnbɛ ara ta a to kɔnkɛ do kuma, ni wo ma, lɛɛ do rɔ.” Nɛbi Ilaisa ya a fɔ anu ye ko, “Wo kana anu nata.”

¹⁷ Kɔnɔ anu kirita a ma ha a sɔnta anu nata-koe ma. Mɔgɔ bi-loli wonu tara anu yɛ lakalan Nɛbi Ilaya ma kan tinɛ bɛɛ rɔ. Tele-kɛndɛ sawa kɔrɔ, anu ma a yen.

¹⁸ Wo kɔma, anu sɛgira Nɛbi Ilaisa wara Yɛrikɔ tun. A ko, “N ma a fɔ wo ye nun n ko wo kana anu nata?”

Nɛbi Ilaisata Kabana-Koe Donu

¹⁹ Yɛrikɔ mɔgɛ donu tara ka Nɛbi Ilaisa taran. Anu ko, “Ma tigi, i ya a lɔn, Yɛrikɔ so-nyimɛ le kɔnɔ mala yi kɛ ye a mala, mala ki-fen sa nanfala.”

²⁰ Nɛbi Ilaisa ya a fɔ anu ye ko, “Wo ni kɔgɛ kɛ yi-sigi-miran-kurɛ rɔ ka na a la n bara.” Anu nara a la.

²¹ Wo kɔma, a ya kɔgɛ wo bi ka ta a lakɛ tenke wo rɔ. A ko, “Mari kuman-kan le kɛ la. Mari ko a si yi-kɔsɔnɛ kɛ ma a bɛrɛ la. A si a ma, wola ki-fannu ni nanfa, saya ti don wo kun na.”

²² Ka a bi wo tele ma, yi wo mara a bɛrɛ la iko Nɛbi Ilaisa ya a fɔ nya min.

²³ Nɛbi Ilaisa bɔmatoe Yɛrikɔ ka ta Bɛtɛli, kemini-mɛsɛ donu bɔra soe ka a taran. Anu burunta a rasɛla. Anu ya a fɔ a ma ko, “Ile kun-gbana. Ile fanan, yɛlɛ san ma gbɛ!”

²⁴ Nɛbi Ilaisa ya a tintan ka a yɛ wuya a rɔ. Wo kɔma, a ya anu danka Mari tɔgɛ rɔ. Tiriyante wo rɔ, sogo-ferema fila bɔra anu burila firɛ rɔ ka na kemini-mɛsɛ mɔgɔ bi-nani ani mɔgɔ fila (42) mafarafara.

²⁵ Wo kɔma, Nɛbi Ilaisa tara Kamɛli kɔnkɛ kuma. Kɔnɔ tɔ-a-la, a bɔra nyɔ ka ta Samariya soe rɔ.