2 Ko-Kɔrɔta-Karan 3 - ALLALA KUMƐ

¹ Mansa Silamɛni fa Mansa Dawuda ara Bato-Bɔn sɔ tinɛ rabɛn nun. Nyɔ ye gbere-koloyɛ le la Yɛbusi do bolo min tɔgɛ Arɔna. Kan tinɛ kɛ ye Muraya kɔnkɛ le kuma Yerusalɛm soe burɔ, ado Mari ya a nyɛrɛ yira Mansa Dawuda la nyɔ le. Mansa Silamɛni ya Bato-Bon-sɔɛ dabira

² ata mansayɛ san nanɛ, karɛ filɛ, a tele fila nyɔgɛ le ma.

³ Mansa Silamɛni ya Bato-Bɔn wo min kurun Mari ye, a kɔnɛ nunkan-nya mogan, a lɔngbɔn nunkan-nya bi-wɔrɔ.

⁴ Dandan-kɔrɛ wo kɔnɛ fanan ya nunkan-nya mogan bɔ. A dandan-kɔrɛ wo kɔnɛ anubɛ bɔn-kɔnɛ rakɛn de! Bɔn wo sɔɛ nunkan-nya mogan. A burɛ fɔlɔn a ban, a bɛɛ sɛnɛ.

⁵ A ya bon-burɛ yarɔtɛ yamatogon fɛrɛn-hakikɛ donu na min tɔgɛ saiparasi. A ya sɛnɛ-hakikɛ sa wonu dama ma. A ya tin-kuri anubɛ yɔlɔkɛnuna muninyɛnu nadan sɛnɛ wonu ma.

⁶ Ale mansɛ ya Bato-Bon-burɛ wo lakinya kuru-da-gbɛlɛnu anubɛ sɛnɛnu na minnu bɔra Parafeyim nyamanɛ rɔ.

⁷ A ya sɛnɛ nɔrɔn a bon-burɔ-dandan anubɛ a kundulasɛnu wo, a kankannu wo, anubɛ a tigin-dɛnu ma. A dandan wo ma, a ya melikanuna muninyɛnu nadan.

⁸ Bon-burɛ-kɔmatɛ min tɔgɛ Sɛnima-Sɛnima-Tinɛ, wo kɔnɛ anubɛ Bon-burɛ-yarɔtɛ rakɛn. A kɔnɛ nunkan-nya mogan, a lɔngbɔn nunkan-nya mogan. A ya sɛnɛ min mumɛ bɛɛsi lawɔli ka Sɛnima-Sɛnima-Tinɛ wo dandan-burɛ yamatogon, wola gbiliyɛ anubɛ fui-fan bɔrɔ kɛmɛ sawɛ rakɛn de!

⁹ Sɛnɛ min mara lɔntumɛnu na, wo kelen-kelan gbiliyɛ anubɛ fui-fan pani-talɛ rakɛn de! Konko minnu bi san-bɔn la a kuma, a ya wonu dandan yamatogon sɛnɛ la.

¹⁰ A ya melika-muninya fila ladan ka sɛnɛ sa wo dama ma ka anu nadon Sɛnima-Sɛnima-Tinɛ burɔ.

^11-13 Wonu tugunnɛ anu nyɔgɔn na, anu yɛ lamununnɛ bɔn don-dɛ la. Kanban fila-fila le ye anu dama ma. Anu kanban kelen-kelan si nunkan-nya loli-loli bɔ le. Anu kanbannu tafulennɛ. Doi kanban wo, doi fanan kanban wo, wonu kun bɛnnɛ bon-kole tɛmɛ ma. Doi kanban kelan kera dandan ma. Doi fanan kanban kelan kera dandan doi ma. Ka a bi kanban doi dan ma ka a sigi doi kanban dan la, nunkan-nya mogan.

¹⁴ Anu ya yesekara-yalafinyɛ anubɛ yesekara-wulan anubɛ yesekara-bilolamɛ anubɛ linɛn-yesekari wonu bi ka wonu nadan kura-hakikɛ do la Sɛnima-Sɛnima-Tinɛla ko la. Anu ya melikanuna muninyɛ sɔgɔ kura-hakikɛ wo ma.

Bato-Bon-Sɛnbɛrɛn-Kɔn Filɛ Wara-Koe

¹⁵ Ale mansɛ ya sɛnbɛrɛn-kɔn filɛ minnu nadan, wonu yanyɛ ya nunkan-nya bi-sawa ani nunkan-nya loli bɔ. A ya sɛnbɛrɛn-kɔn filɛ kɛnu kun-tɛma-sorenu nadan, wonu yanyɛ nunkan-nya loli-loli.

¹⁶ A ya yɔlɔkɛ ladan ka anu dun sɛnbɛrɛn-kɔn wonu kumɛ la. A ya pamakarani gbɔɛla muninyɛ kɛmɛ ladan ka wo dun yɔlɔkɛ wonu na.

¹⁷ A ya sɛnbɛrɛn-kɔn filɛ wonu sɔ Bato-Bɔn dandan-kɔrɛ tɔnkɔn filɛ bɛɛ rɔ. Sɛnbɛrɛn-kɔn min bi dugula-waralɛ rɔ, anu ya wo tɔgɔ sa “Allata Fanka.” Doi min bi kantɔ-waralɛ rɔ, anu ya wo tɔgɔ sa “Allata Sɛnbɛ.”