2 Ko-Kɔrɔta-Karan 29 - ALLALA KUMƐ

Yuda Mansa Hɛsakaya Wara-Koe

¹ Hɛsakaya mara mansɛ la a sɔrɔn-san mogan-ni-loli nyɔgɛ le ma. San mogan-ni-kɔnɔntɔ fanan, a ye mansayɛ la ka bɔ Yerusalɛm soe burɔ. A na le Sakarayala den Abaya la.

² Mansa Hɛsakaya ya koe min bɛɛsi ma ala mansayɛ kɔrɔ, wonu ya Mari hɛnɛ iko a benba Mansa Dawuda wara-koe ya Mari hɛnɛ nya min.

Mari Bato-Bɔn Sɛninya-Koe Tun

³ Hɛsakaya sigira mansayɛ la san min na, wo karɛ fɔlɛ, a ya Bato-Bɔn don-dɛ laka karɛ wo le la ka kankan wonu mabɛn tun.

⁴ A ya saraka-masɔlɛ donubɛ anu na-kelen-nyɔgɛ Lifayinu kundɛn kata burɔ Bato-Bɔn tele-bɔɛ wara la.

⁵ A kumara anu ye nyɔ rɔ, a ko, “Wole Lifayinu, wo ni wo nyɛrɛ sɛninya, wo kɔma, wo ni wo benbanuta Mari Allata Bato-Bɔn fanan sɛninya. Fan minnu si Bato-Bɔn latinya, wo ni wonu nabɔ luyi ma.

⁶ Ma benbanu ma anu telen mata Mari Alla ye. Anu ya minnu ma, wonu ma ale Mari hɛnɛ. Anu ya Mari boloka ka anu kan-kɔ sɔ ata Bato-Bɔn la.

⁷ Anu ya Bato-Bɔn wo don-dɛ balan ka anu tui lɛnpu-ladufen-koe ma. Hali ka isɛnti anubɛ sarakɛnu mintan, anu ma sɔn wonu mala Isirɛlata Allata Bato-Bɔn la.

⁸ Ka a tɛgɛ wo ma, Mari fonde bɔra Yuda kɛnu anubɛ Yerusalɛm kɛnu kuma. Mari ya min sigi anu ma, wo ara anu dama kumakɔ. Anu mara yɛlɛnma-fan la mɔgɛnu yala, ado wo ya wo lɔn bɛrɛkɛ!

⁹ Ka a tɛgɛ ma benbanu ya min ma, ma fanu kunyɛ tora kɛlɛ rɔ. Kɛlɛ tara mala dannu anubɛ mala musinu na.

¹⁰ “N bara ban a latɛgɛla ko mabɛ Isirɛlata Mari Alla ni sarama-kan kiri ma nyɔgɔn tɛma alako a fondo-bɔnɛ kana to ma kuma tolon!

¹¹ Nna dannu, Mari ara wole minnu yabɔ ka ma isɛnti-mintannɛnu na anubɛ ka sɔ mɔgɛnu yarɔ bato tinɛ, wo ni wo latiriya wo sɛbɛ donna.”

^12-14 Lifayi bɔnsɔn kunyɛ minnu bi nyɔ nun, wonu tɔgɛ le kɛnu na. Minnu bɔra Kohati bɔnsɔn rɔ, Amasayila den Mehati anubɛ Asarayala den Yowɛli. Minnu bɔra Mɛrari bɔnsɔn rɔ, Abidila den Kisa anubɛ Yɛhalɛlɛlila den Asaraya. Minnu bɔra Kerisɔn bɔnsɔn rɔ, Simila den Yowa anubɛ Yowala den Idɛn. Minnu bɔra Ɛlisafan bɔnsɔn rɔ, Simiri anubɛ Yɛyiyɛli. Minnu bɔra Asafi bɔnsɔn rɔ, Sakaraya anubɛ Matanaya. Minnu bɔra Himan bɔnsɔn rɔ, Yɛhuwɛli anubɛ Simayi. Minnu bɔra Yɛdutun bɔnsɔn rɔ, Sɛmaya anubɛ Yusiyɛli.

¹⁵ Bɔnsɔn-kunyɛ kɛnu ya anu ta-nyɔgɛ Lifayi mɔgɛ bɛɛ kele kan-tina-kelen. Anu dama ya anu sɛninya Mari ye iko tɔn ya a fɔ nya min. Wo kɔma, anu donta Bato-Bɔn sɛninyɛ rɔ iko Marita tɔn ya a fɔ anu ye nya min bawo mansɛ ara wo fɔ anu ye nun.

¹⁶ Saraka-masɔlɛ wonu donta Bato-Bɔn sɛninya-koe rɔ. Fan minnu bi Bato-Bɔn wo latinyana, anu ya wonu nabɔ kata kɔma. Lifayi doinu ya anu bi nyɔ ka ta anu na fɔɔ Kidirɔn lɛɛ rɔ Yerusalɛm soe kɔma.

¹⁷ Anu ya wɔlɛ wo dabira san wo karɛ fɔlɛ, a tele fɔlɛ ma. Anu banta Bato-Bɔn anubɛ a dandan-kɔrɛ mabɛnna a tele segin nyɔgɛ ma. Wo kɔma, anu ya a nyɔgɔn tele segin wɔlɛ kɛ tun ka a dafa tele tan-ni-wɔrɛ ma alako nyɔ ra ni bɛn Mari bato-koe la.

Bato-Bɔn Dantɛgɛ-Koe Tun

¹⁸ Lifayinu ya anu dantɛgɛ Mansa Hɛsakaya ye, anu ko, “Ma ara ban Bato-Bɔn sɛninyala iko tɔn ya a fɔ nya min. Saraka mintan tinɛ wo, biredi-sa-tebulu wo, anubɛ anu fɛ-miran bɛɛsi, ma ara wo bɛɛ sɛninya.

¹⁹ Mansa Ehasi sa Allata kilɛ fɛ tumɛ min, a tara Bato-Bon-miran minnu na a bolo, ma ara na wo damasi la tun. Ma ara wo damasi dantɛgɛ Mari ma tun. Wonu damasi ye saraka-mintan-tinɛ yarɔ.”

²⁰ Latiriya-bole wo ma, Mansa Hɛsakaya ya Yerusalɛm mɔgɔ-ba bɛɛ kundɛn kan-tina-kelen. Anu dama tara anu nyɔgɔn fɛ Bato-Bɔn la.

²¹ Anu tara tura-bulun wɔrɔnfila la anu bolo anubɛ saga-yigi wɔrɔnfila anubɛ saga-den wɔrɔnfila anubɛ baa-kɔrɔn wɔrɔnfila Bato-Bɔnla ko la. Anu ya kɛnu ma anu hakɛ-sarakɛ la mansɛ anubɛ ala denbayɛnu anubɛ Yuda nyamanita-mɔgɛ bɛɛsila ko la. Aruna kegeyɛ minnu bi saraka-masɔ-wɔlɛ kɛla, ale mansɛ ya a fɔ wonu ye ko anu ni kolo-fan wonu bɔ.

²² Saraka-masɔlɛ wonu ya turɛ wonu fɔlɔn faga, wo kɔma, saga-yiginu, wo fanan kɔma tun, saga-dannu. Anu ya wo damasi yele purupuru saraka-mintan-tinɛ wo ma.

²³ A laban, anu ya baa-kɔrɔn wonu bi ka ta anu na batoli-kɛlɛ doinu anubɛ mansɛ wara alako wonu ni anu bole sa anu ma.

²⁴ Anu ban anu bole sala anu ma, saraka-masɔlɛ wonu ya baa wonu faga. Anu ya wonu yele labɔn saraka-mintan-tinɛ kuma anu hakɛ-sarakayɛ la alako Alla fonde ni kimɛ mansɛ anubɛ ala nyamanita-mɔgɛnuna hakɛnuna ko la nya min.

²⁵ Marita Nɛbi Kadi anubɛ Nɛbi Netan, wonu ya Mansa Dawuda makawandi nun ko Lifayi bɔnsɔn ni to karanyanu gbesila anubɛ seremanu anubɛ sɔrɔnnu fɔla Bato-Bɔn la. Ale Mansa Hɛsakaya ya kumɛ wonu to a gbɛ rɔ ata wati rɔ.

²⁶ Fɔli-fannu min fɔra Mansa Dawudata wati rɔ, anu ya wonu sufa fanan fɔ aleta wati rɔ. Saraka-masɔlɛnu fanan sɔnɛ anuna burinu na anu bolo.

²⁷ Mansa Hɛsakaya ya sarati di anu ma tumɛ min, anu ya saraka-bɔɛ dabira. Anu bara wuli saraka-bɔɛ wo la tumɛ min, mɔgɛnu donta Mari tantoe rɔ ka bɛti bɔ. Buru-fɛlɛnu ya buri-fɛyɛ dabira. Fɔli-kɛlɛnu ya fɔli-fannu kɛ-a-rɔ.

²⁸ Mɔgɛ bɛɛ kofura anu ma batoli-kɛ-tinɛ. Anu bi bɛtinu bɔla anubɛ fɔli-fannu kɛla-a-rɔ, ha saraka wo bɛɛsi banta mintanna.

²⁹ Wo kɔma, Mansa Hɛsakaya anubɛ ala mɔgɛnu ya anu nyɛnkin Alla bato tinɛ.

³⁰ Mansa Hɛsakaya anubɛ ala mɔgɔ-banu ya a fɔ Lifayinu ye ko anu ni Mari-tanto-bɛtinu bɔ Mansa Dawuda anubɛ Nɛbi Esafi ara minnu sɛbɛ nun. Woletɔ mɔgɛ bɛɛ ya sigi sa sewɛ la.

³¹ Mansa Hɛsakaya ya a fɔ mɔgɛnu ye ko, “Wo ara ban wo nyɛrɛ dantɛgɛla Mari ma le gbɛ! Wo na yisi-kima-sarakɛnu na alako wo si baraka bira Mari ye nya min.” Mɔgɛ wonu ya wo ma. Donu sewanɛ nara saraka-mintantɛ donu na ka wonu sa saraka doi wonu kuma.

³² Anu nara tura bi-wɔrɔnfila (70) la anubɛ saga-yigi kɛmɛ (100) anubɛ saga-den kɛmɛ fila (200) la ka wonu ma saraka-mintantɛnu na Mari ye.

³³ Min sanɛ wo kuma, anu nara tura kɛmɛ wɔrɔ (600) la anubɛ saga waga sawa (3,000), mɔgɛnu si to minnu dɔnna.

³⁴ Saraka-masɔlɛnu ma siya min kɛ kolo-fen faga tinɛ, Lifayinu tora anu dɛnbɛna ha wɔlɛ wo banta. Kɔnɔ yanni Lifayi doi wonu ni kofu saraka-masɔlɛnu ma, anu ya anu nyɛrɛ sɛninya iko Nɛbi Musata tɔnnu ya a fɔ nya min saraka-masɔlɛnuna ko la. (Wo ya a taran, Lifayinu ya anu nyɛrɛ mara sɛninyɛ rɔ ka tenbi saraka-masɔlɛnu na.)

³⁵ Saraka-mintantɛnu bɔnɛ a la, mɔgɛnu bi yisi-kima-sarakɛ minnu dɔnna, saraka-masɔlɛnu ya wonu kɛɛn mintan. Mɔgɛnu bi sarakɛ anubɛ nɔnbɔ-gbɔ-yi min bɔla, saraka-masɔlɛnu si wo labɔn saraka-mintan-tinɛ kuma. Anu ya batoli dabira Mari Bato-Bɔn la tun wo nya na le.

³⁶ Mansa Hɛsakaya anubɛ ala mɔgɛnu sewara bawo Alla ara anu dɛnbɛ kɛ damasi rɔ, anu ma wati-yan bɔ.