2 Kɔrɛnti 3 - ALLALA KUMƐ

Sarama-Kan-Kurɛta Wɔli-Kɛlɛnu

¹ Kɛ mani de iko ma ye ma nyɛrɛ matɔgɔla wo yala, nyɛ? Male fanan ni a ma iko mɔgɔ doinu bi a mala nya min? Ma ni na kɛdinu na ma bolo min si a yira, ni mɔgɔ-nyimɛ le male la iko doinu? Ni wo ma, wo ni kɛdi-su wonu nata mɔgɔ-gbɛrɛnu ma malela ko la, wa?

² Wole nyɛrɛ le mala kɛdi la min sɛbɛnɛ ma yisi rɔ alako bɛɛ si ke a karanna nya min ka mala wɔlɔ-nyimɛ lɔn wo tɛma.

³ A ara gbɛ feu, ko Kirasiti-nyɛrɛ le ya kɛdi kɛ sɛbɛ ka a don ma bolo. A ma sɛbɛ duwa-yi anubɛ kalɛ la. A sɛbɛnɛ Alla nimɛla Ni-Sɛnimɛ le la, ado a ma sɛbɛ kuru-walan ma. A sɛbɛnɛ mɔgɔ yisi le tɔ.

⁴ Ma ye kɛ fɔla bawo ma lanɛ Alla la Kirasiti baraka rɔ.

⁵ Fenfen sa male rɔ min si a ma, ma ni a fɔ ko ma si ke wɔlɛ kɛ kɛla. Min bɛɛ ye ma bolo, wo bɔnɛ Alla le bolo.

⁶ Ale le ya sɛnbɛ di ma ma ko ma ni ma sarama-kan-kurɛta wɔli-kɛlɛnu na, min sɛbɛnɛ anubɛ ala mɔgɛnu tɛma. Sarama-kan-kurɛ kɛ sɛbɛni ma kɔnɔ a nanɛ ata Ni-Sɛnimɛ bolo. Tɔn-sɛbɛnɛ si na sayɛ la mɔgɛnu ye kɔnɔ ata Ni-Sɛnimɛ si niyi di mɔgɛnu ma.

⁷ Nɛbi Musa ya tɔn min sɛbɛ kuru-walan ma, wo nara sayɛ la a bolo. Kɔnɔ a dira mɔgɛnu ma tumɛ min, Allala gbiliyɛ bɔra gbɛ rɔ, ado Nɛbi Musa yakɔrɛ malanta ha Isirɛla mɔgɛnu ma ke anu yɛ gbangbanna a rɔ hali gbiliya-tamasere min bi malan-malanna a yakɔrɛ ma, wo kɔ fagara.

⁸ Ado nfan, gbiliyɛ min bi nala Allata Ni-Sɛnimɛ baraka rɔ, wola koloyɛ si ma kama worɔ?

⁹ Mɔgɛnu yilikira tɔn min fɛ, wo gbiliyanɛ mɔgɛnu yala. Kɔnɔ ma ara telen Alla yala sarama-kan-kurɛ min fɛ, wota gbiliyɛ tenbira doi wo la pon!

¹⁰ Tɔn-kɔrɔmɛ wo gbiliyanɛ, tonyɛ le kɔnɔ wota gbiliyɛ wa sanka mata kila-kurɛ kɛ ma, gbiliyɛ min makawanɛ nun fɔlɔ, wo ara tenbi ka ban fɛsɛfɛsɛ,

¹¹ ado tɔn wo min ya wati-kundu-ni kɛ ka tenbi dɔrɔn, ni gbiliyɛ ye wo fɛ nun, tɔn min bi tola habadan don? Gbiliya-ba ye wo rɔ ka tenbi doi wo la pirr!

¹² Ma yisi latɛgɛnɛ bawo yigi kɛ ye ma bolo.

¹³ Nɛbi Musala yakɔrɔ-malan kɔ fagara. Male sa iko Nɛbi Musa min ya kurɛ burun a yɛ la alako Isirɛla mɔgɛnu kana na yakɔrɔ-malan wo yen a kɔ fagala.

¹⁴ Isirɛla mɔgɛ wonu yisi gbɛlɛyara, ado ha bi, anu tenbi Allata sarama-kan karanna, a manɛ iko fan do burunnɛ anu yɛ la, ado wo ti bɔ mɔgɔ yɛ la fɔ a wa tugun Kirasiti la wati min.

¹⁵ Ha bi, anu ba Nɛbi Musala tɔn karan tuma-wo-tuma, fan do ye anu hɛnkili yamatogonna.

¹⁶ Kɔnɔ mɔgɔ wa yɛlɛma ka bila Mari fɛ, fan wo si bɔ a hɛnkili ma.

¹⁷ Nba, Mari wo, ata Ni-Sɛnimɛ le, ado Marita Niyi wo ye kan min, hɔrɔyɛ ye nyɔ le.

¹⁸ Ma dama ya-makanɛ ye Marita gbiliyɛ mayirala, ado gbiliya kelan wo ye bɔla Marita Ni-Sɛnimɛ le bolo. Ale le ye ma yɛlɛmana alako ma kɛ-nya ni ma iko ale. Wo si a ma, a ni to ala gbiliya-makawanɛ dila ma ma Marita Ni-Sɛnimɛ baraka rɔ.