2 Mansɛnu 11 - ALLALA KUMƐ

Yuda Musu-Mansɛ Atalaya Wara-Koe

¹ Mansa Ehasaya na Atalaya ya a lamɔɛn min kɛ ko Mansa Yehu ara ala den Ehasaya faga, ale Atalaya ya mɔgɛnu sɔ ko anu ni a kegeyɛ bɛɛ faga

² fɔ Ehasaya wola den Yohasi, wo le tora a niyi la. Anu bi Yohasi wo na-kelen-nyɔgɛnu fagala tumɛ min, a tɛnɛ min tɔgɛ Yihɔsɛba, wo ya Yohasi anubɛ a fɛ-biralɛ bi ka anu dogon Bato-Bon-konko do la mɔgɛnu si ki kan min. A ya wo ma alako anu kana ale Yohasi faga. Yihɔsɛba kɛ, Mansa Yɛhoramla dunmusi le. Mansa Ehasaya tirisan le fanan.

³ San wɔrɔ dɛgɛdɛgɛ, Yihɔsɛba ye a tɛnɛnɛ fɛ-birala Mari Bato-Bɔn wo la. San wɔrɛ wo kɔrɔ, a mama Atalaya ye mansayɛ la Yuda nyamanɛ rɔ.

Yohasi Ma-Koe Mansɛ la Yuda Nyamanɛ Rɔ

⁴ A san wɔrɔnfila nyɔgɛ ma, Saraka-Masɔla Yɛhoyada ya kilayɛ lata mansa-makandannɛnuna kun-tigi ma anubɛ mansɛla bon makandannɛnuna kun-tigi ma ko anu ni na Bato-Bɔn la. Wonu ke, a ya anu nakeli ko a ye nala min fɔla anu ye, ni anu ti gbundi wo bu tii. Wonu ban anu kelila, a ya Mansa Ehasayala den Yohasi yira anu na.

⁵ Ale Saraka-Masɔla Yɛhoyada ya a fɔ anu ye ko, “Wo ni wo fara kurun sawa la. Sulen-Tele wa ke lunyɛ min, kurun kelan si to mansɛla bolɔn mafɛlɛnna ale Atalaya ye kan min.

⁶ Don-dɛ min tɔgɛ Sɔ, kurun kelan doi si to wo fanan makandanna. Dɛ min bi doi wonu kɔma, a to kurun kelan si wo makandan.

⁷ Kurun filɛ minnuta makandan-wati wa tenbi Sulen-Tele ma, wonu si na yan Bato-Bɔn la ka mansa-kurɛ kɛ makandan.

⁸ Wonuna faannu ni to birani anu bolo la. Mansɛ kɛ wa ta kan-bo-kan, wo ni to bilani a fɛ. Ni min ya a gbɛrɛn mansɛ ma, a makandannɛ wonu ni wo faga.”

⁹ Kun-tigi wonu sɔnta Saraka-Masɔla Yɛhoyadala kumɛ wo ma. Minnu bi tala kandali-kɛ tinɛ Sulen-Tele ma wo, minnu bara anu boloka kandali-kɛla Sulen-Tele ma wo, anu tara wonu na Yɛhoyada wara.

¹⁰ Mansa Dawudala tanbɛnu anubɛ ala matanka-fan minnu bɛɛsi lamaranɛ Bato-Bɔn la, Yɛhoyada ya wonu natenbi kandali-kɛlɛ wonu ma.

¹¹ A ya wonu sɔ-bole rabɛn faannu bi anu bole rɔ mansɛla minɛ rɔ anubɛ saraka-mintan-tinɛla minɛ rɔ anubɛ Bato-Bɔn yarɔ ka a bi bolo-nyimɛ wara la ha bolo-maran wara la alako ka mansa-kurɛ makandan.

¹² Saraka-Masɔla Yɛhoyada sɔra Yohasi yarɔ, anu bɔra Bato-Bɔn la mɔgɛ bɛɛ yala. Yɛhoyada ya mansaya-fulɛ sigi Yohasi salɛ la. Mansaya-tɔn minnu namaranɛ, a ya wonu don a karɛ tɔ. A ya dantɛgɛ-tuli kɛ a salɛ rɔ ka a ma mansɛ la. Mɔgɛnu ya lɛnkɛ gbesi. Anu ya a lasɔnkɔ, anu ko, “Alamɛ mala mansɛ mɛra ma kuma!”

Atalaya Faga-Koe

¹³ Musu-Mansɛ Atalaya ya kandali-kɛlɛnu anubɛ mɔgɛnu sɔnkɔ-kan lamɔɛn tumɛ min, a burimatoe tara anu magbenna Bato-Bɔn la nyɔ.

¹⁴ A ke nyɔ, a ya mansa-kurɛ sɔnɛ taran Bato-Bɔn don-dɛ sɛnbɛrɛn-kɔn fɛ iko anuna namu ye nya min. Mansa-kurɛ kɛ lafoonɛ kandali-kɛlɛnuna kun-tiginu bolo anubɛ buru-fɛlɛnu anubɛ mɔgɛnu. Anu damasi ye a lawɔyɔla sewɛ bolo. Anu bi burinu fanan fɛla. Ale Atalaya ya wo rayen min kɛ, a ya ala duruki rafara yisi-tinyɛ bolo. A ya a fɔ ko, “Anu bi nna bu-koe le tɔ kɛ la.”

¹⁵ Bawo a ma di Saraka-Masɔla Yɛhoyada ye ko anu ni Atalaya faga Bato-Bɔn dafɛ nyɔ, woletɔ a ya a fɔ kandali-kɛlɛ wonuna kun-tiginu ye ko, “Wo ni a bi ka a labɔ. A ni ta kandali-kɛlɛnu tɛma. Ni mɔgɔ-wo-mɔgɔ bilara a fɛ ko a ye a lakisila, wo ni wo tigi faga.”

¹⁶ Anu ya ale musi bira ka a faga mansɛla kata-don-dɛ la soeenu si don kan min.

Mɔgɛnu Nasɛgi-Koe Mari ma Saraka-Masɔla Yɛhoyada Bolo

¹⁷ Saraka-Masɔla Yɛhoyada ya sarama-kan kiri Mari ye mansa-kurɛ wonubɛ ala mɔgɛnuna ko la ko anu ti bɔ Mari fɛ muk! A ya a ma fanan, mɔgɛnu ya sarama-kan kiri mansa-kurɛ wo ye ko anu ti anu bɔ a fɛ mumɛ!

¹⁸ Nyɔ-nyamanita-mɔgɛ wo damasi wulita ka ta bɔn wo la anu si Beyali kɔ kan min. Anu ya saraka-bɔ-tinɛnu tinya nyɔ ka bɛsɛ wonu tinya. Anu ya bɔn wo tinya fanan. Wo kɔma, anuna bɛsi-kɔlɛ min tɔgɛ Matan, anu ya wo fanan faga saraka-mintan-tinɛnu dafɛ nyɔ. Yɛhoyada ya kandali-kɛlɛ donu to Mari Bato-Bɔn makandan tinɛ nyɔ.

¹⁹ Saraka-Masɔla Yɛhoyada wo, mansa-kurɛ wo makandannɛnu wo, mansa-kurɛ wola bolon-makandannɛnu wo, anubɛ kandali-kɛlɛ wonuna kun-tiginu wulita ka bɔ Mari Bato-Bɔn la ka ta mansa-kurɛ wo to tinɛ ala bolɔn la. Anu tamatoe, anu bɔra don-dɛ la min tɔgɛ Kandannɛnuta Don-Dɛ. Mɔgɛ bɛɛ bilara anu fɛ. Mansa Yohasi sigira mansaya-waganɛ rɔ.

²⁰ Mɔgɛ bɛɛ sewara, ado soe wo kimara don bawo anu bara Atalaya faga mansɛla bolɔn la.

²¹ Anu ya Yohasi ma mansɛ la Yuda nyamanɛ rɔ a sɔrɔn-san wɔrɔnfila nyɔgɛ le ma.