2 Ko-Kɔrɔta-Karan 8 - ALLALA KUMƐ

Mansa Silamɛnita Kɛwɔlɛnu Bara-Koe

¹ Mansa Silamɛni ya san mogan de kɛ Mari Bato-Bɔn anubɛ ata bolon-sɔɛ kun na.

² A ban, Mansa Hairam ya soe minnu di a ma, a ya wonu sɔ-kurɛ-kɛ tun. A ya Isirɛla mɔgɛ donu nata nyɔnu tɔ. Wonu sigira soe wonu tɔ.

³ Mansa Silamɛni tara bui Hamati anubɛ Soba sigisɔnnu ma ka nyɔnu bi.

⁴ Tama soe min bi wula-da-rakolɔn rɔ, a tara ka wo bi ka tarɛ mini wo ma. A si fannu namara soe minnu tɔ Hamati sigisɔn rɔ, a ya wonu sɔ-kurɛ-kɛ.

⁵ Bɛti-Hɔrɔn min bi kɔnkɛ kuma wo, Bɛti-Hɔrɔn min bi kɔnkɛ kɔrɔ wo, ale mansɛ ya wonu sɔ-kurɛ-kɛ tun. Tarɛ mininɛ so filɛ wonu ma, ado tara-dɛ wonu tasɔgɔ-kɔnnu bi nyɔ.

⁶ Beyalati soe wo, ale mansɛ bolo-fannu namaranɛ soe minnu tɔ wo, ala kirindinu anubɛ ala soeenu namaranɛ soe minnu tɔ wo, a ya wonu sɔ-kurɛ-kɛ tun. Bɔn sɔ-koe-miriya min bɛɛ ye Mansa Silamɛni la nun, a ya wo bɛɛ ma Yerusalɛm soe burɔ anubɛ Lɛbanan nyamanɛ rɔ anubɛ a ya mansayɛ kɛ sigisɔn min bɛɛ kuma.

^7-8 Mansa Silamɛni ya minnu sɔ wɔlɛ kɛ la, Kenan kegeyɛ le wonu na. Isirɛla mɔgɛnu nanɛ nyamanɛ wo rɔ, anu ma anu denu faga. Amoranu bi kɛnu denu tɛma. Hɛtinu fanan basannɛ anu na. Pɛrasanu anubɛ Yɛbusinu fanan kofunɛ anu ma. Ha bi, wonu donu bi yɔɔnyɛ rɔ Isirɛla mɔgɛnu bolo.

⁹ Kɔnɔ Mansa Silamɛni ma sɔn Isirɛla mɔgɔ-wo-mɔgɔ mala yɔɔn la. Wonu taranta kɛlɛ-denyɛ anubɛ kɛlɛ-kurugbayɛ anubɛ kɛlɛ-den-kun-tigiyɛ anubɛ so-laburilɛ anubɛ kirindi-laburilɛnu denu na.

¹⁰ Mɔgɔ-ba kɛmɛ fila ani mɔgɔ bi-loli (250), wonu denu bi Mansa Silamɛnina wɔli-kɛlɛ kɛnu kun na.

¹¹ Mansa Silamɛni ya Iyipiti mansɛla dunmusi min furu nun, a ya wo bɔ a fa Mansa Dawudata luyi ma ka wo lata a halala-bɔn la, a ya min sɔ ala musi wo ye. A ya a fɔ ko, “A ma bɛn, musi kɛ ni to Isirɛlata Mansa Dawudata luyi ma bawo ni tɔn-kenkirɛ ye kan min nun, nyɔ sɛninyani de!”

¹² Mansa Silamɛni ya sarakɛnu bɔ saraka-mintan-tinɛ kuma a ya min nadan Bato-Bɔn yarɔ.

¹³ Iko Nɛbi Musata tɔn ya a fɔ nya min, a tora saraka-mintantɛnu bɔla tele-sɛnimɛnu ma, a Sulen-Tele wo, a Karɛ-Kurɛ-Ladɛn wo, a Biredi-Yɛlɛbɛlɛ-Dɔn-Ladɛn wo, a Dɔn-Fen-Kun-Fɔlɛ-Ladɛn wo, anubɛ a Lele-Sɔɛ-Ladɛn.

¹⁴ A ya wɔlɛ tala Lifayinu anubɛ saraka-masɔlɛnu na iko a fa Mansa Dawuda ya a rabɛn nya min nun. Lifayinu bi sigi-sɛ kun na anubɛ Bato-Bon-wɔlɛ donu kɛla. A ya Bato-Bɔn da-makandan-wɔlɛ tala anu na kurun-kurunyɛ ma iko a fa Mansa Dawuda ya a rabɛn nya min, Allata mɔgɛ, kɔni.

¹⁵ Mansa Dawuda ya koe min bɛɛsi fɔ saraka-masɔlɛnu anubɛ Lifayinu ye katarala fen-namara-bɔnnu ma, anu ya wo bɛɛ ma a kilɛ fɛ.

¹⁶ Koe min bɛɛsi taranta Mansa Silamɛni sɔndɔmɛ rɔ, a ya wo bɛɛ ma. Ka a bi Bato-Bɔn kurukɛ tinɛ ma ha ka a laban, a ya wo bɛɛ ladan a kilɛ fɛ.

¹⁷ Mansa Silamɛni tara kɔgɔ-yi-bolɔn-doi wara la Iseyɔn-Kiba soe dafɛ min bi Ilati soe telen tɔ Idɔm nyamanɛ rɔ.

¹⁸ Mansa Hairam ya kulun-belebelenu nata ale Mansa Silamɛni ma nyɔ rɔ anubɛ ala kulun-tawɔli-kɛlɛnu. Wonubɛ mansɛta kɛlɛ-den-kunyɛnu tara Arabu nyamanita soe do rɔ min tɔgɛ Ɔfiri. Anu bɔra sɛnɛ minnu na nyamanɛ wo rɔ, wola gbiliyɛ anubɛ fui-fan bɔrɔ kɛmɛ fila anubɛ bɔrɔ tan-ni-loli (215) rakɛn de! Anu nara wo don Mansa Silamɛni bolo.