2 Ko-Kɔrɔta-Karan 7 - ALLALA KUMƐ

Mari Bato-Bɔn Dantɛgɛ-Koe

¹ Mansa Silamɛni ban matarali-kɛ wo la, tɛ bɔra san-kole rɔ ka sarakɛ wo dama mintan gburr! Marita wan-belebele wo ya waan raka Bato-Bɔn burɔ waran!

² Bawo waan wo rakanɛ bɛrɛkɛ, saraka-masɔlɛnu ma ke anu kunyɛ ladonna nyɔ rɔ wati wo rɔ.

³ Isirɛla mɔgɛnu ya tɛ yen bɔla san ma min kɛ, ado Bato-Bon-burɛ lafanɛ wan-takanɛ la, anu ya anu madu dugi ma ka batoli anubɛ tantolɛ di Mari ma ko, “Wo ara a yen Mari kin nya min? Ala keninteyɛ ti ban mumɛ!”

⁴ Wo kɔma, Mansa Silamɛni anubɛ ala nyamanita-mɔgɛnu ya sarakɛnu bɔ Mari ye.

⁵ Mansa Silamɛni ya ninki waga mogan-ni-fila (22,000) ma sarakɛ la. Wo kɔma, a ya saga waga kɛmɛ ani saga waga mogan (120,000) ma yisi-kima-sarakɛ la fanan. Ale mansɛ anubɛ ala nyamanita-mɔgɛnu ya sarakɛ wonu bɔ ka Bato-Bɔn wo dantɛgɛ Mari ma.

⁶ Kan tinɛ minnu yiranɛ Lifayinu anubɛ saraka-masɔlɛnu na nun, anu ya anu sɔ wonu tɔ. Lifayinu yɛ lamununnɛ saraka-masɔlɛ wonu na. Anu bi Mari tantola fɔli-fan wonu na ale Mansa Dawuda ya minnu don anu bolo nun. Anu bi bɛti bɔla iko Mansa Dawuda ya anu nabila nya min, anu ko, “Marita keninteyɛ ti ban.” Saraka-masɔlɛnu bi buru-fɛyɛ wo kun na tumɛ min, Isirɛla mɔgɛnu sɔnɛ tora anu gbɛ rɔ yiri!

⁷ Bawo saraka-mintan-tinɛ dɔgɔ sarakɛ wonuna ko la, wo le ya a ma, ale mansɛ ya Bato-Bon-lu-kolo-toe fanan sɛninya alako ka saraka-mintantɛnu bɔ nyɔ anubɛ fui-fen-sarakɛnu anubɛ kɛɛn min bɔra yisi-kima-saraka-soge wonu tɔ.

⁸ Mansa Silamɛni anubɛ ala nyamanita-mɔgɛ minnu bɔra Isirɛla nyamanɛ-tonko-nanɛ bɛɛ rɔ ka bi Hamati kɔnkɔ-gbɛran ma kantɔ-wara la ha Isirɛla anubɛ Iyipiti dan wara la, wonu ya Lele-Sɔɛ-Ladɛn kɛ Bato-Bɔn dafɛ a nyɔgɔn tele wɔrɔnfila kɔrɔ tun.

⁹ Anu ya tele wɔrɔnfila le bɔ saraka-mintan-tinɛ wo dantɛgɛ tinɛ Mari ma. Anu ya tele wɔrɔnfila le bɔ Lele-Sɔɛ-Ladɛn wara-koe la. Wo tele wɔrɔnfila nyɔgɛ ma, anu ya anuna batolɛ wo kundon.

¹⁰ A karɛ wɔrɔnfilɛ wo tele mogan-ni-sawa nyɔgɛ ma, Mansa Silamɛni ya nyama latenbi. Anu dama kɔntɔ-diyanɛ tara anu barɛnu tɔ kamasɔrɔn Mari Alla ara ata duwɛ min nayigi Mansa Dawuda anubɛ Mansa Silamɛni anubɛ Isirɛla mɔgɛ damasi ma.

Mansa Silamɛnita Kiyo Fila Nyɔgɛ

¹¹ Mansa Silamɛni ban Bato-Bɔn anubɛ a nyɛrɛta bolɔn ladanna iko ala miriyɛ ye nya min,

¹² Mari ya a nyɛrɛ yira a la suyi rɔ. Mari ya a fɔ a ye ko, “N bara ila matarali-kan lamɔɛn. Anu bi sarakɛnu bɔla n ye kan min, n bara wo bira.

¹³ Ni n ya yili kiri bandɛla nɛ la wo, ni n ya kondɔnnu nana ka wola ki-fannu dɔn wo, ni n ya kiraya-yogomɛ latenbi nna mɔgɛnu ma wo, n ba wonu ma tumɛ min,

¹⁴ ni anu ya anu sɔ anu hakɛ la ka n matara ka anu kan-kɔ sɔ anuna karagbɛlɛyɛ la, n si a lamɔɛn Arinyɛni tɔ ka anu makoto anu hakɛ la. N si a ma, anuna nyamanɛ ni diya tun.

¹⁵ N si Bato-Bɔn kɛ makandan. N yɛ lakalannɛ si to, ado n tole masɔnɛ matarali-kannu na anu bi minnu kɛla nyɔ

¹⁶ bawo n bara nyɔ yabɔ ka a ma kan-tina-dantɛgɛnɛ la. Mɔgɛnu si to n batola nyɔ burubukai!

¹⁷ Ni ile ya nta kumɛ bira i bolo filɛ la iko i fa Dawuda ya a ma nya min, i ni to koenu mala iko n bi a fɔla i ye nya min.

¹⁸ N bara lanyiri min kiri i fa ye, n si wo latɔnbagaya bawo n bara lanyiri kiri a ye nun ko ale bɔnsɔnnu si to mansayɛ kɛla Isirɛla nyamanɛ kun na.

¹⁹ “Kɔnɔ ni wolebɛ ila mɔgɛnu ya nna tɔnnu tinya n bara min di wo ma nun ka a tɛgɛ bɛsi-kɔɛ ma,

²⁰ wo si a ma, n ni wo bɔ nyamanɛ kɛ rɔ. Wo kɔma, n ni n ban bɔn kɛ la min dantɛgɛnɛ n bato-koela ko la. Duninya-mɔgɛ bɛɛ si Bato-Bɔn wo ma mayɛlɛnma-fan la.

²¹ “Kaka, mɔgɛ bɛɛ ye Bato-Bɔn kɛ gbiliyala. Kɔnɔ wo wati rɔ, min tenbi tenbila a fɛ, anu si anu bole sa anu dɛ la ka kawa. Anu si a fɔ ko, ‘Nfenna Mari ya kɛ ma nyamanɛ kɛ anubɛ a bato tinɛ kɛ la?’

²² “Wo kɔma, mɔgɛnu si a yabi ko, ‘Bawo anu bara anu ban anu benbanuta Mari Alla la min ya anu benbanu nabɔ Iyipiti nyamanɛ rɔ ka anu kunyɛ ladon bɛsi-kɔɛ rɔ, woletɔ a ara kasarɛ kɛ lana anu kuma.’ ”