2 Mansɛnu 14 - ALLALA KUMƐ

Yuda Mansa Hamasa Wara-Koe

¹ Mansa Yɛhowahasila den Yɛhowasi, wola mansayɛ san fila nyɔgɛ Isirɛla nyamanɛ kun na, Mansa Yohasila den Hamasa mara mansɛ la Yuda nyamanɛ rɔ san wo le la.

² A mansayara a sɔrɔn-san mogan-ni-loli nyɔgɛ le ma. San mogan-ni-kɔnɔntɔ kɔrɔ fanani, a ye mansayɛ la Yerusalɛm soe burɔ. A na tɔgɛ le Yɛhoyadan. Yerusalɛm kɛ le a na wo la.

³ Ale Mansa Hamasa wara-koe ya Mari hɛnɛ kɔnɔ aletɛ ma ke a benba Mansa Dawudatɛ rɔ. A ya a ma iko a fa Yohasi ya a ma nya min.

⁴ Kɔnɔ hali wo, a ma ban Alla-batobɛlɛnuna bɛsi-kɔ-tinɛnu tinyana. Alla-batobɛlɛ wonu tora sarakɛnu bɔla ka isɛnti mintan kan-tina-mayɛlɛnɛ wonu tɔ.

⁵ Mansa Hamasa ya sɛnbɛ sɔrɔn ala mansayɛ rɔ wati min, mɔgɔ-ba minnu ya a fa Mansa Yohasi faga, ale fanan ya wonu damasi faga.

⁶ Kɔnɔ hali wo, a ma mɔgɔ-ba wonuna dannu faga bawo Mari ya tɔn minnu di Nɛbi Musa ma, a ya wonu kilɛ tagama. Tɔn wo ko, “Ni dan ya ko tinya, mɔgɔ ti a sɔrɔnbagɛ faga wola ko la. Ni sɔrɔnbagɛ ya ko tinya, mɔgɔ ti ala dan faga wola ko la. Mɔgɔ nyɛrɛ ye koe min tinyana, a tɔgɛ ye tola wo le yili la.”

⁷ Mansa Hamasa ya Idɔm kɛlɛ-dan waga tan (10,000) faga lɛɛ do rɔ min tɔgɛ ko Kɔgɔ lɛɛ. A tara soe do bi min tɔgɛ Sela. A ya soe wo tɔgɛ yɛlɛma ka a kele ko Yokatili. Tɔgɛ wo le tora soe wo kuma ha bi.

⁸ Mansa Hamasa ya kilayɛnu nata Isirɛla Mansa Yɛhowasi ma ko anu ni kɛlɛ.

⁹ Mansa Yɛhowasi ya kilayɛ wo kɔfili ka a fɔ a ye ko, “Lunyɛ do, wɔnɔ-firɛ min bi Lɛbanan kɔnkɛ rɔ, wo ya kilayɛ lata kɔlɔma-kuru-wɛ do ma nyɔ ko, ‘Nna dunmusi ni to ila dan ye.’ Kɔnɔ sogo-nyɛɛnɛ do belenta ka bɔ Lɛbanan nyamanɛ rɔ wɔnɔ-firɛ wo ratɛntɛnna.

¹⁰ Ile Hamasa ara Idɔm kɛnu nɔ min kɛ, woletɔ i wara wasi. I tɔgɛ wo min bara bɔ, wo ni i wasa. I ni a dan wo ma. I ni to ila bɔn la. A sɔgɛ ye i la, i ni nanparan sanba wobɛ ila mɔgɛnu ma, wa?”

¹¹ Kɔnɔ Mansa Hamasa ma a tole sigi kumɛ wo kɔrɔ. Wo le ya a ma, Mansa Yɛhowasi anubɛ ala kɛlɛ-dannu ya kilɛ bira ka ta Mansa Hamasa kɛlɛ tinɛ Bɛti-Simɛsi soe burɔ Yuda nyamanɛ rɔ.

¹² Isirɛla kɛnu ya Yuda kɛnu nɔ. Mansa Hamasala kɛlɛ-dannu ya anu buri.

¹³ Mansa Yɛhowasi ya Mansa Hamasa bira. Wo kɔma, ale Mansa Yɛhowasi tara bui Yerusalɛm soe ma. Anu ya soe wo tarɛ tinya ka a bi don-dɛ min tɔgɛ Ifɛrɛm ha ka ta ke don-dɛ min tɔgɛ Tonke. Anu ya wo dama sa dugi ma fugbu! Anu ya tarɛ kan tinɛ min keri ka a bi a kundi doi ma ka ta a sigi a kundi doi la, nunkan-nya kɛmɛ nani (400).

¹⁴ A ya sɛnɛ-miran anubɛ wodi-gbɛ-miran minnu yen Bato-Bɔn la anubɛ mansɛla bolɔn la, a ya wo damasi latɛrɛndɛ ka ta wonu na a bolo Samariya soe burɔ. Wo kɔma, Mansa Yɛhowasi tara Yerusalɛm mɔgɛ donu na a bolo fanan ka anu bira kun-gbaran rɔ.

¹⁵ Mansa Yɛhowasi ya koe min bɛɛsi ma ala mansayɛ kɔrɔ katarala a ya kerinteyɛ min sɔrɔn ka Yuda Mansa Hamasa kɛlɛ, anu ya wo bɛɛ sɛbɛ Isirɛla Mansɛnuna buku do rɔ.

¹⁶ Mansa Yɛhowasi ya so-sɛgi-kɛ. Anu ya a togon Samariya mansɛnuna kaburu-soe rɔ. Ala den Yɛrabowami sigira a gbɛ rɔ.

Yuda Mansa Hamasa Lakiraya-Koe

¹⁷ Isirɛla Mansa Yɛhowasi fagara tumɛ min, Yuda Mansa Hamasa ya san tan-ni-loli bɔ wo kɔma tun.

^18-20 Mɔgɛnu ya yanfɛ don Yerusalɛm soe burɔ ko anu ni ale Mansa Hamasa faga. Woletɔ a ya a buri ka ta Lesi soe burɔ kɔnɔ hali wo, a kunyɛ ma bɔ a rɔ. Anu ya a sagaran ka ta a faga nyɔ. Ala mɔgɛnu tara a furi la soee kuma ka a togon Mansa Dawudata halala-luyi ma Yerusalɛm soe burɔ. Mansa Hamasa ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Yuda Mansɛnuna buku do rɔ.

²¹ Ala den Yusaya, wola sɔrɔn-san tan-ni-wɔrɛ, Yuda nyamanita-mɔgɛnu ya wo ma anuna mansɛ la a fa gbɛ rɔ.

²² Mansa Yusaya kɛ fala sayɛ kɔma, a ya Ilati soe bi anu yogenu bolo tun ka a sɔ-kurɛ-kɛ.

Mansa Yɛrabowami Tɔgɔma Wara-Koe

²³ Yohasila den Hamasala mansayɛ san tan-ni-loli nyɔgɛ ma Yuda nyamanɛ rɔ, Mansa Yɛhowasila den Yɛrabowami mara mansɛ la Isirɛla nyamanɛ rɔ san wo le la. A ya ala mansayɛ kɛ Samariya soe burɔ san bi-nani ani san kelen kɔrɔ.

²⁴ Ale fanan ya hakɛ kɛ iko Nebatila den Mansa Yɛrabowami ya a ma nya min, min ya Isirɛla nyamanita-mɔgɛnu nabila hakɛ kɛ la.

²⁵ Mansa Yɛrabowami kɛ ya Isirɛla nyamanɛ tɔnkɔn bi anu yogenu bolo tun. Ka a bi Hamati kɔnkɔ-gbɛran ma kantɔ-wara la ha ka ta ke Dalɛ Faganɛ ma dugula wara la, a ya wo damasi bi, ado Isirɛlata Mari Alla ara kɛ lanyiri kiri nun ata wɔli-kɛlɛ Amitayila den Nɛbi Yona ye. Kati-Hifa kɛ le ale Yona kɛ la.

²⁶ Mari ya wo ma bawo a ara a yen, Isirɛla mɔgɛnu bara tɔrɔ nya min, ado anu dɛnbɛn-mɔgɔ-gbɛrɛkɛ sa nyɔ, a mara yɔɔn la wo, a mara hɔrɛ la wo.

²⁷ Mari miriya ma taran Isirɛla mɔgɛnu nato-koe ma dogbe! Woletɔ a ya a ma, Mansa Yɛrabowami ya anu kunka.

²⁸ Mansa Yɛrabowami kɛ ya koe min bɛɛsi ma ala mansayɛ kɔrɔ, katarala a ya kerinteyɛ min kɛ ka Damasika soe anubɛ Hamati soe bi a yogenu bolo, anu ya wo bɛɛ sɛbɛ Isirɛla mansɛnuna buku do rɔ.

²⁹ Mansa Yɛrabowami kɛ fagara tumɛ min, anu ya a togon mansɛnuna kaburu-soe rɔ. Ala den Sakaraya sigira a gbɛ rɔ.