2 Mansɛnu 12 - ALLALA KUMƐ

Bato-Bɔn Rabɛn-Koe Mansa Yohasi Bolo

¹ Yehula mansayɛ san wɔrɔnfila nyɔgɛ Isirɛla nyamanɛ rɔ, anu ya Yohasi ma mansɛ la san wo le la Yuda nyamanɛ rɔ. San bi-nani kɔrɔ, Yohasi ye mansayɛ la Yerusalɛm soe burɔ. Mansa Yohasi na tɔgɛ le Sibeya. Musi wo bɔra Biri-Siba soe le burɔ.

² Mansa Yohasi ya koe min bɛɛsi ma ala mansayɛ kɔrɔ, wonu ya Mari hɛnɛ fananta Saraka-Masɔla Yɛhoyada le ya Mansa Yohasi labila.

³ Kɔnɔ hali wo, anu ma anuna bɛsi-kɔ-tinɛnu tinya. Mɔgɛnu tora sarakɛ bɔla bɛsɛ wonu ye ka isɛnti mintan kan-tina-mayɛlɛnɛ wonu tɔ.

⁴ Yohasi ya Marita saraka-masɔlɛnu kele. A ya a fɔ wonu ye ko, “Wo ye wodi min sɔrɔnna sarakayɛ la Bato-Bɔn la, a mara saraka-makeleta la wo, a hɛniki-saraka wo, wo ni wodi wo ladɛn.

⁵ Ni wodi kɛnu nara saraka-masɔlɛ minta wati rɔ, wo si na wodi wo la. Wodi wonu si ma Mari Bato-Bɔn fɛ-bira-fan la.”

⁶ Kɔnɔ hali wo, ka a bi Mansa Yohasila mansayɛ ma ha ala mansayɛ san mogan-ni-sawa nyɔgɔn ma, saraka-masɔlɛ wonu ma ke ko-wo-ko ladanna Bato-Bɔn fɛ-bira-koe rɔ.

⁷ Wo le ya a ma, ale Mansa Yohasi ya a fɔ Saraka-Masɔla Yɛhoyada anubɛ saraka-masɔlɛ doinu ye ko, “Nfenna wo sa Bato-Bɔn kɛ fɛ-birala? Ka a dabira bi ma, wo kana wodi-wo-wodi lamara wo nyɛrɛ ma tun. Wo wa min sɔrɔn gbɛ, wo ni wo ma Bato-Bɔn fɛ-bira-fan la.”

⁸ Saraka-masɔlɛ wonu sɔnta wo bɛɛ ma, ado anu sɔnta ko wodi wo ni ma Bato-Bɔn fɛ-bira-fan la mɔgɛ gbɛrɛnu bolo.

⁹ Saraka-Masɔla Yɛhoyada ya kɔn-kenkirɛ bi ka wo-nɛ ladan a kuma. A ya kenkirɛ wo sigi saraka-mintan-tinɛ dafɛ bolo-nyimɛ wara la Mari Bato-Bɔn don-dɛ la. Saraka-masɔlɛ min bi wɔlila Bato-Bɔn wo don-dɛ la, min ba na wodi la Mari Bato Tinɛ, saraka-masɔlɛ wo si wodi wo bi ka ta a labui kenkirɛ wo rɔ.

¹⁰ Wo wa siyaya kenkirɛ rɔ, mansɛla kɛdi-sɛbɛlɛ anubɛ saraka-masɔla-wɛ si ta wodi wonu bɔ kenkirɛ wo rɔ ka a dan. Wo kɔma, anu si a kɛ bɔrɛnu tɔ ka anu dan lakiri.

¹¹ Anu ba ban wodi wo yatɛ sɛbɛla, anu si wodi wo bi ka a don wɔli-kunyɛnu bolo minnu si Bato-Bɔn wo fɛ-bira. Wonu si fɛrɛn-tiilɛnu sara, anubɛ bon-tuwalɛnu,

¹² anubɛ bon-sigilɛnu anubɛ kuru-lɛsɛlɛnu. Wonu si fɛrannu anubɛ kuru-lɛsɛnɛnu san wodi wo la anubɛ bon-miran-toenu.

¹³ Kɔnɔ anu ti wodi wo don fenfen tɔ min nadannɛ sɛnɛ anubɛ wodi-gbɛ la iko yi-lafɛ wo, ta-ladufen-fan wo, miran wo anubɛ burinu.

¹⁴ Anu ya wodi wo damasi don Bato-Bɔn wo fɛ-koe rɔ, a mara a mɔgɔ-sara la wo, a wɔli-kɛ-miran sɔnkɔ la wo.

¹⁵ Wɔli-kunyɛ wonu natelenta nya na, hali mɔgɔ ma anu manyinika wodi wo lawɔli-nya ma.

¹⁶ Wodi min bɔra yiliki-sarakayɛ la anubɛ hakɛ-sarakayɛ, wo fenfen ma sa kenkirɛ rɔ bawo saraka-masɔlɛnutɛ le wonu na.

Mansa Yohasi Kun-Madiya-Koe Siriya Mansɛ La

¹⁷ Kɛ wati ya a taran, Siriya Mansa Hesiyɛli wulita Kati soe kan ma ka anu nɔ. Wo kɔma, a ya a kunyɛ tintan Yerusalɛm kɛlɛ-koe ma.

¹⁸ Kɔnɔ Bato-Bon-miran dantɛgɛnɛ minnu dira Mansa Yohasi benba Mansa Yɛhosafatita wati rɔ, a benba Mansa Yɛhoramta wati rɔ, a fa Mansa Ehasayata wati rɔ, anubɛ ata wati rɔ, ale Yuda Mansa Yohasi ya wonu di Siriya Mansa Hesiyɛli ma alako wo kana na bui anu denu ma. Hali sɛnɛ min sanɛ Bato-Bɔn nɔnfulu lamara tinɛ anubɛ minnu bi mansɛla bolɔn la, a ya wonu fanan nata ale mansɛ ma. Wonu ke Siriya Mansa Hesiyɛli ma, a ya ala kɛlɛ-dannu kunyɛ tintan kan-tina-gbɛrɛ la.

¹⁹ Mansa Yohasi ya minnu ma ala mansayɛ kɔrɔ, anu ya wo bɛɛ sɛbɛ Yuda Mansɛnuna buku do rɔ.

Mansa Yohasi Faga-Koe

^20-21 Simɛyatila den Yosakari anubɛ Somarila den Yɛhosabadi, wonu ya yanfɛ don Mansa Yohasi ma, ado ata mɔgɔ-ba do le wonu na. Anu ya a faga lɛnbɛn-lɛnbɛnya rakɛnɛ kuma bɔn la tele-bɔɛ wara la. Anu bi kan tinɛ min kelela Sila, wo warata-kilɛ la, bɔn wo sɔnɛ nyɔ le. Anu ya a togon Mansa Dawudata halala-luyi ma Yerusalɛm soe burɔ. Ala den Hamasa sigira a gbɛ rɔ.