2 Kɔrɛnti 2 - ALLALA KUMƐ

¹ Woletɔ n ya a latɛgɛ n yisi rɔ ko n ti na wo wara tun ka wo ladiminya iko n ya a ma nya min nun fɔlɔ,

² ado ni n ya wo ladiminya nun, yon si nde lasewa worɔ fɔ wole n bara minnu nadiminya?

³ Wo le ya a to, n ya kɛdi doi wo sɛbɛ wo ma bawo n sa a fɛ ka na wo wara ka diminya wole ma minnu bɛnta ka n nasewa. N lanɛ a la ko n ba sewa tumɛ min, wole fanan sewanɛ worɔ.

⁴ N ya kɛdi wo sɛbɛ tɔrɔyɛ anubɛ yisi-lafinyɛ le la, ado n ya-yi yigira biribiri! N ma a sɛbɛ ka a tɛgɛ wo ladiminya-koe ma fɔ ka wo lalɔn n bara wo dama keni nya min.

Ko-Yogoma-Kɛlɛ Makoto-Koe

⁵ Nba, ale min ya tɔrɔyɛ kɛ bɛɛ lana wo tɛma, a ya wola chɔchi mumɛ tɔrɔya ka tenbi a ya nde tɔrɔ nya min. N ya wo fɔ min kɛ, n sa a makawala.

⁶ Ale ara tɔrɔyɛ min sɔrɔn wo bolo, wo ara a bɔ.

⁷ Nba kaka, wo ni a makoto ka a madɛnbɛ alako a yisi la kana fin ha a ni Yisata kilɛ boloka feu!

⁸ N bi wo madiyala ko wo ni a yira a la ko wo ya a keni bɛrɛkɛ!

⁹ N ya kɛdi wo sɛbɛ wo ma ka a lɔn ni wo rabɛnnɛ ka nta kumɛ bira tuma-wo-tuma. N bi a fɛ ka wo kɔrɔbɔ nun, ni wo si koe wo bira sɛbɛ la nya min.

¹⁰ Wo wa mɔgɛ do makoto ala ko-tinya-gbɛla ko la, nde fanan bara a makoto, ado ni a ya ko-yoge wo ko-yoge kɛ, n si a makoto min na, n bara a makoto ka a kɛ wolela ko la Kirasiti yala alako

¹¹ Setanɛ kana nɔ-ko sɔrɔn ma ma, ado ma ya ale Setanɛ kɛ-nyanu lɔn.

Pɔli Hɔn-Koe Tarayasi Soe Burɔ

¹² Nba, n tara Tarayasi tumɛ min ka Kirasitita kibara-nyima-kawandili bɔ, n ya a yen ko Mari ara fɛrɛ di n ma ka ata wɔlɛ kɛ nyɔ.

¹³ Kɔnɔ hali wo, n hɔnta ha ka a dan-natenbi bawo n ma ke ma na-kelen-nyɔgɛ Taita yenna. Wo le ya a to, n ya n masara nyɔ-mɔgɛnu na ka Masidoniya nyamanita-kilɛ bira.

Nɔlɛ Sɔrɔn-Koe Kirasiti Baraka Rɔ

¹⁴ Tabarakala Alla ma! Mabɛ Kirasiti ye kan kelen tɔ min kɛ, Alla ya ma ma yelela-mɔgɛnu na ka ma mayira gbɛ rɔ Kirasitita nɔlɛ rɔ. Nba kaka, ma tenbi tala kan-tina wo kan-tina, a si male bi ka Marita kibara-nyimɛ lake doinu ma. Kibarɛ wo si nyɛnsɛn iko sɛnti-suma-diyamɛ.

¹⁵ Ma niyi mani de iko sɛnti-suma-diyamɛ, Kirasiti ye min nabɔla Alla ye, kɔni. Minnu bi kisila wo, minnu bi halakila wo, wo bɛɛ si fen-sumɛ wo lamɔɛn.

¹⁶ A ara ma saya-sumɛ la wonu ye minnu bi nala halakila. Kɔnɔ a ara ma nimaya-sumɛ la wonu ye minnu bi nala kisila. Wo mɔgɔ sa min si ke wonu kɛla a nyɛrɛ ma.

¹⁷ Male sa iko mɔgɔ siyaman bi nya min. Wonu bi Allala kumɛ mayirala iko fere-kɛ-fan min dɛ ma gbɛlɛ. Kɔnɔ Alla ara ma sɔ min kɛ, ma ye kumala gbɛ rɔ Alla yala iko Kirasitita wɔli-kɛlɛnu.