2 Kɔrɛnti 9 - ALLALA KUMƐ

Dɛnkɛninya-Mɔgɛnu Dɛnbɛn-Koe

¹ Nba, hali n ma kɛdi sɛbɛ wo ma ka a tɛgɛ Allala mɔgɛnu dɛnbɛn-koe ma Yudiya nyamanɛ rɔ.

² N ya a lɔn ko wo fanan si sɔn dɛnbɛni-koe wo ma. N bara n kɔgɔ raka wola ko la Masidoniya kɛnu ye. N ya a fɔ anu ye ko kebi serun, wole, ma na-kelen-nyɔgɛ minnu bi Akeya sigisɔn rɔ, wo ya wo rabɛn dɛnbɛni-koe wo rɔ. Ka a tɛgɛ wola dɛnbɛnɛ wo ma, wo ara mɔgɛ donu yisi lawuli dɛnbɛni-kɛ-tinɛ.

³ N bi n na-kelen-nyɔgɛ kɛnu natala, wo le ya a to, mala kɔgɔ-rakɛ kana ma fuyi la. Wo ni wo rabɛn wota dɛnbɛnɛ wo la wo bolo iko n ya a fɔ nya min.

⁴ Ni Masidoniya kɛnu nara n fɛ, anu ni a taran ko wo rabɛnni ma, ma dama si miliya worɔ bawo ma lara wo damasi la. Wole bɛrɛn si miliya fanan!

⁵ Woletɔ n ya n miri ko a bɛnnɛ n na-kelen-nyɔgɛ kɛnu ni sɔ ma yarɔ. Wo ya lanyiri kiri kɔ-fan minna ko la, yanni n ni ke nyɔ, wo ni wonu nadɛn. Woletɔ, n ba ke tumɛ min, n si koe bɛɛ rabɛnnɛ taran. Wo si a yira ko wo bolenu fulenta bawo a di wo ye. Wo ye a bɔla wo yisi bɛɛ la. Mɔgɔ ma wo fɔrɔsɛ.

⁶ Wo ni wo hɛnkili to kɛ ko. Mɔgɛ min si sugi doni fui, wo si doni de tɛgɛ. Min si sugi siyaman fui, wo si a siyaman tɛgɛ.

⁷ Bɛɛ ni kɔlɛ kɛ worɔ iko a ara a miri a burɔ nya min. A kana kɔli kɛ yisi-magboyɛ la. A kana kɔli kɛ bawo anu bi i lagbengbenna. Mɔgɛ min bi fan dila a sewanɛ, wo le di Alla ye.

⁸ Nba, Alla si ke hɛrɛ dila wo ma ka tenbi wo makoe dan la. Woletɔ wo makoe-nyinya-fannu si taran wo bolo ka mɔgɔ donu fanan kɔ sewɛ la.

⁹ Iko a sɛbɛnɛ Allala kitabu rɔ nya min ko, “Min si fan di bolo-kolɔnnu ma foninsereyɛ la, ala nyimayɛ si to tolon!”

¹⁰ Alla le ye sugi dila sɛni-salɛ ma anubɛ a si min dɔn. A si sugi bɛɛ di wole fanan ma ka wola sɛnɛnu nasabati alako wo ni fan ni bolo-kolɔnnu ma duk!

¹¹ A si wo ma fen-tiginu na alako wo ni to mɔgɛnu kɔla wati bɛɛ. Ma wa wola kɔ-fannu natenbi anu ma, wo si a ma, mɔgɔ siyaman ni baraka bira Alla ye wola kɔ-fan wonuna ko la.

¹² Wola dɛnbɛnɛ ma Allala mɔgɛnu makoe dɔrɔn nyinya. Wo si a ma, mɔgɛnu ni baraka bira Alla ye fanan.

¹³ Wola ko-nyima-kɛ si wola dɛnkɛninyɛ yira Kirasitita kibara-nyimɛ rɔ, wo lanɛ min na, kɔni. Wo ye Kirasitila kumɛ birala min kɛ, mɔgɔ siyaman bi Alla tantola wola ko la. Wo ye anu dɛnbɛna foninsereyɛ la anubɛ mɔgɔ-gbɛrɛnu fanan.

¹⁴ Woletɔ ka a tɛgɛ Allata hinɛ ma wole wara la, anu bi Alla matarala wo ye anu yisi-lakanɛ la.

¹⁵ Ma ni baraka bira Alla ye ala kɔ-fanla ko la, mɔgɛ ti ke min sanna.