2 Ko-Kɔrɔta-Karan 33 - ALLALA KUMƐ

Yuda Mansa Manasa Wara-Koe

¹ Manasa ya mansayɛ sɔrɔn Yuda nyamanɛ rɔ a sɔrɔn-san tan-ni-fila nyɔgɛ le ma. San bi-loli ani san loli, a ye mansayɛ la ka bɔ Yerusalɛm soe burɔ.

² Mansa Manasa ya hakɛ kɛ Mari la ka kisimiriya-koenu ma iko Mari ya mɔgɛ minnu gben Isirɛla mɔgɛnu yarɔ fɔlɔ nun.

³ A fa Mansa Hɛsakaya ya Alla-batobɛlɛnuna kɔ tinɛ minnu tinya, ale Mansa Manasa ya wonu sɔ-kurɛ-kɛ tun. A ya saraka-bɔ-tinɛnu nadan anu si Beyali kɔ kan min. A ya kɔlɔma lɛsɛ bɛsi-musi Asurala muninyɛ la. Min sanɛ wo kuma, a ya lolenu fanan bato.

⁴ Bato-Bɔn min sɔnɛ Mari nyɛrɛ-nyɛrɛ ye, a ya Alla-batobɛlɛnuna kɔ tinɛnu nadan nyɔ, ado Mari ko a kelen pe bato tinɛ le wo la.

⁵ Bato-Bɔn wo kata burɔ, a ya saraka-mintan-tinɛnu nadan nyɔ rɔ alako ka wonu ma lolenu bato-fan la.

⁶ A ya ala den-keinu ma saraka-mintantɛnu na bɛsɛnu ye Hinom lɛɛ rɔ. Bolo-tafɛlɛn-koe wo, duruya-koe wo, a yi-kɔrɔ-fɛlɛn-koe wo, a ya wo dama ma. Hali nyina-kɔlɛnu, a tara ke wonu fanan ma. A ya hakɛ min kɛ Mari la, wo da-rakoloyara. Wo le ya a ma, Mari fonde bɔra a kuma.

⁷ A ya bɛsɛ do sigi Mari Bato-Bɔn la, ado Mari ara a fɔ Mansa Dawuda anubɛ ala den Mansa Silamɛni ye nun ko, “N bara Yerusalɛm soe kan-tina-kelan kɛ le yabɔ Isirɛla bɔnsɔn tan-ni-filɛ tɛma anu si to n batola kan min.

⁸ Ni Isirɛla mɔgɛnu ya nna tɔn bɛɛsi bira, n bara min di nna wɔli-kɛla Nɛbi Musa ma, n ti sɔn mɔgɔ ni anu gben nyamanɛ kɛ rɔ, n bara min di anu benbanu ma nun.”

⁹ Mansa Manasa ya a ma, Yuda anubɛ Yerusalɛm kɛnu ya hakɛ kɛ dɔgɔma-ma-de, hali ka tenbi mɔgɛ wonu na Mari ya minnu gben anu yarɔ nun.

Mansa Manasa Tubi-Koe

¹⁰ Mari ara mansɛ anubɛ ala mɔgɛnu makawandi nun kɔnɔ hali wo, anu ma anu tole masɔ a la.

¹¹ Woletɔ Mari ya a ma, Asiriya kɛlɛ-dannu nara bui Yuda nyamanita-mɔgɛnu ma. Anu ya Mansa Manasa bira ka lunyɛ bila a sunyɛ rɔ. Anu ya sila-yɔlɔkɛ kɛ a ma ka ta a la Babilɔn nyamanɛ rɔ.

¹² Ka a tɛgɛ ala tɔrɔyɛ wo ma, a ya a famayigi ka di ata Mari Alla dala alako wo ni a kunyɛ bɔ gbaran wo rɔ.

¹³ Alla ya ala matarali-kan wo lamɔɛn. A ya a ma, a sɛgira a warɛ Yerusalɛm ka ma mansɛ la tun. Wo ya a yira Mansa Manasa la ko Mari le Alla la.

¹⁴ Wo kɔma, Mansa Manasa ya tarɛ-kɔmatɛ lakoloya tele-bɔɛ wara la. A ya wɔlɛ wo dabira lɛɛ rɔ Kiyɔn tenke wara la ka ta kantɔ-wara la ha ka ta ke don-dɛ ma min tɔgɛ le ko, “Yɛgɛ.” Yerusalɛm soe tonke min tɔgɛ le ko, “Ofɛli,” a ya nyɔ-tarɛ ladan fanan. Tarɛ mininɛ soe minnu ma Yuda nyamanɛ rɔ, a ya kɛlɛ-den-kunyɛ donu nata soe wonu tɔ.

¹⁵ A ya bɛsɛnu nabɔ Mari Bato-Bɔn la. A ya bɛsi-kɔ-tinɛ minnu sɔ kɔnkɛ kuma, Mari Bato-Bɔn ye kan min, a ya wo bɔ nyɔ anubɛ minnu bi Yerusalɛm soe burɔ kan-tina-gbɛrɛkɛnu tɔ. A ya kɛ bɛɛ bi ka anu nakɛ a rɔ soe kɔma.

¹⁶ A ya saraka-mintan-tinɛ sɔ a kurɛ la Bato-Bɔn la tun mɔgɛnu si sarakɛnu bɔ kan min. A ban, a ya yisi-kima-sarakɛnu anubɛ baraka-bira-sarakɛnu bɔ nyɔ kuma. A ya a fɔ Yuda kɛ bɛɛ ye ko bɛɛ ni Isirɛlata Mari Alla bato.

¹⁷ Hali mɔgɛnu bi sarakɛnu bɔla kan-tina-siyaman tɔ kɔnɔ hali wo, anu bi sarakɛnu bɔla Mari kelen pe le ye.

Mansa Manasa Mansayɛla Ban-Koe

¹⁸ Mansa Manasa ya koe min bɛɛsi ma ala mansayɛ kɔrɔ katarala a ya Alla matara min kɛ, anubɛ nɛbi ya Marita kuman-kan min fɔ a ye, anu ya wonu sɛbɛ Isirɛla (anubɛ Yuda) mansɛnuna buku do rɔ.

¹⁹ Ale mansɛta mataralɛ wo, Allata yabilɛ wo, ale mansɛ ara hakɛ min kɛ nun yanni a ni tubi wo, a ya ko-yogomɛ min kɛ wo, a ya bɛsi-kɔ-tinɛ minnu nadan wo, anubɛ a ya bɛsi-musi Asurala muninyɛ lɛsɛ wo, anu ya wo bɛɛ sɛbɛ nɛbiya-buku do rɔ.

²⁰ Mansa Manasa fagara. Anu ya a togon mansɛla bolɔn dafɛ. Ala den Amɔn sigira a gbɛ rɔ.

Yuda Mansa Amɔn Wara-Koe

²¹ Amɔn ya mansayɛ sɔrɔn Yuda nyamanɛ rɔ a sɔrɔn-san mogan-ni-fila nyɔgɛ le ma. San fila, a ye mansayɛ la ka bɔ Yerusalɛm soe burɔ.

²² Ale Mansa Amɔn fanan ya hakɛ kɛ Mari la iko a fa Manasa ya a ma nya min nun. A ya a fala bɛsɛ wonu kɔ.

²³ Kɔnɔ a ma a famayigi Mari ye iko a fa ya a ma nya min, ado a ya hakɛ kɛ ka tenbi a fa la.

²⁴ Ale Amɔnna mɔgɔ-banu ya yanfɛ rabɛn a ma ka a faga ala bolɔn la.

²⁵ Mɔgɔ-ba minnu ya Amɔn faga wo la, Yuda mɔgɛnu ya wonu fanan faga. Anu ya ala den Yosaya sigi a gbɛ rɔ.