2 Ko-Kɔrɔta-Karan 34 - ALLALA KUMƐ

Yuda Mansa Yosaya Wara-Koe

¹ Yosaya ya mansayɛ sɔrɔn Yuda nyamanɛ rɔ a sɔrɔn-san segin nyɔgɛ le ma. San bi-sawa ani san kelen, a ye mansayɛ la ka bɔ Yerusalɛm soe burɔ.

² Mansa Yosaya ya a benba Mansa Dawuda sɔn-nyimɛ bi. A ya Allata tɔn bɛɛ bira, ado a ya min bɛɛ ma, wo ya Mari hɛnɛ.

Alla-Batobɛlɛ Nɔ-Koe Mansa Yosaya Bolo

³ Mansa Yosayala mansayɛ san segin nyɔgɛ ma, ado wati wo ya a taran a dɔgɔ fɔlɔn, a ya a benba Mansa Dawudata Alla-batoe dabira. San nani wo kɔma, a donta Alla-batobɛlɛnuna kɔ tinɛnu tinya koe rɔ. Hali bɛsi-musi Asurala muninyɛ, a ya wola tamaserenu tinya anubɛ bɛsɛ toe bɛɛ.

⁴ Ala mɔgɛnu ya Beyali kɔ tinɛnu tinya ka isɛnti mintan tinɛnu tinya minnu bi bɛsɛ wonu dafɛ. Anu ya bɛsi-musi Asura wonubɛ bɛsɛ doinu tabunden. Wo kɔma, a ya bɛsɛ wonu gbangbannu kɛ bɛsɛ wonu masɔlɛnu kaburunu kuma.

⁵ A ya bɛsi-masɔlɛ wonu kolenu mintan anuna bɛsi-mintan-tina-kɔrɛ wonu tɔ. A ban wonu mala, wo ya a ma, Yuda nyamanɛ anubɛ Yerusalɛm soe sɛninyara iko tɔn ya a fɔ nya min.

⁶ Manasa wo, Ifɛrɛm wo, anubɛ Simiyɔn bɔnsɔn-mɔgɛnu barɛnu, hali Nafatali bɔnsɔn-mɔgɛnu barɛ kantɔ-wara la pon, Mansa Yosaya ya ko kelan wo le ma soe wonu tɔ.

⁷ A ya bɛsi-kɔ-tinɛnu takerikeri anubɛ bɛsi-musi Asurala muninyɛ. A ya bɛsɛ wonu tabunden ka isɛnti mintan tinɛnu tatii. A tara wo ma-tinɛ Isirɛla nyamanɛ rɔ wo nya na le. A ban bɛsi-tinyɛ wonu na, a sɛgira a kɔma Yerusalɛm.

Marita Tɔn-Buku Yen-Koe Bato-Bɔn La

⁸ Mansa Yosayala mansayɛ san tan-ni-segin nyɔgɛ ma, a ya bɛsi-kɔ-koe ban min kɛ, wo le ya a ma, nyamanɛ anubɛ Mari Bato-Bɔn sɛninyara. A ya mɔgɔ sawa sɔ Mari Bato-Bɔn la a mabɛn-koe rɔ. Wonu tɔgɛ le kɛnu na, Asalayala den Safan anubɛ Meyaseya min bi Yerusalɛm so-tigiyɛ la, anubɛ Yowahasila den Yowa. Kɛdi-sɛbɛnɛnu-namaralɛ le wo la.

⁹ Saraka-masɔlɛnu ya wodi min bira Bato-Bɔn don-dɛ la, anu ya wonu don Saraka-Masɔla-Kun-Tigi-Wɛ Helikaya bolo. (Min nara gbɛsɛ-gbɛsɛ kɛ la, wonu bɔnsɔn tɔgɛ le kɛnu na, Ifɛrɛm wo, Manasa wo, Yuda wo, Bɛnyamɛ wo, anubɛ bɔnsɔn doi minnu bi kantɔ-wara la. Yerusalɛm kɛnu fanan ya anutɛ labɔ.)

¹⁰ Saraka-Masɔla Helikaya fanan ya wodi wo bi ka a don Bato-Bonna-wɔli-kunyɛnu bolo, mɔgɔ sawɛ kɛnu, kɔni.

¹¹ Wonu ya wodi wo bi ka bon-sɔlɛnu anubɛ a tuwalɛnu sara. Wo kɔma, anu ya fɛrannu anubɛ kuru-lɛsɛnɛnu san wodi wo do la, ado Yuda mansa-kɔrɛnu ya anu tui ha bato-bɔn wo tinyanta anu yala nun.

¹² Wɔli-kunyɛ wonu natelenta. Hali mɔgɔ ma anu manyinika wodi wo lawɔli-nya ma. Lifayi mɔgɔ-ba nani bi nyɔ fanan min bi wɔli-kun mɔgɔ sawɛ kɛnu makawandila. Mɔgɔ-ba nanɛ wonu tɔgɛ le kɛnu na, Yehati anubɛ Obadaya ka bɔ Mɛrari kebila-mɔgɛnu tɔ anubɛ Sakaraya anubɛ Mɛsulam ka bɔ Kohati kebila-mɔgɛnu tɔ. Lifayi bɔnsɔn-mɔgɛ min damasi kusan fɔli kɛla,

¹³ wonu bi bato-bon-miran-madununɛnu kun na. Donu bi wɔli-kɛlɛ donu kun na. Donu bi sɛbɛli kɛla. Fen-makandannɛ le donu na.

¹⁴ Lunyɛ do, Saraka-Masɔla-Kun-Tigi-Wɛ Helikaya ye wodi-labɔɛ la fen namara tinɛ, Alla ya tɔn-buku min don Musa bolo, a ya wo yen nyɔ.

¹⁵ A ya a fɔ kɛdi sɛbɛla Safan ye ko, “N bara tɔn-buku yen Bato-Bɔn kɛ la yan.” A ya tɔn-buku wo bi ka a don Safan bolo.

¹⁶ Safan tara wo la Mansa Yosaya warɛ. A ya a fɔ a ye ko, “I ya ma sɔ wɔlɛ min na, ma ye ma rayala wo ma.

¹⁷ Wodi min namaranɛ Bato-Bɔn la, ma ara ta wonu don wɔli-kunyɛnu anubɛ wɔli-kɛlɛnu bolo.”

¹⁸ Wo kɔma, a ya a fɔ mansɛ ye tun ko, “I ma buku kɛ yen Saraka-Masɔla-Kun-Tigi-Wɛ Helikaya ya min don n bolo?” A donta buku wo karan rɔ mansɛ ye.

¹⁹ Kumɛ minnu sɛbɛnɛ buku wo rɔ, ale mansɛ ya wo lamɔɛn tumɛ min, a ya ala fulɛ fili dugu ma.

²⁰ Saraka-Masɔla-Kun-Tigi-Wɛ Helikaya wo, Safanla den Ahaikam wo, Masikayala den Abadan wo, mansɛ fɛ-birala Asaya wo, anubɛ ale Safan nyɛrɛ wo, mansɛ ya a fɔ anu ye ko,

²¹ “Wo ta Mari manyinika mabɛ Yuda kɛnu anubɛ Isirɛla kɛnu ye ka a tɛgɛ karan min bi buku kɛ rɔ. Mari ara diminya ma ma bawo ma fanu ma Marita kumɛ bira ka tagama iko a sɛbɛnɛ buku kɛ rɔ nya min.”

²² Saraka-Masɔla-Kun-Tigi-Wɛ Helikaya anubɛ mɔgɛ donu tara nɛbi-musi do manyinika min tɔgɛ Hulada iko Mansa Yosaya ya a fɔ anu ye nya min. Wo siginɛ Yerusalɛm kan-tina-kurɛ do rɔ. (Nɛbi-musi kɛla kei le Tekefala den Salumu na. Salumu wo benba tɔgɛ le Harahasi. Bato-Bɔn wo durukinu-namaralɛ le ale Salumu na.) Koe min bɛɛ mara, anu ya wo rakaran nɛbi-musi wo ye.

^23-24 A ya Marita sarakanɛ fɔ anu ye ka anu nasɛgi Mansa Yosaya ma, a ko, “Mari ko a ye nala Yerusalɛm soe kasarala ka ala mɔgɛnu tɔrɔ iko mansɛ ara a rayen buku kɛ rɔ nya min.

²⁵ A ko anu ya anu ban ale Mari la. A ko anu ya sarakɛnu bɔ anuna bɛsɛnu ye woletɔ ale Mari fonde bɔnɛ Yerusalɛm kɛnu kuma. A ko fenfen sa nyɔ min si ala fondo-bɔɛ makimɛ.

²⁶ Isirɛlata Mari Alla ya min fɔ ale Yuda mansɛla ko rɔ ko min sɛbɛnɛ ata buku rɔ, a ya a tole masɔ wo la.

²⁷ A tubira ka a nyɛrɛ famayigi ale Mari ye. A donta diyi-kɛ rɔ ka ala fulɛ fili dugu ma bawo a ara a yen, Mari ye nala Yerusalɛm kɛnu tɔrɔyala nya min. Kɔnɔ Mari ko a ara ale mansɛla matarali-kan lamɔɛn.

²⁸ Woletɔ a ti tɔrɔyɛ wo lana Yerusalɛm soe ma fɔ ale mansɛ wa faga tumɛ min. Mari ko a si a ma, ale mansɛ ni faga yisi-kimɛ rɔ.” Mɔgɛ wonu tara kilayɛ wo lake Mansa Yosaya ma.

Mari Bato-Bɛrɛ Lana-Koe Mansa Yosaya Bolo

²⁹ Ale Mansa Yosaya ya Yuda nyamanita-mɔgɔ-banu anubɛ Yerusalɛm mɔgɔ-banu kundɛn kan-tina-kelen.

³⁰ A saraka-masɔla wo, a Lifayi wo, a mɔgɔ-ba wo, a bolo-kolon wo, a fen-tigi wo, anu dama tara anu nyɔgɔn fɛ Bato-Bɔn la. Anu ya tɔn-buku min yen Mari Bato-Bɔn la, mansɛ nyɛrɛ-nyɛrɛ ya wo karan mɔgɛ wonu damasi ye.

³¹ A ban, ale mansɛ wo sɔra mansa-sɔ-tina-kɔrɛ Bato-Bɔn sɛnbɛrɛn-kɔn fɛ ka sarama-kan kiri anubɛ Mari tɛma. A ko a si ala tɔn wonu natɔnbagaya a yisi bɛɛ la. Anu sarata min na, a ko a si sereya mumɛ bɛɛsi bira iko a sɛbɛnɛ Marita buku wo rɔ nya min.

³² A ya a ma, Bɛnyamɛ bɔnsɔn-mɔgɛ minnu bɛnta ladɛn kɛ rɔ anubɛ mɔgɛ bɛɛsi minnu bi Yerusalɛm soe burɔ, wonu ya sarama-kan kiri tɔn wo damasi bira-koe rɔ. Woletɔ Alla ya sarama-kan min kiri anubɛ anu benbanu ye nun, Yerusalɛm kɛnu ya tɔn wo dama bira.

³³ Wo le ya a ma, Mansa Yosaya ya kisimiriya-bɛsɛ wonu tinya Isirɛla nyamanɛ wo mumɛ bɛɛ rɔ. Ale ye a niyi la wati min, a ya a ma, mɔgɛnu ya anu benbanuta Mari Alla bato.