2 Ko-Kɔrɔta-Karan 22 - ALLALA KUMƐ

Yuda Mansa Ehasaya Wara-Koe

¹ Yerusalɛm kɛnu ya ale Ehasaya sigi a fa gbɛ rɔ bawo Arabunu tara bui Yuda nyamanɛ ma nun ka Mansa Yɛhoramla dan bɛɛ faga fɔ ala den-naban min tɔgɛ Ehasaya.

^2-3 Ehasaya ya mansayɛ sɔrɔn a sɔrɔn-san mogan-ni-fila nyɔgɛ le ma. San kelen, a ye mansayɛ la ka bɔ Yerusalɛm soe burɔ. A na tɔgɛ le Atalaya, Mansa Ehabula dunmusi, kɔni. Atalaya wo benba tɔgɛ le Mansa Hɔmɔri, Isirɛla mansɛ, kɔni. Atalaya wola den Ehasaya fanan ya a benba Ehabu sɔn-yogomɛ bi.

⁴ Ale fanan bilara Mari la iko Mansa Ehabu anubɛ ala denbayɛ ya a ma nya min bawo Ehasaya kɛ fa Mansa Yɛhoram fagara tumɛ min, Mansa Ehabula mɔgɛ donu mara a makawandilɛnu na. A makawandilɛ wonu denu mara ala bulɛ la.

⁵ Bawo a bilara a makawandilɛ wonu kan fɛ, wo le ya a ma, anubɛ Isirɛla Mansa Yɔram tara Siriya Mansa Hesiyɛli kɛlɛ. Anu ya kɛlɛ wo kɛ Ramɔti-Kaliyadi soe dafɛ. Ale Isirɛla Mansa Yɔram tanbanta kɛlɛ wo rɔ.

⁶ A sɛgira a kɔma Yɛsɛreli soe burɔ ka ala tɛlɛnu dandan. Yuda Mansa Ehasaya tara a kɔndɔn tinɛ nyɔ.

⁷ Yuda Mansa Ehasayala tɛ min kera Isirɛla mansɛ Yɔram kɔndɔn tinɛ, Alla ya ata kɔndɔli wo ma ata mansayɛ lato-koe la. Mansa Ehasaya tora kɔndɔli-kɛ wo le la, Nimisila den Yehu nara anubɛ Mansa Yɔram kɛlɛ tinɛ, ado Mari le ya wo yabɔ ko a ni Mansa Ehabu kegeyɛ lato dogbe!

⁸ Yehu tenbi anu fagɛ wo le kun na, a bɛnta Yuda mɔgɔ-ba donu na anubɛ Mansa Ehasaya berinnɛ donu minnu tara Mansa Ehasaya fɛ Mansa Yɔram kɔndɔn tinɛ. Ale Yehu ya wo damasi faga.

⁹ Yehu ya mɔgɛ donu sɔ Mansa Ehasaya nyini tinɛ. Anu ya a taran dogɔn rɔ Samariya soe burɔ. Anu ya a bira ka ta a la ale Yehu ma. Yehu ya a faga. Anu ya a togon a benba Mansa Yɛhosafatila gbiliyɛla ko la bawo wo le ya Mari sako kɛ a yisi bɛɛ la. Mɔgɔ-wo-mɔgɔ ma to a niyi la Mansa Ehasaya kebilɛ la min si ma mansɛ la.

Yohasi Lakisi-Koe

¹⁰ Mansa Ehasaya na le Atalaya la. Ale Atalaya ya a lamɔɛn min kɛ ko Yehu ara ala den Mansa Ehasaya faga, ale Atalaya ya a nyɛrɛ mamanɛ bɛɛ faga.

¹¹ Mansa Yɛhoramla dunmusi le Yihɔsɛba la. Ehasaya tirisan le fanan. Saraka-Masɔla Yɛhoyada le ya a furu. Mansa Ehasayala den-kei do ye nyɔ min tɔgɛ Yohasi. Anu bi Yohasi wo na-kelen-nyɔgɛnu fagala tumɛ min, a tɛnɛ Yihɔsɛba ya Yohasi anubɛ a fɛ-sigi-musi bi ka anu dogon Bato-Bon-konko do la alako anu kana ale Yohasi faga. A ya wo ma min kɛ, a mama Atalaya ma ke a fagala.

¹² San wɔrɔ dɛgɛdɛgɛ, Yihɔsɛba ye a tɛnɛ-nɛ fɛ-birala Mari Bato-Bɔn wo la. San wɔrɛ wo kɔrɔ, a mama Atalaya ye mansayɛ la Yuda nyamanɛ rɔ.