2 Ko-Kɔrɔta-Karan 32 - ALLALA KUMƐ

Yuda Kɛnu Niyi-Ragbɛrɛn-Koe Asiriyanu Bolo

¹ Mansa Hɛsakaya ban ko-telennɛ kɛnu mala Mari ye, Asiriya Mansa Sɛnakaribu tara bui Yuda nyamanɛ ma. Tarɛ mininɛ soe minnu ma, ala kɛlɛ-dannu ya kurɔn don wonu ma. A hɛnkili latɛgɛnɛ ko a si wonu nɔ le.

² Mansa Hɛsakaya ya a yen min kɛ ko Mansa Sɛnakaribu ye nala buila Yerusalɛm soe ma,

^3-4 anubɛ ala mɔgɔ-banu ya tenke balan soe kɔma alako Asiriyanu ba gbɛrɛn Yerusalɛm ma tumɛ min, anu kana yi sɔrɔn. Ala mɔgɔ-banu ya mɔgɔ-siyaman bi ka ta tenke wo balan tinɛ. Wonu ya yi wo balan. Hali ka a ma tode, a ma ma.

⁵ Tarɛ kan tinɛ min kerinɛ nun, a ya wonubɛ nyamani-kumafɛlɛn-bɛndɛ-layan-bɛ donu nadan. Wo kɔma, a ya tarɛ do mini tarɛ wo ma tun alako nyɔ ni taran fanka rɔ. Tarɛ min bi lɛnbɛn-lɛnbɛnya rakɛ tinɛ dafɛ tele-bɔɛ wara la Yerusalɛm so-kɔrɛ la, a ya nyɔ fanan nadan fanka rɔ. Wo kɔma, a ya tanbɛ anubɛ nɛgɛ-walan-siyaman nadan.

⁶ Mansɛ ya so-burɔ-keminɛ damasi don kɛlɛ-den-kunyɛ bolo. A ya anu damasi ladɛn kan-tina-rakanɛ rɔ soe tarɛ don-dɛ la. Mansɛ ya a fɔ anu ye ko,

⁷ “Wo ni wo yisi gbɛlɛya ka wo kerinteya. Wo kana kilan Asiriya mansɛ anubɛ ala kɛlɛ-dannu na. Min bi ma fɛ, wo sɛnbɛ kolo anutɛ ko.

⁸ Hadama-den-fanka-gbansan le a bolo dɔrɔn kɔnɔ maleta Mari Alla ye ma dɛnbɛna kɛlɛ rɔ.” Mansɛta kumɛ, wo le ya mɔgɛnu nakerinteya.

⁹ Wati tenbinɛ, wo tumɛ Mansa Sɛnakaribu anubɛ ala kɛlɛ-dannu bi Lesi soe kurunna, a ya kilayɛ lata Mansa Hɛsakaya anubɛ Yuda nyamanita-mɔgɛnu ma minnu bi Yerusalɛm soe burɔ.

¹⁰ Kilayɛ wo ko, “Asiriya Mansa Sɛnakaribu ko nfenna a ye wo kɛlɛ-wɛ kɛla, wo yisi gbɛlɛyanɛ siginɛ Yerusalɛm soe burɔ?

¹¹ Wola mansɛ ye a fɔla wo ye ko wota Mari ye wo kisila a bolo kɔnɔ a ye wo mayuwaya tinɛ le. A ko a si a ma, wo ni faga kan-nagbalɛ anubɛ kɔnkɛ bolo.

¹² A ko ale Mansa Hɛsakaya le ya Mari bato tinɛ wonu tinya. Wo kɔma, a ya a fɔ Yuda anubɛ Yerusalɛm kɛnu ye ko wo ni to ale Mari batola ka isɛnti mintan kan-tina-kelan wo rɔ, Yerusalɛm, kɔni.

¹³ Mansa Sɛnakaribu ko anubɛ a benbanu ya min ma nyamani-gbɛrɛkɛ-mɔgɛnu na, wo ma wo lamɔɛn, ba? A ko anuta bɛsi fenfen ma anu kisi ale Asiriya mansɛ ma.

¹⁴ Bɛsɛ kɛ fenfen ma ke ala nyamanɛ kunkala a ma min kɛ, nfenna wo mirinɛ ko wola bɛsɛ si ke wo kunkala a bolo?

¹⁵ A ko Mansa Hɛsakaya kana wo mayuwaya bawo a ti ke wo kunkala a bolo. Wo ni la a la ko nyamana fenfenta bɛsɛ ma ke anu kisila Asiriya mansa-wo-mansa bolo wɛ. Wo ni la a la ko wotɛ ti ke wo kunkala kɛ rɔ.”

¹⁶ Wo kɔma, Asiriyanuna mɔgɔ-banu tora kuma-yogomɛnu fɔla Mari Alla anubɛ Mansa Hɛsakaya ma, ado wonu yogo a fɔlɔtɛ kɛnu ko.

¹⁷ Ale Asiriya mansɛ ya Isirɛlata Mari Alla lafɛya-kumɛ sɛbɛ kɛdi do rɔ. Kɛdi wo ko, “Nyamani-gbɛrɛkɛ-bɛsɛnu ma ke anu kunkala n ma, ado wola mansɛta bɛsɛ fanan ti ke ala mɔgɛnu kisila n ma.”

¹⁸ Asiriyanuna mɔgɔ-banu ya kɛ le fɔ Hiburu-kan rɔ a kulu-mayɛlɛnɛ la alako anu si Yerusalɛm kɛnu rakilan nya min ka anu yisi tinya. Yerusalɛm kɛnu sɔnɛ so-tarɛ kuma. A ya a lɔn ni anu yisi tinyanta, anu bira-koe ma gbo wo rɔ.

¹⁹ Anu kumara sibolo-gbɛrɛ-bɛsɛnu ma nya min, anu kumara Yerusalɛmta Alla ma wo nya na le fanan, ado anu denu ya anuta bɛsɛnu nadan anu bole la.

²⁰ Wo kɔma, Mansa Hɛsakaya anubɛ Emɔsila den Nɛbi Aiseya ya anu kan nabɔ Alla ma alako a ni anu dɛnbɛ.

²¹ Mari le ya melika do sɔ min ya Asiriya kɛlɛ-den-kunyɛnu anubɛ kɛlɛ-dannu faga. Wo le ya a ma, Asiriya mansɛ wo yarabinɛ sɛgira ala nyamanɛ rɔ. Min tenbira wo la, lunyɛ do, Mansa Sɛnakaribu ye ala bɛsi-kɔ-tinɛ tumɛ min, ala den-kei donu ya a faga faan la.

²² Mari ya Mansa Hɛsakaya anubɛ Yerusalɛm kɛnu kisi Asiriya Mansa Sɛnakaribu masibɛ ma wo nya na le. A ya anu kisi anu yogo-gbɛrɛ donu fanan ma. Mari ya a ma, anu sigira yisi-kimɛ rɔ anu dafɛ mɔgɛnu bolo.

²³ Mɔgɔ-siyaman nara kɔ-fannu na Mari ye anubɛ fen-kolomɛnu na Mansa Hɛsakaya ye Yerusalɛm soe burɔ. Ka a dabira wati wo ma, sibolo-gbɛrɛnu tora Mansa Hɛsakaya gbiliyala kosɛbɛ!

Mansa Hɛsakaya Kiraya-Koe anubɛ A Wasi-Koe

²⁴ A ma mɛ wo kɔma, Mansa Hɛsakaya kirayara. A tora doni, a ni faga. A ya Mari matara, woletɔ Mari ya tamasere di a ma ka a yira a la ko a si kɛndɛya.

²⁵ Kɔnɔ Mansa Hɛsakaya wasira ka fisiriwɔlitayɛ telen Mari la, ado Yuda anubɛ Yerusalɛm kɛnu tɔrɔta wola ko la.

²⁶ Kɔnɔ tɔ-a-la, Mansa Hɛsakaya anubɛ ala mɔgɛ minnu bi Yerusalɛm, wonu ya anu famayigi. Woletɔ Mari ma anu tɔrɔ wo tumɛ ale mansɛ ye a kɛndɛ la.

Mansa Hɛsakayala Nɔnfulu-Tigiyɛ anubɛ Ata Gbiliya-Koe

²⁷ Mansa Hɛsakaya ya nɔnfulu-siyaman sɔrɔn, ado mɔgɛ bɛɛ ya a gbiliya. Ala sɛnɛ wo, ala wodi-gbɛ wo, ala kuru-da-gbɛlɛnu wo, ala kɛnɛnu wo, ala nɛgɛ-walannu wo, hali ala fen-koloma-toenu, a ya wonu damasi lamara-bɔnnu sɔ.

²⁸ Wo kɔma, ala fui-fannu wo, ala nɔnbɔ-gbɔ-yi wo, anubɛ ala ɔlifi-tuli wo, a ya wonu namara-bɔnnu sɔ fanan. A ya ala kolo-fen namara tinɛnu sɔ.

²⁹ Min sanɛ wo bɛɛ kuma, Alla ya kolo-fen-siyaman anubɛ nɔnfulu-siyaman di a ma ha a ya so-siyaman sɔ a nyɛrɛ ye.

³⁰ Ale Mansa Hɛsakaya ya Kiyɔn tenke gberen ka kilɛ di yi wo ma ha a tugura Yerusalɛm so-tarɛ burɔ. Mansɛ ya a bole bila fen min bɛɛ rɔ, wo sabatira.

³¹ Hali Babilɔn mɔgɔ-banu nara tumɛ min ka a manyinika tamasere wo ma min bara kɛ ala nyamanɛ rɔ, Alla ya a bɔ a fɛ alako a ni a lɔn a yisi ye nya min.

Mansa Hɛsakaya Mansayɛla Ban-Koe

³² Mansa Hɛsakaya ya min bɛɛ ma ala wati rɔ, anubɛ a ya a latelen Alla ye nya min, wo bɛɛ sɛbɛnɛ Emɔsila den Nɛbi Aiseyala buku rɔ. Wo sɛbɛnɛ fanan Isirɛla anubɛ Yuda mansɛnuna buku do rɔ.

³³ Mansa Hɛsakaya fagara tumɛ min, anu ya a togon mansɛnuna kaburu-soe kan tɔ. Yuda anubɛ Yerusalɛm kɛnu nara a saya-koe rɔ. Ala den Manasa sigira a gbɛ rɔ.