2 Ko-Kɔrɔta-Karan 31 - ALLALA KUMƐ

Mari Bato-Koe Dabira-Koe Mansa Hɛsakaya Bolo Tun

¹ Ladɛn wo kanɛ a la, Isirɛla mɔgɛ bɛɛ tara Yuda nyamanɛ soenu tɔ ka bɛsi-kɔ-tinɛnu tinya. Kɔlɔma minnu lɛsɛnɛ bɛsi-musila muninyɛ la, anu ya wonu tatɛgɛtɛgɛ. Bɛsi wo tɔgɛ le ko, “Asura.” Kuri-lɛsɛnɛnu fanan, anu ya wonu tatiitii. Anu tara wo le sufa ma Bɛnyamɛ anubɛ Ifɛrɛm anubɛ Manasa bɔnsɔn-mɔgɛnu barɛnu tɔ. Anu ban bɛsɛ wonu tinyana, bɛɛ sɛgira a warɛ.

² Mansa Hɛsakaya ya saraka-masɔlɛnu anubɛ Lifayinu fara iko anuna wɔlɛnu bi nya min nun. Donu bi saraka-mintan-ko-wɔlɛ la. Donu bi yisi-kima-saraka-ko-wɔlɛ la. Donu bi nyɔ ka anu sɔ ladɛn wo yakɔrɔ. Donu bi matɔgɔlɛ kun na Bato-Bɔn wo tɔnkɔn donu tɔ.

³ Anu bi sarakɛ minnu mintanna sɔgɔma ani wurɛ la, Mansa Hɛsakaya ya wonu nabɔ a nyɛrɛta kolo-fen-wɔrɛnu tɔ. Anu ya sarakɛ minnu bɔ Sulen-Tele anubɛ karɛ-kurɛ ma, anubɛ sarakɛ doinu, Marita tɔn ya minnuna koe fɔ, ale mansɛ le ya wonu damasi labɔ.

⁴ Ale Mansa Hɛsakaya ya a fɔ Yerusalɛm kɛnu ye ko anu ni na anuna kɔ-fannu na a bɛnta, saraka-masɔlɛnu anubɛ Lifayinu ni min sɔrɔn. Anu si fɛrɛ di anu ma alako anu sɔndɔmɛ ni sa Marita wɔlɛ kuma wati bɛɛ.

⁵ Anu ya kumɛ wo lamɔɛn mansɛ bolo tumɛ min, anu ya saraka-masɔlɛ wonu fanda fui-fan la anubɛ nɔnbɔ-gbɔ-yi anubɛ ɔlifi-tuli anubɛ liyi anubɛ sɛnita-fan donu. Wo kɔma, fan min bɛɛsi ye anu bolo, anu ya wonu damasi yaka bɔ.

^6-7 Yuda mɔgɛnu anubɛ Isirɛla mɔgɛ minnu siginɛ Yuda nyamanɛ rɔ, anu nara anuna ninki anubɛ anuna saga-yakanu na. Anu nara fen-siyaman na ka wonu nadɛn anu nyɔgɔn kuma. Fan-kɛnu-nadɛn dabirara san wo karɛ sawa nyɔgɛ le ma. Fan-kɛnu-nadɛn banta a karɛ wɔrɔnfila nyɔgɛ ma. Anu ya wonu dantɛgɛ anuta Mari Alla ma.

⁸ Mansa Hɛsakaya anubɛ ala mɔgɔ-banu ya a yen min kɛ ko nyamanita-mɔgɛnu bara na kɛ nyɔgɔn sufa la, anu ya Mari tanto ka Marita mɔgɛnu matɔgɔ fanan.

⁹ Mansɛ tara kuma saraka-masɔlɛnu anubɛ Lifayinu na ka a tɛgɛ kɔ-fan kɛnuna ko ma.

¹⁰ Sedoki bɔnsɔn do le Saraka-Masɔla-Kun-Tigi-Wɛ Asaraya la. Wo ya a fɔ mansɛ ye ko, “Mɔgɛnu bara na kɔ-fan minnu na Bato-Bɔn kɛ la, ma si a dɔn-siyaman kɛ, ado a toe si to. Kɛ damasi nara bawo Mari ara ata duwɛ layigi ala mɔgɛnu kuma.”

¹¹ Anu ya dɔn-fen namara tinɛnu nadan Bato-Bɔn burɔ iko mansɛ ya a fɔ anu ye nya min.

¹² Anu ya kɔ-fan anubɛ yaka minnu di Mari ma, anu ya wonu namara nyɔ. Lifayi mɔgɛ do ye nyɔ min tɔgɛ Konanaya. Anu ya wo sigi fen namara tinɛ wo kun na. A na-kelen-nyɔgɛ min tɔgɛ Simayi, wo tugunta a la. Lifayi mɔgɔ tan bi nyɔ fanan minnu bi wɔlila mɔgɔ filɛ kɛnu kɔrɔ.

¹³ Mɔgɔ tan wonu tɔgɛ le kɛnu na, Yɛhiyɛli wo, Asasaya wo, Nehati wo, Asahɛli wo, Yɛrimɔti wo, Yosabadi wo, Iliyɛli wo, Isimakiya wo, Mehati wo, anubɛ Bɛnaya. Anu ya wo dama ma iko Mansa Hɛsakaya anubɛ Saraka-Masɔla-Kun-Tigi-Wɛ Asaraya ya a fɔ anu ye nya min.

¹⁴ Anu bi kɔ-fen minnu dila Mari ma, Iminala dan min tɔgɛ Kɔri, wo mara wonu namaralɛ anubɛ a bɔlɛ la. A fa Imina le Bato-Bɔn da-makandannɛnu kun na don-dɛ la min tɔgɛ le ko “Tele-Bɔɛ Don-Dɛ.” Lifayi le anu na.

¹⁵ Saraka-masɔlɛnu siginɛ soe minnu tɔ, Lifayi mɔgɔ wɔrɔ ye nyɔ minnu bi Kɔri kɛ dɛnbɛna soe wonu tɔ. Mɔgɔ wɔrɛ wonu tɔgɛ le kɛnu na, Idɛn wo, Menayamin wo, Yɛsuwa wo, Sɛmaya wo, Amaraya wo, anubɛ Sɛkanaya. Wonu ya dɔn-fannu tatala anu ta-nyɔgɛ Lifayinu na iko anuna wɔli faranɛ nya min, a kina wo, a dennɛ wo.

¹⁶ Min sanɛ wo kuma, ni kei minnu sɔrɔn ara ke san bi-sawɛ rɔ hali ka tenbi wo la, hali a tɔgɛ ma taran Lifayi kebila-buku rɔ, wonu si anuta niyi sɔrɔn kɔ-fan kɛnu tɔ bawo anu si ta anuta wɔlɛ kɛ Mari Bato-Bɔn la.

¹⁷ Saraka-masɔlɛnu bi anuna saraka-masɔ-wɔlɛ kɛla iko anuna kebilɛnu bi nya min. Ni Lifayi bɔnsɔn-mɔgɛ min sɔrɔn ara ke san mogan rɔ ani ka tenbi wo la, anu si wonuta wɔlɛ di anu ma.

¹⁸ Anuna musinu wo, anuna dannu wo, wonu damasi tɔgɛ sɛbɛnɛ kan-tina-kelen bawo a keimɛnu bi anu nyɛrɛ lamarala sɛninyɛ rɔ.

¹⁹ Mɔgɔ-telennɛ donu bi nyɔ minnu bi dɔn-fannu tatalala denbaya-tiginu na anubɛ minnu tɔgɛ ye Lifayi kebila-buku rɔ. Mɔgɛ kɛnu siginɛ soenu tɔ minnu bi Aruna mamanɛnu bolo. Donu bi togodɛnu na soe wonuna foolɛ rɔ.

²⁰ Ko-telennɛ anubɛ koe minnu si Mari Alla hɛnɛ, Mansa Hɛsakaya ya wonu kɛ Yuda nyamanɛ kan tinɛ bɛɛ rɔ.

²¹ A wara-koe tara yarɔ bawo a ya min bɛɛsi ma Bato-Bɔn mabɛn-koe rɔ anubɛ ka tɔn bira a kilɛ fɛ, a ya wo bɛɛsi ma a yisi bɛɛ la Alla ye.