2 Kɔrɛnti 13 - ALLALA KUMƐ

Makawandili Labannu anubɛ Kɔndɔlɛnu

¹ Iko a sɛbɛnɛ Allata kitabu rɔ nya min ko, “Mɔgɔ kelenna sereya-bɔɛ ti a ma, wo ni mɔgɛ yiliki fɔ sereya fila, ni wo ma, sawa.” Nba, n kinyama sawa nyɔgɔn le kɛ la gbɛ, n bi nala wo kɔndɔnna.

² Nna kɔndɔli fila nyɔgɛ rɔ, n ya hakɛ-tiginu makawandi nun, ado n sa wo fɛ kaka min kɛ, n bi a fɛ ka wobɛ doinu fanan makawandi. N ba ta tun tumɛ min, n si a lagbɛlɛya mɔgɛ bɛɛ kuma.

³ N tenbi kumala, n si a yira wo la kuma tinɛ ko Kirasiti le kumala wo ye. Kirasiti wa a lagbɛlɛya wo kuma tumɛ min, wo si a yira ko a rafagani ma. A sɛnbɛ kolo wo tɛma.

⁴ Hali a fagara kɔlɔma ma tumɛ min, a fɛrɛ-rafaganɛ a ma kɔnɔ kaka, a ye a niyi la Allata sɛnbɛ rɔ. Male fanan tafaganɛ iko Kirasiti rafaganɛ nya min nun kɔnɔ wo si a yen, ma si to ma niyi la Allata sɛnbɛ rɔ iko Kirasiti ye a niyi la nya min.

⁵ Wo ni wo nyɛrɛ fɛsɛfɛsɛ ka a lɔn ni wo ye tagamana dɛnkɛninya-mɔgɛnuna kilɛ fɛ. Wo si a lɔn worɔ, ni Kirasiti Yisa siginɛ wo yisi rɔ. Kɔnɔ ni a sigini ma wo yisi rɔ, wo ara foo dɛnkɛninyɛ wo la.

⁶ N lanɛ a la ko wo si a yen ko male ma foo dɛnkɛninyɛ wo la.

⁷ Ma ye Alla matarala ko wo kana ko-yogoma wo ko-yogoma kɛ. Ni male foora a la wo, ni ma ma foo a la wo, wo hɔnya sa male la. Alako tun wole kana foo a la, wo le gbili male ma.

⁸ Sɛnbɛ sa ma bolo ka fenfen ma min si a ma, Allala kumɛ ni tinya. Kɔnɔ ma si to ko ladanna min si Allala kumɛ lata ya rɔ.

⁹ Hali male rafaganɛ kɔnɔ ni wole sɛnbɛ kolo, wo le si ma lasewa. Woletɔ ma ye Alla matarala ko fɛɛ-wo-fɛɛ kana taran wo la.

¹⁰ Yanni n ni ke nyɔ, n bi koe kɛnu sɛbɛla wo ma. Woletɔ n ba ke nyɔ tumɛ min, n kana a lagbɛlɛya wo kuma. Mari ya sɛnbɛ min di n ma, n bi wo lawɔlila ka wo lasabati kɔnɔ wo labui ko ma de!

¹¹ Nba, n na-kelen-nyɔgɛnu, Alla ni to wo fɛ! Wo ni wo raya alako wo kanbalinɛ ni taran. N bara min fɔ wo ye, wo ni wo bira. Sɔn kelen ni taran wo bolo. Wo ni to yisi-kimɛ rɔ. Nba, Alla min bi keninteyɛ anubɛ yisi-kimɛ dila ma ma, wo ni to wo fɛ.

¹² Wo ni wo nyɔgɔn kɔndɔn diyɛ la. Allala mɔgɛ bɛɛ ye wo kɔndɔnna.

¹³ Alamɛ Mari Yisa, Allata-Mɔgɔ-Yabɔnɛta hinɛ anubɛ Allata keninteyɛ anubɛ ata Ni-Sɛnimɛta ta-nyɔgɔnyɛ tora wo dama fɛ. Amina!