2 Ko-Kɔrɔta-Karan 27 - ALLALA KUMƐ

Yuda Mansa Yotam Wara-Koe

¹ Yotam ya mansayɛ sɔrɔn a sɔrɔn-san mogan-ni-loli nyɔgɛ le ma. San tan-ni-wɔrɔ, a ye mansayɛ la ka bɔ Yerusalɛm soe burɔ. A na le Sedokila den Yerusa la.

² Mansa Yotam ya koe min bɛɛsi ma ala mansayɛ kɔrɔ, wonu ya Mari hɛnɛ iko a fa ya a ma nya min. Fɔ a ma isɛnti mintan Bato-Bɔn la ka bila Mari la iko a fa ya a ma nya min. Kɔnɔ hali wo, mɔgɛnu tora hakɛ kɛla Mansa Yotamta wati rɔ.

³ Ale Mansa Yotam le ya Alla Bato-Bɔn kantɔ-waralɛ-don-dɛ ladan. Wo kɔma, Yerusalɛm soe tɔnkɔn min tɔgɛ ko, “Ofɛli,” a ya nyɔ-waralɛ-tarɛ ladan.

⁴ A ya soenu sɔ Yuda kɔnkɔ-nyamanɛ rɔ. A ya nyamanɛ-kumafɛlɛn-bɛndɛ-layan-bɛnu anubɛ so-latankanɛ donu sɔ gbɔngbɔn donu kɔrɔ.

⁵ Mansa Yotam tara Amonnuna mansɛ anubɛ ala kɛlɛ-dannu kɛlɛ, ado a ya wonu nɔ. A ya fanka digin Amonnu kuma, wonu tora duti dila a ma. San-bo-san, wonu si wodi-gbɛ min di a ma wola gbiliyɛ anubɛ fui-fan bɔrɔ bi-loli rakɛn de! Wonu si to fui-fan-subolo fila dila a ma san-bo-san. Anu si fui-fen-su kelen doi bɔrɔ waga mogan-ni-nani (24,000) di a ma. Anu si fui-fen-su doi bɔrɔ waga mogan-ni-nani (24,000) di a ma fanan. San sawa kɔrɔ dɛgɛdɛgɛ, Amonnu bi duti kɛ dila a ma.

⁶ Mansa Yotam bi ata Mari Allata kumɛ tola a gbɛ rɔ min kɛ, a ya sɛnbɛ sɔrɔn ata mansayɛ rɔ kosɛbɛ!

⁷ A ya koe min bɛɛsi ma ala mansayɛ kɔrɔ, katarala a ya kɛlɛ minnu kɛ anubɛ a ya ko-gbɛrɛ minnu ma, anu ya wonu sɛbɛ Yuda mansɛnu anubɛ Isirɛla mansɛnuna buku do rɔ.

⁸ Mansa Yotam ya mansayɛ sɔrɔn a sɔrɔn-san mogan-ni-loli nyɔgɛ le ma. San tan-ni-wɔrɔ, a ye mansayɛ la ka bɔ Yerusalɛm soe burɔ.

⁹ Mansa Yotam tenbira. Anu ya a togon Mansa Dawuda halala-luyi ma. Ala den Ehasi sigira a gbɛ rɔ.