2 Ko-Kɔrɔta-Karan 25 - ALLALA KUMƐ

Yuda Mansa Hamasa Wara-Koe

¹ Hamasa ya mansayɛ sɔrɔn a sɔrɔn-san mogan-ni-loli-nyɔgɛ le ma. San mogan-ni-kɔnɔntɔ fanan, a ye mansayɛ la ka bɔ Yerusalɛm soe burɔ. A na tɔgɛ le Yɛhoyadan. Yerusalɛm kɛ le wo la.

² Ale Mansa Hamasa wara-koe ya Mari hɛnɛ kɔnɔ a ma Mari fɛ-koe bɛɛ kɛ a sɔndɔmɛ bɛɛ la.

³ Mansa Hamasa ya sɛnbɛ sɔrɔn ala mansayɛ rɔ wati min, mɔgɔ-ba minnu ya a fa Mansa Yohasi faga, ale fanan ya wonu damasi faga.

⁴ Kɔnɔ hali wo, a ma mɔgɔ-ba wonuna dannu faga bawo Mari ya tɔn minnu di Nɛbi Musa ma, a ya wonuna kilɛ tagama. Tɔn wo ko, “Ni dan ya ko tinya, mɔgɔ ti a sɔrɔnbagɛ faga wola ko la. Ni sɔrɔnbagɛ ya ko tinya, mɔgɔ ti ala dan faga wola ko la. Mɔgɛ nyɛrɛ ya koe min tinya, a tɔgɛ ni to wo yili la.”

Idɔm Kɛnu Kɛlɛ-Koe

⁵ Mansa Hamasa ya Yuda bɔnsɔn-mɔgɛnu anubɛ Bɛnyamɛ bɔnsɔn-mɔgɛnu tatala kurun kelen-kelenyɛ ma iko anuna kebilɛnu bi nya min. A wa mɔgɔ kɛmɛ dan, a ni mɔgɔ-ba kelen sigi wonu kun na. A wa mɔgɔ waga kelen (1,000) dan fanan, a ni mɔgɔ-ba kelen sigi wonu kun na. A ya minnu dan kɛ la, wonu siyi ara san mogan bɔ ha ka tenbi wo la, ala kɛlɛ-dan wonu yatɛ mumɛ bɛnta mɔgɔ waga kɛmɛ sawa (300,000) ma. Wonu damasi kusan kɛlɛ kɛla tanbɛ anubɛ nɛgɛ-walan la.

⁶ Wo kɔma, a ya Isirɛla nyamanɛ kɛlɛ-dan mɔgɔ waga kɛmɛ (100,000) masan wodi-gbɛ min na, wola gbiliyɛ anubɛ fui-fan bɔrɔ bi-loli rakɛn de!

⁷ Nɛbi do tara ale mansɛ wara ka a fɔ a ye ko, “I kana ta Isirɛla kɛlɛ-dannu na i fɛ bawo Mari sa Isirɛla mɔgɛ wonu fɛ.

⁸ Ile mirinɛ ko Isirɛla kɛlɛ-dannu si i fanka lakoloya kɛlɛ rɔ, wa? Wo sɛnbɛ ye Alla le bolo alako i ni nɔ-ko sɔrɔn, ni wo ma, anu denu ni i nɔ, ado ale le si a ma, i yogenu ni i nɔ.”

⁹ Mansa Hamasa ya nɛbi wo manyinika ko, “N bara ban nna wodi-gbɛ minnu dila anu ma, wo don?” Nɛbi wo ko, “Mari si do di i ma min tenbira wo la.”

¹⁰ Ale mansɛ wo ya ala kɛlɛ-den-masannɛ wonu nasɛgi anu barɛ Isirɛla nyamanɛ rɔ. Wonu tamatoe, anu yisi bɔra Yuda nyamanita-mɔgɛnu kuma kosɛbɛ!

¹¹ Mansa Hamasa ya a kerinteya. A ya ala kɛlɛ-dannu bi ka ta lɛɛ do rɔ min tɔgɛ le ko, “Kɔgɔ Lɛɛ.” Anu ya Idɔm kɛlɛ-dan mɔgɔ waga tan (10,000) faga lɛɛ wo rɔ nyɔ.

¹² Anu ya mɔgɔ waga tan (10,000) bira fanan. Anu tara wonu na kuru-denke-denke do kuma min bi Sela soe dafɛ. Anu ke nyɔ, anu ya mɔgɔ-biranɛ wonu natosokɔrɔ nyɔ alako anu tɔgɔ ni to farɛ wo la.

¹³ Anu bi wo kun na tumɛ min, Mansa Hamasa ya Isirɛla kɛlɛ-dan minnu masan nun, a ma sɔn minnu ta-koe ma kɛlɛ rɔ, kɔni, wonu tara bui Yuda soe donu ma minnu bi Samariya soe anubɛ Bɛti-Hɔrɔn soe tɛma. Anu ya Yuda mɔgɔ waga sawa (3,000) faga nyɔnu tɔ. Anu ya fen-siyaman bi.

¹⁴ Ale Mansa Hamasa bɔnɛ Idɔm kɛnu kɛlɛ tinɛ, a ya nɔ-ko sɔrɔn minnu ma, a nara Idɔm kɛ wonuna bɛsɛnu na a bolo. A ya wonu sigi ka to wonu kɔla ka isɛntinu mintan wonu ye.

¹⁵ Wo le ya a ma, Mari fonde bɔra. A ya nɛbi do lata ale Mansa Hamasa ma. Nɛbi wo ya ale mansɛ manyinika ko, “Nfenna i ye foninya bɛsɛ wonu kɔla minnu ma ke anuna mɔgɛnu kunkala i ma nun?”

¹⁶ Mansa Hamasa ya nɛbi wola kumɛ tɛgɛ a da rɔ. A ya nɛbi wo manyinika, a ko, “Ha bi, nde ara i manyinika n makawandi-koe rɔ? A sigi-a-la don! Ni wo ma, n si i wara-koe ka-a-la.” Kɔnɔ yanni nɛbi wo ni a rade, a ya a fɔ ko, “Kaka, n bara a lɔn ko Alla ara ban a latɛgɛla ko a si i kasara ka a tɛgɛ i wara min ma kɛ la, ado i ma i tole masɔ nna makawandili-kumɛ la.”

Isirɛla Kɛnu Kɛlɛ-Koe Yuda Kɛnu Bolo

¹⁷ Yuda Mansa Hamasa ban kumala a makawandilɛnu ye, a ya kilayɛ lata Isirɛla Mansa Yɛhowasi ma ko anu ni kɛlɛ. Mansɛ wo fa tɔgɛ le Mansa Yɛhowahasi. A benba tɔgɛ le Mansa Yehu.

¹⁸ Kɔnɔ ale Mansa Yɛhowasi ya kilayɛ wo kɔfili ka a fɔ Mansa Hamasa ye ko, “Lunyɛ do, wɔnɔ-firɛ min bi Lɛbanan kɔnkɛ rɔ, wo ya kilayɛ lata kɔlɔma-kuru-wɛ do ma ko, ‘Ila dunmusi ni to nna dan ye.’ Sogo-nyɛɛnɛ do belenta wɔnɔ-firɛ wo ratɛntɛnna.

¹⁹ Ile Hamasa ara Idɔm kɛnu nɔ min kɛ, woletɔ i wara wasi. I tɔgɛ wo min bara bɔ, wo ni i wasa. I ni a dan wo ma kɔɛ! I ni to ila bɔn la. A sɔgɛ ye i la, i ni nanparan sanba wobɛ ila mɔgɛnu ma, wa?”

²⁰ Kɔnɔ Hamasa ma a tole sigi kumɛ wo kɔrɔ. Alla sɔnta ko anu ni Mansa Hamasa nɔ bawo a ya Idɔm kɛnuna bɛsɛnu kɔ.

²¹ Nba, Isirɛla Mansa Yɛhowasi anubɛ Yuda Mansa Hamasa kɛlɛta. Anu bɛnta Bɛti-Simɛsi soe burɔ Yuda nyamanɛ rɔ.

²² Isirɛla kɛnu ya Yuda kɛnu nɔ. Mansa Hamasala kɛlɛ-dannu ya anu buri Mansa Yɛhowasila kɛlɛ-dannu kɔrɔ.

²³ Isirɛla Mansa Yɛhowasi ya Mansa Hamasa bira ka ta bui Yerusalɛm soe ma. Anu ya soe wo tarɛ tinya ka a bi Ifɛrɛm don-dɛ ma ha ka ta ke Tonke don-dɛ ma. Anu ya wo dama sa dugi ma dundulu! Anu ya tarɛ kan tinɛ min keri ka a bi a kerinɛ dan doi ma ka ta a sigi a kerinɛ dan doi la, nunkan-nya kɛmɛ nani.

²⁴ A ya sɛnɛ anubɛ wodi-gbɛ bi minnu bi Bato-Bɔn la anubɛ Bato-Bon-mirannu, Obɛdi-Idɔm kegeyɛnu bi minnu kandanna. Hali nɔnfuli minnu namaranɛ mansɛla bolɔn la, a ya wo damasi matɛrɛndɛ ka ta wo la a bolo Samariya soe burɔ. Wo kɔma, Mansa Yɛhowasi tara Yerusalɛm mɔgɛ donu na a bolo fanan.

²⁵ Isirɛla Mansa Yɛhowasila fagɛ kɔma, Yuda Mansa Hamasa ya san tan-ni-loli bɔ mansayɛ la, a nara to fagala.

²⁶ Mansa Hamasa ya koe min bɛɛsi ma ala mansayɛ kɔrɔ, anu ya wonu sɛbɛ Yuda anubɛ Isirɛla mansɛnuna buku do rɔ.

²⁷ Kebi a murutiyara Mari ma, mɔgɛnu ya yanfɛ don a ma Yerusalɛm soe burɔ alako anu ni ale Mansa Hamasa faga. Woletɔ a ya a buri ka ta Lesi soe burɔ kɔnɔ hali wo, a kunyɛ ma bɔ a rɔ. Anu ya a sagaran ka ta a faga nyɔ.

²⁸ Ala mɔgɛnu tara a furi la soee kuma ka a togon Mansa Dawuda halala-luyi ma Yerusalɛm soe burɔ.