2 Ko-Kɔrɔta-Karan 28 - ALLALA KUMƐ

Yuda Mansa Ehasi Wara-Koe

¹ Ehasi ya mansayɛ sɔrɔn a sɔrɔn-san mogan nyɔgɛ le ma. San tan-ni-wɔrɔ, a ye mansayɛ la ka bɔ Yerusalɛm soe burɔ. Ale ma a benba Mansa Dawuda sɔn-nyimɛ bi, ado a ya min ma, wo ma ata Mari Alla hɛnɛ.

² A ya Isirɛla mansɛnu sɔn bi. Bɛsɛ min tɔgɛ Beyali, a ya wola muninyɛnu nadan nɛgɛ la.

³ A ya sarakɛnu bɔ Hinom lɛɛ rɔ. A ya a halala-den-keinu mintan sarakayɛ la bɛsɛnu ye. Wo le ya a ma, Mari ya mɔgɛ minnu gben nyamanɛ wo rɔ nyɔ nun, wonu taranta milibɛlitaya-koe kɛ sufa mala nun.

⁴ Ale Mansa Ehasi taranta sarakɛnu bɔla ka isɛnti mintan Alla-batobɛlɛnuna kɔ tinɛnu tɔ kɔnkɛnu kuma anubɛ kɔlɔma-kuru-wɛnu kɔrɔ.

Siriya anubɛ Isirɛla Kɛlɛ-Koe

^5-6 Bawo ale Mansa Ehasi ara hakɛ kɛ Mari la, woletɔ ata Mari Alla ya a ma, Siriya mansɛ ya a nɔ ka ta ala nyamanita-mɔgɔ-siyaman na biralɛ rɔ Damasika soe burɔ. Wo kɔma fanan, Mari ya a ma, Rɛmalayala den Mansa Peka ya ale Mansa Ehasi nɔ. A ya kɛlɛ-kurugba mɔgɔ waga kɛmɛ ani mɔgɔ waga mogan (120,000) faga Yuda nyamanɛ rɔ tele kelen kɔrɔ. Anu benbanuta Mari Alla sɔnta wo ma bawo Yuda mɔgɛnu bara anu ban ale la.

⁷ Mansa Ehasila den Meyaseya wo, ala bɔlon fɛ-biralɛ Asiraikam wo, ala kandɛ Ɛlakena wo, Sikiri min bi Isirɛla kɛlɛ-denyɛ la, wo nara wonu faga.

⁸ Hali anu na-kelen-nyɔgɔma-gbansan le, Isirɛla kɛlɛ-dannu tara Yuda mɔgɔ waga kɛmɛ fila (200,000) la anu bolo Samariya soe burɔ, a dennɛ wo, a musu wo. Anu tara fen-siyaman na anu bolo.

Yuda Mɔgɔ-Biranɛnu Boloka-Koe Isirɛla Mɔgɛnu Bolo

⁹ Marita nɛbi Odɛdi siginɛ Samariya soe burɔ. Isirɛla kɛlɛ-dannu bi tala Yuda mɔgɔ-biranɛnu na anu bolo Samariya soe burɔ tumɛ min, nɛbi kɛ bɛnta anu na soe kɔma. Ale nɛbi ya a fɔ kɛlɛ-dan wonu ye ko, “Wo benbanuta Mari Alla diminyanɛ Yuda kɛnu ma, woletɔ a ara a ma, wole ara anu nɔ kɔnɔ wo ara karagbɛlɛyɛ min sigi anu na ka anu mɔnima-fagɛ-kɛ, a ara wo lɔn.

¹⁰ A sɔgɛ ye wo la, wo ni Yerusalɛm kɛnu anubɛ Yuda kɛnu ma wola yɔɔnnu na. Wo ma a lɔn ko wole Isirɛla kɛnu fanan bara hakɛ kɛ wota Mari Alla la, wa?

¹¹ Wo ni wo tole masɔ n na! Wo ara na wo na-kelen-nyɔgɛ denu na kɛ la. Ni wo ma anu boloka, Mari fonde si bɔ wo kuma.”

¹² Isirɛla mɔgɔ-ba nani ye nyɔ, Yɛhohananla den Asaraya wo, Mɛsilemotila den Bɛrɛkaya wo, Salumula den Yɛhisikaya wo, Hadilayila den Hamasa wo, kɛlɛ-dannu ya min nadan, wo gboyara wonu fanan ye. Wonu ko,

¹³ “Wo kana mɔgɔ-biranɛ kɛnu nadon soe burɔ yan tɔ de! Ma ara banna hakɛ kɛla Mari la. Ma ara a ma, a ara diminya furr, ha ma tɔrɔ-sɔgɛ ara a bira. A sɔgɛ ye wole la, wo ni koe do ma min si ma ma tɔrɔ-koe la, wa?”

¹⁴ Wo le ya a ma, kɛlɛ-dan wonu ya mɔgɔ-biranɛ wonubɛ anu bolo-fannu don Isirɛla mɔgɔ-banu bolo mɔgɛ bɛɛ yala.

¹⁵ Mɔgɔ-ba nanɛ kɛnu ya mɔgɔ-biranɛ kɛnuna kurɛnu tatala mɔgɔ-biranɛ kɛnu na. Wonu ya kurɛnu anubɛ sanbarɛnu di anu ma. Anu tora dɔn-fannu dila anu ma ka tuli kɛ anuna tɛlɛnu ma. Minnu ti ke tagamana, anu ya sofɛlɛ di wonu ma. Anu ya mɔgɔ-biranɛ wonu bi ka anu nasɛgi anu barɛ Yuda nyamanɛ rɔ ka ta anu boloka Yɛrikɔ, anu bi soe min kelela ko Tin-Kuriya. Isirɛla kɛnu sɛgira anu kɔma Samariya soe burɔ.

Mansa Ehasi Makesi-Koe Asiriya Mansɛ Ye

^16-17 A ma mɛ wo kɔma, Idɔm kɛnu tara bui Yuda kɛnu ma tun. Anu ya mɔgɔ-siyaman bira. Wo le ya a ma, Yuda Mansa Ehasi tara a makesi Asiriya Mansɛ Tigilati-Pilesa ye ko wo ni na a dɛnbɛn kɛlɛ rɔ.

¹⁸ Wati kelan wo le tɔ, Yuda mɔgɛ minnu siginɛ gburukulinu ma anubɛ minnu siginɛ dugula wara la, Filisitinu nara bui wonu ma. Anu buira Bɛti-Simɛsi anubɛ Aiyalɔn anubɛ Kɛdiroti soenu ma. Wo kɔma, anu tara bui Soko anubɛ Timina anubɛ Kimisɔ anubɛ so-mɛsɛ minnu bi soe wonuna foolɛnu tɔ. Anu ya soe wonu ma anutɛ la.

¹⁹ Bawo Yuda Mansa Ehasi ara ko-yogoma-siyaman ma ala mɔgɛnu na ka bila Mari la. Wo le ya a ma, Mari ya tɔrɔyɛ lana Yuda nyamanɛ kuma.

²⁰ Mansa Ehasi min tara a makesi Asiriya mansɛ ye a dɛnbɛn-koe la kɛlɛ rɔ, wo mara a kɛlɛ-nyɔgɛ la.

²¹ Sɛnɛ minnu bi Bato-Bɔn la wo, sɛnɛ minnu bi mansɛla bolɔn la wo, anubɛ sɛnɛ minnu bi mɔgɔ-banu bolo wo, ale Mansa Ehasi ya wonu damasi kundɛn tɛrr, ka wonu di Asiriyanuna mansɛ wo ma. Kɔnɔ wo ma a masan-kunyɛ wasa.

Mari Fonde Bɔ-Koe Mansa Ehasi Kuma

²² Tɔrɔyɛ fafara Mansa Ehasi kuma tumɛ min, wo ya a ma, a ya hakɛ kɛ Mari la ka a dan-natenbi.

²³ Siriyanu bara to Mansa Ehasi nɔla kɛlɛ rɔ min kɛ, wo le ya a ma, ale donta saraka-bɔɛnu tɔ wonuna bɛsɛnu ye. A ya a fɔ ko, “Siriyanuna bɛsɛnu bi anuna mansɛnu dɛnbɛna. Ni nde fanan ya sarakɛnu bɔ bɛsɛ wonu ye, anu si nde fanan dɛnbɛ.” Wo le ya a ma, kasarɛ nara anubɛ ala mɔgɛnu kuma.

²⁴ Min sanɛ wo kuma, a ya Bato-Bon-mirannu takerikeri. A ya Mari Bato-Bɔn don-dɛ balan ka saraka-mintan-tinɛnu nadan bɛsɛnu ye Yerusalɛm kan tinɛ bɛɛ rɔ.

²⁵ A ya Alla-batobɛlɛnuna kɔ tinɛnu nadan so-kunbɛ anubɛ so-mɛsɛnu tɔ Yuda nyamanɛ rɔ anu si isɛntinu mintan minnu kuma bɛsɛnu ye. Wo le ya a ma, a benbanuta Mari Alla fonde bɔra ale kuma.

²⁶ Ka a dabira Mansa Ehasila mansayɛ fɔlɔn ha a laban, a ya koe min bɛɛsi ma ala mansayɛ kɔrɔ, anu ya wonu sɛbɛ Yuda mansɛnu anubɛ Isirɛla mansɛnuna buku do rɔ.

²⁷ Ale Mansa Ehasi fagara. Anu ya a togon Yerusalɛm soe burɔ kɔnɔ mansɛnuna kaburu-soe ma de! Ala den Hɛsakaya sigira a gbɛ rɔ.