2 Ko-Kɔrɔta-Karan 9 - ALLALA KUMƐ

Siba Musu-Mansɛ Ta-Koe Mansa Silamɛni Kɔndɔn Tinɛ

¹ Mansa Silamɛni ya hɛnkili sɔrɔn nya min Mari bolo, Siba musu-mansɛ ya ala hɛnkilimayɛ wo mankan lamɔɛn. Wo le ya a ma, ale nara mansɛ hɛnkili kɔrɔbɔ tinɛ. A nara a gba-fɛ-bilala-siyaman na. Wo kɔma, a ya kɛnɛ-dunɛnu anubɛ sɛnɛ-dunɛnu anubɛ dugu-kɔrɔ-nɔnfulu-siyaman dunɛnu kiri nyomɛnu kɔ tɛma. Ale musu-mansɛ ya Mansa Silamɛni taran min kɛ Yerusalɛm soe burɔ, a ara a miri nyinikalɛ min bɛɛ ma, a ya ale mansɛ manyinika wonu na.

² Ala nyinikalɛ wo do-wo-do ma Mansa Silamɛni kɔndɔfili. A ya wo bɛɛ yabi a kilɛ fɛ.

³ Siba musu-mansɛ wo ya a tole masɔ Mansa Silamɛnina hɛnkilimaya-kumɛnu na. Wo kɔma, musu-mansɛ wo tara Mansa Silamɛnina bolon-sɔnɛ mafɛlɛn.

⁴ Mansɛ ye dɔn-fan sufa min dɔnna ala tebulu kuma, musi wo ya wonu yen a yɛ la min kɛ, a yɛ bɔra wonu na ka kawa. A ya ala mɔgɔ-banu sigi-bole yen anu sansan-yili ma tebulula foolɛ rɔ nya min, a yɛ bɔra wonu fanan na ka kawa. Wo kɔma, a ya ale mansɛla wɔli-kɛlɛnu makiri-nya anubɛ ala baan-bɔlɛnu yen nya min, a yɛ bɔra wonu fanan na ka kawa. Wo kɔma fanan, a tara Mari Bato-Bɔn la ka saraka-mintantɛnu yen Mansa Silamɛni ye minnu dila Mari ma nyɔ. A ya kɛ dama yen a yɛ la min kɛ, a kawara ha a ya a bole sa a dɛ la.

⁵ A ya a fɔ Mansa Silamɛni ye ko, “N bara ita hɛnkilimaya-koe min bɛɛsi lamɔɛn nta nyamanɛ rɔ nun, tonyɛ le wonu na.

⁶ Ni n ma na kɛnu tayen n yɛ la nun, n ti la a la. N bara minnu tayen kɛ la, wo kolo ka tenbi min takaranta n ye pirr! Anu tara ita hɛnkilimayɛ rakaran n ye nya min, n bara na a rayen n yɛ la nya min kɛ la, kɛ tenbira a rakaran wo la.

⁷ Ila mɔgɛnu anubɛ ila mɔgɔ-ba minnu siginɛ i dafɛ, anu bi anu diya. Anu tole masɔnɛ ita hɛnkilimayɛ kun-nadiyɛ la tele-wo-tele.

⁸ Tantolɛ ni kɛ ita Mari Alla ye. Ile ara Alla hɛnɛ min kɛ, woletɔ ale ara ile ma mansɛ la alako i ni mansayɛ kɛ a tɔgɔ rɔ. Ka tenbi wo la, Isirɛla mɔgɛnu keninɛ Mari bolo min kɛ, woletɔ a ara anu nasabati tɛban, ado a ara ile ma mansɛ la anu kun na alako i ni tɔnnu mabalan ka kitinu tɛgɛ telenbagayɛ la.”

⁹ Musu-mansɛ wo ya Mansa Silamɛni sanba kɛnɛ anubɛ dugu-kɔrɔ-nɔnfulinu na. Wo kɔma, a ya sɛnɛ min di a ma, wola gbiliyɛ anubɛ fui-fan bɔrɔ bi-wɔrɛ rakɛn de! Ale Siba musu-mansɛ wo nara kɛnɛ min nyɔgɛ la mansɛ ye, mɔgɔ-wo-mɔgɔ ma ke nala wo nyɔgɔn na bɛ.

¹⁰ (Hairamna kulun-tawɔli-kɛlɛnu anubɛ Mansa Silamɛnita kulun-tawɔli-kɛlɛnu nara ka bɔ Ɔfiri nyamanɛ rɔ. Wonu nara sɛnɛ-siyaman na kulɔn wonu tɔ. Wo kɔma, ale kulun kelan kɛnu denu nara kɔlɔma-hakikɛnu anubɛ dugu-kɔrɔ-nɔnfulinu na anu tɔ ka bɔ Ɔfiri nyamanɛ rɔ.

¹¹ Mansa Silamɛni ya kɔlɔma wonu denu bi ka kin-pogorɔn nadan Mari Bato-Bɔn anubɛ a nyɛrɛta bolɔnna ko la. A ya kɔlɔma-su wonu denu bi ka anu ma seremanu anubɛ sɔrɔnnu na ka wonu don fɔli-kɛlɛnu bolo. Ka a bi wati wo ma ha ka a sigi kaka la, mɔgɔ-wo-mɔgɔ ma ke wo nyɔgɔn kɔlɔma sufanu nanala Isirɛla nyamanɛ rɔ.)

¹² Mansa Silamɛni ya musu-mansɛ wo diyana-fannu bi ka wonu sa a masara-fannu kuma. Wo tara fan minnu na a bolo, wo tenbira Mansa Silamɛni sanbɛnu na a nara minnu na. Anubɛ a gba-fɛ-bilalɛnu sɛgira Siba nyamanɛ rɔ.

Mansa Silamɛnita Banaya-Koe

^13-14 Yilanu bi duti dila Mansa Silamɛni ma. Ale fanan bi tɔnɛ sɔrɔnna yilayɛ rɔ. Arebiyanuna mansɛnu bi a sanbala. Hali ata sigisɔn-mansɛ minnu bi Isirɛla nyamanɛ rɔ, wonu bi a sanbala sɛnɛ anubɛ wodi-gbɛ la. Min sanɛ wo kuma san-bo-san, Mansa Silamɛni si sɛnɛ sɔrɔn minna gbiliyɛ anubɛ fui-fan bɔrɔ kɛmɛ sawa, bɔrɔ bi-sawa ani bɔrɔ sawa (333) rakɛn.

¹⁵ Mansa Silamɛni ya walan kɛmɛ fila ladan ka sɛnɛ sa wo bɛɛ ma. A walan-kelan-sɛnɛ, wola gbiliyɛ anubɛ fui-fan pani-kunbɛ-nya sawa rakɛn de!

¹⁶ Wo kɔma, a ya walan-dɔgɔma kɛmɛ sawa ladan ka sɛnɛ sa wonu fanan ma. Sɛnɛ min nyɔgɔn sanɛ a walan-dɔgɔma kelan wo do ma, wola gbiliyɛ anubɛ fui-fan pani-kunbɛ-nya kelen ani a talɛ rakɛn de! Mansa Silamɛni ya walan wonu namara bɔn wo la min nadanta Lɛbanan kɔlɔmanu na.

¹⁷ Wo kɔma, a ya mansaya-waganɛ ladan. Sogo-ba-nyin-lɛsɛnɛ sanɛ wo tɔnkɔn do ma, sɛnɛ-hakikɛ sanɛ a tɔnkɔn doi wo ma.

^18-19 Kin-pogoron wɔrɔ tɛgɛnɛ ye yɛlɛla anu nyɔgɔn kuma ka ke mansaya-waganɛ wo ma. Kin sa tinɛ kankannɛ waganɛ wo ma. Sɛnɛ sanɛ wo fanan ma. Yarɛla muninya tan-ni-fila ladannɛ yɛlɛla kin-sɔ-tina wɔrɛ wo tɔnkɔn filɛ bɛɛ ma. A kɔɛn filɛ sa tinɛ tɔnkɔn rɔ, yarɛla muninyɛ ladannɛ wonu fanan ma. Ala mansaya-waganɛ wo nyɔgɔn sa mansa-wo-mansa bolo duninya rɔ fɔ ale kelen pe.

²⁰ Ala yi-lafɛnu anubɛ ala bonna-mirannu, wo damasi ladanta sɛnɛ le la. Ala bɔn doi min nadanta Lɛbanan kɔlɔmanu na, miran minnu bi bɔn wo la, wo bɛɛ ladanta sɛnɛ la. Anu ma miran-wo-miran ladan wodi-gbɛ la mansɛ ye bawo anu ma wodi-gbɛ lɔn fen-kolomɛ la ata wati wo rɔ.

²¹ Kulun-siyaman bi ale mansɛ bolo kɔgɔ-yi kuma. Wonubɛ Mansa Hairamta kulɔnnu bi tala anu nyɔgɔn fɛ. Kulɔn kɛnu ba ta, san fila a sawa nyɔgɛ, anu si sɛgi sɛnɛ anubɛ wodi-gbɛ anubɛ sogo-ba-nyin anubɛ gbɔn-kɛndɛ anubɛ wɔrɔn-kɛndɛ la anu bolo Yerusalɛm.

²² Mansa Silamɛni mara fen-tigi anubɛ hɛnkilimɛ la ka tenbi mansɛ bɛɛ la duninya rɔ.

²³ Alla ya hɛnkilimaya-kumɛ min di Mansa Silamɛni ma, a sɔgɛ ya duninya-mansɛnu bira ka ta anu tole masɔ wo la.

²⁴ San-bo-san, min ba wuli tala bɔla a wara, wo si a sanba. Donu si na sɛnɛ la, donu si na wodi-gbɛ la, donu fanan si na duruku-ba la, donu si na kɛlɛ-kɛ-fan la, donu si na kɛnɛ la, donu si na soeenu na, donu si na sofɛlɛnu na anu bolo.

²⁵ So lamara tinɛ waga nani (4,000) ye Mansa Silamɛni bolo. Soee wonu bi kirindinu saganna. A ya kɛlɛ-kɛ-soee minnu nadɛn a nyɛrɛ ye, wo le waga tan-ni-fila (12,000). A ya donu namara Yerusalɛm soe burɔ. A ya donu namara soe donu tɔ.

²⁶ Ka a bi Yufereti bɛ ma ka ta a sigi Filisitinuna nyamanɛ la ha ka ta ke Isirɛla anubɛ Iyipiti dan ma, ale le ye tɛngbɛnya wo mansɛ bɛɛ kun na.

²⁷ Ale Mansa Silamɛni ya a ma, wodi-gbɛ rakara Yerusalɛm soe burɔ baraki, iko kuru-kundi. Fɛran minnu dɛ gbɛlɛ, wonu bi nyɔ duk! Kurukurun ti a ban, tarali ti a ban. Anu siya iko toro-kuri-mɛsɛ minnu bi Isirɛla gburukulinu ma.

²⁸ Mansa Silamɛnina yilanu ya soeenu san a ye Iyipiti nyamanɛ anubɛ nyamanɛ doinu tɔ.

Mansa Silamɛnita So-Sɛgi-Koe

²⁹ Mansa Silamɛni ya koe min bɛɛsi ma ala mansayɛ kɔrɔ ka a fɔlɔ a lawulan anubɛ a laban ma, wonu damasi sɛbɛnɛ buku sawa rɔ. A sɛbɛra Nɛbi Netanta nɛbiya-buku rɔ. A sɛbɛra Nɛbi Ahayata nɛbiya-buku rɔ, Sailo kɛ, kɔni. A sɛbɛra Nɛbi Idota nɛbiya-buku rɔ fanan. Nɛbi Ido kɛ ya Nebatila dan Mansa Yɛrabowami wara-koe sɛbɛ.

³⁰ San bi-nani ale Silamɛni ye mansayɛ la Isirɛla mɔgɛnu kuma Yerusalɛm soe burɔ.

³¹ A ya so-sɛgi-kɛ tumɛ min, anu ya a togon a fa Mansa Dawuda halala-luyi ma. Ala den Rihobowami sigira a gbɛ rɔ.