2 Yɔni 1 - ALLALA KUMƐ

¹ Ka bɔ nde kɛmɔgɔ-ba bolo, ka a lake ile musi ma, Alla ya min yabɔ anubɛ ila dannu. Wo di n ye bɛrɛkɛ! Kɔnɔ nde kelen dɔrɔn ma. Tonyɛ di min bɛɛ ye, wo di wonu fanan ye.

² Wo di ma ye bawo tonyɛ siginɛ male yisi rɔ, ado a si to ma rɔ fanan habadan!

³ Alamɛ ma Fa Alla anubɛ Yisa Kirasiti, ma Fa Allala dan ni hina ma la. A ni kinikinɛ anubɛ yisi-kimɛ di ma ma. Wonu ni to ma bolo tonyɛ anubɛ keninteyɛ rɔ.

Tonyɛ anubɛ Keninteyɛ Wara-Koe

⁴ N sewara bɛrɛkɛ ka a yen ko ila dan donu tonɛ tonyɛ rɔ iko ma Fa Alla ara a fɔ ma ye nya min.

⁵ Woletɔ, n diyana-mɔgɛ, n bi i madiyala ko ma ni to ma nyɔgɔn kenina. N bi min sɛbɛla kɛ la, tɔn-kura ma. Tɔn-kɔrɔ-kɔrɔmɛ le min bi ma bolo kebi fɔlɔfɔlɔ.

⁶ N bi keninteyɛ min ma wo la, wo kɔrɛ le ko ma ni to Allala tɔnnu birala. Tɔn wo ko wo dama ni to keninteyɛ rɔ tɛban, iko wo ya a lamɔɛn nya min fɔlɔ-nun!

⁷ Karan-mɔgɔ-yanfante-siyaman bara wuli duninya rɔ. Wonu ti sɔn a ma ko Yisa Kirasiti mara mɔgɛ la. Karan-mɔgɔ wo sifa si mɔgɛnu yanfa, ado anu manɛ Kirasiti-yogo-finma-wɛ la.

⁸ Wo ni a ma wo fɛrɛma worɔ. Ma ya min kɛ wo ye nun alako wo kana foo a la fɔ ni wo ya wo barayi-kanbalinɛ sɔrɔn.

⁹ Min ti to Kirasitila karan rɔ fɔ ka do sa a kuma, Alla sa wo bolo. Kɔnɔ min tonɛ karan wo rɔ, ma Fa Alla anubɛ ala den Yisa, anu fila bɛɛ ye wo le bolo.

¹⁰ Ni mɔgɔ-wo-mɔgɔ nara wo wara, a ma sɔn karan kɛ ma, wo kana a yiya. Hali ka duwa a ye ko, “Yisi-kimɛ ni to i fɛ,” wo kana wo ma.

¹¹ Ni min duwara a ye, wo ara ma a ta-nyɔgɛ la ko-yogoma-kɛ rɔ.

Kuma-Labannu

¹² Ko siyaman bi nyɔ ka min fɔ i ye kɔnɔ a ma di n ye ka a sɛbɛ kɛdi rɔ. A di n ye, n ni ta i kɔndɔn. Nde nyɛrɛ ni kuma i ye alako mala sewɛ da ni fa.

¹³ Alla ya musi minnu yabɔ iko ile, wonu bi i kɔndɔnna.