2 Kɔrɛnti 12 - ALLALA KUMƐ

Pɔlita Ko-Rayirɛnu Bara-Koe

¹ Nyɛrɛ-matɔgɛ kɛ ti ko-nyinya n ma kɔnɔ hali wo, n ni n nyɛrɛ matɔgɔ fɔlɔn. Mari ya ko-rayirɛ anubɛ lankɛnimayɛ minnu di n ma, n ni wonu bara-koe fɔ kaka.

² A ara san tan-ni-nani bɔ gbɛ, dɛnkɛninya-mɔgɛ do layɛlɛta san-kole bɛɛ kuma pon! (Ni a nyɛrɛ le yɛlɛta, ka, ni a ya ko-rayirɛ le yen dɔrɔn, n ma wo lɔn. Alla kelen pe le ya wo lɔn.

³ N ya a lɔn ko kei wo layɛlɛta Alla warɛ. Kɔnɔ n ma a lɔn ni a nyɛrɛ le yɛlɛta, ka, ni ko-rayirɛ le nun dɔrɔn. Alla le ya wo lɔn.)

⁴ A ya koe donu namɔɛn nyɔ, hadama-dan ti ke minnu fɔla, ado a ti ke minnu nakaranna.

⁵ Woletɔ n si n nyɛrɛ matɔgɔ mɔgɛ wo rɔ kɔnɔ n ti matɔgɔlɛ kɛ n nyɛrɛla ko la. Koe minnu si nna sɛnbɛbɔninyɛ yira, n si n nyɛrɛ matɔgɔ wonu tɔ.

⁶ Ni n bi a fɛ ka n nyɛrɛ matɔgɔ, wo ti a ma, n ni ma kuntan la bawo n bi tonyɛ le fɔla. Kɔnɔ n ti n nyɛrɛ matɔgɔ bawo n sa a fɛ, mɔgɛnu ni anu miri nde ma bɛrɛkɛ! Anu bara n yen min kɛla ka n kan lamɔɛn min fɔla, anu miriya kana tenbi wo la.

⁷ Nba, ka a tɛgɛ wo kabana-ko-waranɛnuna ko la n ya minnu tayen, fɛrɛta-duma-ba dira n ma min manɛ n yala iko Setanɛta kilayɛ. Wo si to n gbesila ka n tanka wasinteyɛ ma.

⁸ N ya Mari madiya wola ko la kinyama sawa. N ko a ni fɛrɛta-dumɛ wo bɔ n tɔ

⁹ kɔnɔ a ya n yabi ka le. A ko n mako sa fen-gbɛrɛ la ata hinɛ kɔma. A ko ni sɛnbɛ sa n bolo, ata sɛnbɛ si koloya n tɔ worɔ. Nba, n sewanɛ bɛrɛkɛ worɔ ka wasi nta sɛnbɛbɔninya-koenuna ko la. N ni a lɔn ko Kirasitita sɛnbɛ ye n matankala.

¹⁰ Woletɔ n bi fɛrɛta-dumɛ wo kɔrɔ, hali mɔgɛnu ba n manyini wo, gbɛlɛyɛ wa na n ma wo, mɔgɛnu ba n tɔrɔ Kirasitila ko la wo, n sewanɛ wo bɛɛ rɔ. Bawo ni n sɛnbɛ sa tumɛ min, Allata sɛnbɛ ye n tɔ worɔ.

Pɔli Hɔn-Koe Kɔrɛnti Kɛnu Na

¹¹ Wole le wara a ma, n bara kun-takolonyɛ kɛ. A bɛnta wole ni n matɔgɔ nun. Hali fen ma nde la wo yala, wola kilaya-makawanɛ wonu fenfen ma tenbi nde la.

¹² Kabana-koe anubɛ ko-makawanɛ minnu ya a yira ko kilaya-bɛrɛ le nde la, n bara n munyu wo bɛɛ ma-tinɛ wo tɛma.

¹³ Nba, n ya wo bira boloko-yogomɛ-kɛ ka tenbi chɔchi donu na nun kama? Fɔ n ma wo yakɔrɔ-mamɔ min kɛ wodi-ko-dɛnbɛnɛ la dɔrɔn. Wo yandi, wo ni n makoto hakɛ wo la!

¹⁴ A sawa nyɔgɛ le kɛ la, n bi n tabɛnna ka ta wo kɔndɔn tinɛ. N ti wo manyinika fenfenna ko la, ado n sa wola wodi fɛ, fɔ wole nyɛrɛ. Fɛda, a ma bɛn, dennɛnu ni fen nadɛn anu sɔrɔnnɛnu ye. A bɛnta, anu sɔrɔnnɛnu ni fen nadɛn anuna dannu ye.

¹⁵ N si sewa ka n bolo-fan bɛɛ ni wola ko la, hali ka n nyɛrɛ niyi fanan sa a kuma wo dɛnbɛn-koe la. Nta keninteyɛ ye koloyala wo ye min kɛ, wo si a ma, wota keninteyɛ ma ni to yigila n bara la, wa?

¹⁶ Wole nyɛrɛ ara sɔn ko n ma ma dunɛ la wo kuma. Kɔnɔ mɔgɛ donu si a fɔ ko nde halli nun. Anu ko n ya wo bole labira.

¹⁷ Wo mara kama? N ya kilayɛ minnu nata wo ma, n ya tɔnɛ sɔrɔn wo bolo wonu fɛ nun, ba?

¹⁸ N ya Taita madiya anubɛ ma na-kelen-nyɔgɛ do ko anu ni ta. Wo si a fɔ ko Taita ya tɔnɛ sɔrɔn wo bolo, wa? Ade, mabɛ wo taranta ko kelen kɛla yisi kelen na nun.

¹⁹ Tumado, wo ye wo mirila ko ma ye ma rayala wati bɛɛ ka ma nyɛrɛ fɛka wo ye. Ade! Ma ye kumala iko Kirasiti ye a fɛ, ma ni kuma nya min Alla yala. Ma diyana-mɔgɛ le wole la. Ma ye koe min bɛɛ mala, ma ye wo kɛla wo dɛnbɛn-koe le la.

²⁰ N kilannɛ ko n ba ke nyɔ tumɛ min, n bi wo taranna nya-gbɛrɛ ma iko a ma di n ye ka wo taran nya min. Wo fanan si n taran nya do ma iko a ma di wo ye ka n taran nya min. Sɔsɔlɛ wo, keliyɛ wo, yisi-bɔɛ wo, kɔrɔndiyɛ wo, lafɛyɛ wo, nafigiyɛ wo, wasinteyɛ wo, sɔnkɔ-sɔnkɛ wo, n kilannɛ ko wo donu si taran wo tɛma.

²¹ N kilannɛ fanan ko n ba ta tumɛ min, nta Alla si n nafɛya wolela ko la. Wo siyaman bara hakɛ kɛ fɔlɔn. N kilannɛ, wo ti sɔn tubila ko-kɔsɔnɛ wonuna ko la. Wo ya min kɛ, wola yɛlɛnya-hakɛnu anubɛ nata-kɛwɔlɛnu si a ma, n ni di biribiri wo siyamanna ko la.